ທັບນັກກິລາຄົນພິການຫູໜວກທີມຊາດລາວ ພ້ອມຈະເຂົ້າຮ່ວມການແຂ່ງຂັນຊີງແຊ້ມອາຊີ-ປາຊີຟິກ 2026 ທີ່ ປະເທດມາເລເຊຍ

ກອງປະຊຸມປະຖົມນິເທດແກ່ທັບນັກກິລາຄົນພິການຫູໜວກທີມຊາດລາວ ກຽມເຂົ້າຮ່ວມການແຂ່ງຂັນຊີງແຊ້ມອາຊີ-ປາຊີຟິກ 2026 ທີ່ປະເທດມາເລເຊຍ ຈັດຂຶ້ນ ເມື່ອທີ 28 ກັນຍາ 2026 ທີ່ສຳນັກງານກະຊວງສຶກສາທິການ ແລະ ກິລາ ຫຼື ສສກ (ຕຶກເຈົ້າອານຸວົງ) ໂດຍໃຫ້ກຽດໂອ້ລົມຂອງ ທ່ານ ລັດທະໄຊ ອິນທະວົງ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງເລຂາທິການຄະນະກຳມະການພາຣາແລມປິກແຫ່ງຊາດລາວ (ຄພລ), ມີທ່ານ ສີວິໄຊ ແສງດາວົງ ຫົວໜ້າພະແນກກິລາ-ກາຍຍະກຳຄົນພິການ ທັງເປັນກຳມະການ ຄພລ ພ້ອມດ້ວຍຄະນະ ແລະ ບັນດາຄູຝືກ ຕະຫຼອດຮອດນັກກິລາເຂົ້າຮ່ວມ.

ໂອກາດນີ້, ທ່ານ ສີວິໄຊ ແສງດາວົງ ລາຍງານກ່ຽວກັບຄວາມຄືບໜ້າ ແລະ ການກະກຽມຄວາມພ້ອມຮອບດ້ານຂອງທັບນັກກິລາຄົນພິການຫູໜວກທີມຊາດລາວ ເພື່ອເຂົ້າຮ່ວມງານແຂ່ງຂັນກິລາຄົນພິການຫູໜວກ ຊີງແຊ້ມອາຊີ-ປາຊີຟິກ ປີ 2026 ເຊິ່ງຈະຈັດຂຶ້ນໃນລະຫວ່າງວັນທີ 1-10 ຕຸລາ 2026 ທີ່ເມືອງປີນັງ ປະເທດມາເລເຊຍ ງານດັ່ງກ່າວ ສປປ ລາວ ໄດ້ສົ່ງນັກກິລາ ແລະ ເຈົ້າໜ້າທີ່ເຂົ້າຮ່ວມທັງໝົດ 3 ປະເພດກິລາຄື: ກິລາແລ່ນ-ລານ, ກິລາດອກປີກໄກ່ ແລະ ກິລາປິ່ງປ່ອງ ລວມມີຜູ້ເຂົ້າຮ່ວມທັງໝົດ 23 ທ່ານ (ຍິງ 9 ທ່ານ).

ຜ່ານມາ, ທາງຄະນະຮັບຜິດຊອບໄດ້ເອົາໃຈໃສ່ຈັດຕັ້ງປະຕິບັດວຽກງານຕ່າງໆ ຢ່າງຕັ້ງໜ້າ ເປັນຕົ້ນແມ່ນ ໄດ້ມີການປະສານງານ ແລະ ດຳເນີນເອກະສານສຳເລັດ ບໍ່ວ່າຈະເປັນໜັງສືສະເໜີ ແລະ ແຈ້ງການຈາກກະຊວງການຕ່າງປະເທດ, ຂໍ້ຕົກລົງຂອງລັດຖະມົນຕີກະຊວງ ສສກ ໃນການເຂົ້າສູນຝຶກຊ້ອມ ແລະ ເຂົ້າຮ່ວມການແຂ່ງຂັນ. ຈັດຕັ້ງປະສານງານອອກໜັງສືແຈ້ງການກ່ຽວກັບການກະກຽມນັກກິລາຄົນພິການທີມຊາດລາວ ແລະ ພານັກກິລາທຸກຄົນໄປກວດສຸຂະພາບຢ່າງລະອຽດທີ່ໂຮງໝໍມະໂຫສົດ ເພື່ອຮັບປະກັນຄວາມພ້ອມທາງດ້ານຮ່າງກາຍ.

ໂອກາດນີ້, ທ່ານ ລັດທະໄຊ ອິນທະວົງ ກໍໄດ້ເນັ້ນໜັກໃຫ້ທັບນັກກິລາຄົນພິການລາວ ເພີ່ມທະວີຄວາມເອົາໃຈໃສ່ ໃນການນຸ່ງຖືເຄື່ອງ ໂດຍໃຫ້ໃສ່ເສື້ອໂປໂລສີຂາວ ແລະ ຊຸດວອມສີຂາວເພື່ອຄວາມເປັນລະບຽບຮຽບຮ້ອຍ ປະຕິບັດລະບຽບວິໄນຢ່າງເຂັ້ມງວດ ສືບຕໍ່ໝັ່ນຝຶກຝົຍຫຼໍ່ຫຼອມຕົນເອງໃຫ້ມີການຄວາມແຂງແກ່ນ ເຂົ້າຮ່ວມແຂ່ງຂັນຍາດເອົາໄຊຊະນະສ້າງກຽດຊື່ສຽງມາສູ່ປະເທດຊາດ.

ສຳລັບແຜນການເດີນທາງ ຄະນະນຳ, ຄະນະກອງເລຂາ, ຄູຝຶກ ແລະ ນັກກິລາ ທັງໝົດເລີ່ມອອກເດີນທາງໃນວັນທີ 1 ຕຸລາ 2026 ໂດຍເຄື່ອງບິນອອກຈາກສະໜາມບິນສາກົນວັດໄຕ ສູ່ສະໜາມບິນສຸວັນນະພູມ ຣາຊະອານາຈັກໄທ ໃນເວລາ 13:30 ໂມງ ກ່ອນຈະສືບຕໍ່ມຸ້ງໜ້າສູ່ ປະເທດມາເລເຊຍ.

ພາບ-ຂ່າວໂດຍ: ສົງການ ພັນແພງດີ