ຄໍາມ່ວນ ເປີດງານບຸນອອກພັນສາປະວໍລະນາ ແລະ ຊ່ວງເຮືອ ປະຈໍາປີ 2023 ຢ່າງຄຶກຄື້ນ

ແຂວງຄໍາມ່ວນ ເປີດງານບຸນອອກພັນສາປະວໍລະນາ ແລະ ຊ່ວງເຮືອ ປະຈໍາປີ 2023 ໃນຕອນເຊົ້າວັນທີ 27 ຕຸລາ 2023 ທີ່ຜາມໄຊແຄມຂອງ ເທດສະບານເມືອງທ່າແຂກ ໂດຍການເຂົ້າຮ່ວມຂອງທ່ານ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງຄໍາມ່ວນ, ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ປະທານຈັດງານບຸນອອກພັນສາປະວໍລະນາ ແລະ ຊ່ວງເຮືອ ປະຈໍາປີ 2023 ພ້ອມດ້ວຍບັນດາອະດີດການນໍາຂອງແຂວງ , ຄະນະນໍາຂັ້ນສູງຂອງແຂວງ, ພຣະເຖຣະນຸເຖຣະ, ຫົວໜ້າພະແນກການ, ຕາງໜ້າບໍລິສັດ, ລັດວິສາຫະກິດ, ຫົວໜ່ວຍທຸລະກິດຜູ້ປະກອບການອ້ອມຂ້າງແຂວງ, ຕາງໜ້າເມືອງໃນ 10 ຕົວເມືອງ ຕະຫຼອດຮອດອະນຸກໍາມະການ, ສີພາຍເຮືອຊ່ວງຈາກພາຍໃນແຂວງ, ຕ່າງແຂວງ ແລະ ແຂກຖືກເຊີນຢ່າງຟົດຟື້ນ.
ທ່ານ ແກ້ວລັນດອນ ຈັນທະປານີ ເຈົ້າເມືອງທ່າແຂກ ທັງເປັນຮອງປະທານຈັດງານ ໄດ້ລາຍງານກ່ຽວກັບການຫ້າງຫາກະກຽມງານບຸນປະເພນີອອກພັນສາປະວໍລະນາ ແລະ ຊ່ວງເຮືອ ປະຈໍາປີ 2023 ໃຫ້ຮູ້ວ່າ: ເພື່ອເຮັດໃຫ້ງານບຸນເຕັມໄປດ້ວຍບັນຍາກາດອັນເບີກບານມ່ວນຊື່ນ ແລະ ເປັນຂະບວນການຟົດຟື້ນ ພ້ອມທັງຮັບປະກັນໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ, ຮັກສາໄດ້ຮີດຄອງປະເພນີອັນດີງາມຂອງຊາດ ກໍຄືຂອງທ້ອງຖິ່ນ ແລະ ເພື່ອຕອບສະໜອງກັບຈຸດປະສົງ, ເປົ້າໝາຍຂອງການທ່ອງທ່ຽວ 3 ຍອດຍິ່ງ ທີ່ແຂວງໄດ້ກໍານົດຂຶ້ນຄື: ຍອດຍິ່ງທາງສິລະປະ-ວັດທະນະທຳ-ຮີດຄອງປະເພນີອັນດີງາມ, ຍອດຍິ່ງທາງດ້ານທຳມະຊາດທີ່ສວຍສົດງົດງາມ ແລະ ຍອດຍິ່ງທາງດ້ານປະຫວັດສາດອັນເປັນມູນເຊື້ອພິລະອາດຫານ ພາຍໃນງານຈຶ່ງໄດ້ຈັດໃຫ້ມີຫຼາກຫຼາຍກິດຈະກຳ ເຊັ່ນ: ການແຂ່ງຂັນເຮືອຊ່ວງ, ໄຫຼເຮືອໄຟ, ການປ່ອຍກະໂທງສາຍ ຈໍານວນ 2.566 ດວງ, ການສະແດງສິລະປະ-ລຳຜະຫຍາມະຫາໄຊ ທີ່ເປັນເອກະລັກຂອງແຂວງ, ການວາງສະແດງ ແລະ ຈໍາໜ່າຍສິນຄ້າໂອດັອບ ແລະ ການແລກປ່ຽນຊື້-ຂາຍສິນຄ້າຂອງພໍ່ແມ່ປະຊາຊົນດ້ວຍກັນ.

ສະເພາະກິດຈະກຳການແຂ່ງຂັນເຮືອຊ່ວງ ແມ່ນໄດ້ມີເຮືອທີ່ສົ່ງເຂົ້າຮ່ວມແຂ່ງຂັນທີ່ມາຈາກບັນດາບ້ານ, ເມືອງ ແລະ ແຂວງຕ່າງໆ ພາຍໃນ ແລະ ຕ່າງປະທດ ມີທັງໝົດ ຈໍານວນ 32 ລໍາ ໃນນັ້ນ ເຮືອໃຫຍ່ປະເພດ 50-55 ສີພາຍ ມີ 8 ລໍາ, ເຮືອກາງ 30-35 ສີພາຍ 10 ລໍາ ແລະ ເຮືອຊ່ວງມິດຕະພາບ 14 ລໍາ ໃນນີ້ມາຈາກແຂວງນະຄອນພະນົມ ປະເທດໄທ 4 ລໍາ. ນອກນີ້ ຍັງຈະຮັບຊົມການໄຫຼເຮືອໄຟ ຈໍານວນ 3 ລໍາ ເພື່ອເປັນການອະນຸລັກຮັກສາຮີດຄອງປະເພນີມູນເຊື້ອ, ວັດທະນະທຳອັນດີງາມຂອງຊາດ ໄວ້ໃຫ້ຄົນຮຸ່ນຫຼັງໄດ້ສຶກສາຮຽນຮູ້ ແລະ ສືບທອດຕໍ່ໄປ ຊຶ່ງເຮືອໄຟ ລໍາທຳອິດ ແມ່ນມີຮູບພຣະທາດສີໂຄດຕະບອງເປັນເອກະລັກ ທີ່ເປັນຕົວແທນໃຫ້ແກ່ພຣະພຸດທະສາສະໜາ, ລໍາທີ 2 ມີຮູບຫໍຫຼັກເມືອງ ເປັນຕົວແທນໃຫ້ແກ່ພຣະແມ່ຄົງຄາ ແລະ ລໍາທີ 3 ມີຮູບຫໍໄຫວ້ 21 ມີນາ ເປັນຕົວແທນໃຫ້ແກ່ພຣະແມ່ທໍລະນີ.
ງານບຸນດັ່ງກ່າວ ແມ່ນຈະໄດ້ດໍາເນີນເປັນເວລາ 3 ວັນ ລະຫວ່າງວັນທີ 27-29 ຕຸລາ 2023 ຂໍເຊີນຊວນທຸກພາກສ່ວນ ຕະຫຼອດເຖິງພໍ່ແມ່ປະຊາຊົນບັນດາເຜົ່າ ເຂົ້າມາທ່ຽວຊົມ ແລະ ໃຫ້ການປະກອບສ່ວນໃນດ້ານຕ່າງໆ ເພື່ອເຮັດໃຫ້ງານດັ່ງກ່າວໄດ້ຮັບການຈັດຕັ້ງປະຕິບັດສຳເລັດໄປດ້ວຍດີ ແລະ ຮຽກຮ້ອງມາຍັງທຸກພາກສ່ວນ ຈົ່ງປະຕິບັດຕາມຂໍ້ກຳນົດ, ກົດລະບຽບຕ່າງໆ ທີ່ຄະນະກຳມະການຈັດງານວາງອອກຢ່າງເຂັ້ມງວດ ເພື່ອຄວມສະຫງົບ, ຄວາມປອດໄພ ແລະ ເປັນຄວາມລະບຽບຮຽບຮ້ອຍຕະຫຼອດການຈັດງານ.

#khammouane News