ສຸພົນສາ ແລະ ເພັດນະຄອນ ສອງນັກແມ້ນປືນລາວ ຄວ້າແຊ໋ມລາຍການ ໄອພີເອັດຊີ ຊີງແຊ໋ມປະເທດລາວ ປະຈຳປີ 2026

ທ້າວ ສຸພົນສາ ນິຍົມ ແລະ ທ້າວ ເພັດນະຄອນ ພາມີສິດ ສອງໜຸ່ມນັກກິລາແມ້ນປືນໄອພີເອັດຊີທີມຊາດລາວ ໂຊຟອມສົມລາຄາດີກີນັກແມ້ນປືນລະດັບຕົ້ນຂອງປະເທດລາວ ຄວ້າແຊ໋ມການແຂ່ງຂັນກິລາຍິງປືນ IPSC ຊີງແຊ໋ມປະເທດລາວ ປະຈຳປີ 2026 ໄປຄອງ ຂະນະທີ່ ແຊ໋ມປະເພດປືນໂປຣດັກຊັນຍິງເປັນຂອງນາງ ນາງ ກົງຄຳ ບົວແສງພະຈັນ.

ໃນວັນທີ 31 ຕຸລາ 2026 ທີ່ສະໜາມກິລາຍິງປືນ 5 ເມສາ ເມືອງໄຊເຊດຖາ ນະຄອນຫຼວງວຽງຈັນ, ໄດ້ມີການຈັດການແຂ່ງຂັນກິລາຍິງປືນ ໄອພີເອັດຊີ (IPSC) ຊີງແຊ໋ມປະເທດລາວ ປະຈຳປີ 2026 ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງທ່ານ ພຸດທະສັກ ສຸກອາລຸນ ຜູ້ອຳນວຍການສະໜາມຍິງປືນ 5 ເມສາ ທັງເປັນປະທານສະໂມສອນຍິງປືນ ໄອພີເອັດຊີລາວ ມີບັນດາຄູຝຶກ ແລະ ນັກກິລາຍິງປືນທັງພາຍໃນ ແລະ ຕ່າງປະເທດເຂົ້າຮ່ວມ ເກືອບ 30 ຄົນ.

ການແຂ່ງຂັນໃນລາຍການດັ່ງກ່າວ ຈັດຂຶ້ນ ກໍເພື່ອເປັນການສົ່ງເສີມການເຄື່ອນໄຫວ ແລະ ພັດທະນານັກກິລາຍິງປືນລາວໃຫ້ມີຄວາມກ້າວໜ້າຢ່າງຕໍ່ເນື່ອງ, ກຽມຄວາມພ້ອມກ້າວສູ່ການເປັນນັກກິລາທີມຊາດ ແລະ ຍົກລະດັບສີມືໃຫ້ສາມາດກ້າວທັນກັບມາດຕະຖານໃນລະດັບອະນຸພາກພື້ນ, ພາກພື້ນ ແລະ ສາກົນ.

ລາຍການນີ້ ໄດ້ແບ່ງອອກເປັນ 3 ປະເພດ ແລະ ເປັນການແຂ່ງຂັນສະສົມຄະແນນໃນ 12 ສະໜາມປະກອບມີ ປະເພດປືນສະແຕນດາດ (Standard), ປະເພດປືນໂປຣດັກຊັນ (Production) ແລະ ປະເພດປືນໂອເພັນ (Open) ມີນັກກິລາພາຍໃນນະຄອນຫຼວງວຽງຈັນ, ຈາກປະເທດໄທ ແລະ ສປ ຈີນ ເຂົ້າຮ່ວມເກືອບ 30 ຄົນ.

ຜ່ານການແຂ່ງຂັນຕະຫຼອດວັນຜົນປະກົດວ່າ: ປະເພດປືນສະແຕນດາດຊາຍ ຊະນະເລີດ ເປັນຂອງທ້າວ ເພັດນະຄອນ ພາມີສິດ, ອັນດັບທີ 2 ທ້າວ ພະນາຣິນ ສຸວັນນະວົງ ແລະ ອັນດັບທີ 3 ເປັນຂອງທ້າວ ປານ ດວງປະເສີດ ນັກສິລະປິນຊື່ດັງປະເທດລາວ. ສ່ວນມືໃໝ່ລາຍການດັ່ງກ່າວ ແຊ໋ມເປັນຂອງທ້າວ ອຸທອນ ໄຕລິດທິ ແລະ ອັນດັບທີ 2 ສຸພາລິນ ທຸມພາວັນ.

ສ່ວນປະເພດປືນໂປຣດັກຊັນຊາຍ ຊະນະເລີດເປັນຂອງທ້າວ ສຸພົນສາ ນິຍົມ, ອັນດັບທີ 2 ທ້າວ ເພັດພະຈັນ ສີວົງສາ ແລະ ອັນດັບທີ 3 ທ້າວ ອະນຸໄຊ ແສງດາລາ ຂະນະທີ່ ປະເພດມືໃໝ່ລາຍການນີ້ ຊະນະເລີດເປັນຂອງທ້າວ ສີສົມບັດ ພົມມະຈັນ, ອັນດັບທີ 2 ທ້າວ ພານຸເດດ ແລະ ອັນດັບທີ 3 ທ້າວ ໄຊຍະວົງ ເລີດສຸພັນ.

ປະເພດປືນໂປຣດັກຊັນຍິງ ຊະນະເລີດເປັນຂອງນາງ ກົງຄຳ ບົວແສງພະຈັນ ແລະ ອັນດັບທີ 2 ເປັນຂອງນາງ ມະນີບົດ ວົງໄຊ ສ່ວນປະເພດປືນສະແຕນດາດຍິງ ຊະນະເລີດແມ່ນນາງ ທັນທີພາ ຖົມເຂົ້າ ນັກກິລາລູກສອດ ລາວ-ໄທ ແລະ ອັນດັບທີ 2 ນາງ ທິບພະພອນ ພົມມະລາດ.

ຂະນະທີ່ ປະເພດປະເພດປືນໂອເພັນ ຊະນະເລີດເປັນຂອງທ້າວ ພັນທະຈັກ ລິດທະວົງ ສ່ວນອັນດັບທີ 2 ນາງ ພັດທະມາພອນ ເຊົາໄຊວັດທະນະກຸນ ຈາກໄທ ແລະ ອັນດັບທີ 3 ເປັນຂອງທ້າວ ວິວັດ ສີໄຊ.

ພາບ-ຂ່າວໂດຍ ສົງການ ພັນແພງດິ