ເມືອງຫຼວງນໍ້າທາ ສຳເລັດງານແຂ່ງຂັນຊ່ວງເຮືອ ໂອກາດບຸນອອກພັນສາ ປະຈຳປີ 2023
ເມືອງຫຼວງນ້ຳທາ ແຂວງຫຼວງນ້ຳທາ ສຳເລັດການຈັດງານແຂ່ງຂັນຊ່ວງເຮືອປະເພນີ ເນື່ອງໃນໂອກາດວັນບຸນອອກພັນສາປະວໍລະນາ ປະຈໍາປີ 2023 ຊຶ່ງກົງກັບວັນທີ 31 ຕຸລາ 2023 ທີ່ທ່ານໍ້າທາເຂດສວນວັດທະນະທໍາບັນດາເຜົ່າແຂວງ, ໂດຍມີ ທ່ານ ຈັນທອງ ແກ້ວປະສີດ ຮອງເລຂາພັກແຂວງ ແລະ ທ່ານ ຫຼ້າປະເສີດ ສີປະເສີດ ເຈົ້າເມືອງຫຼວງນໍ້າທາ ພ້ອມດ້ວຍການນໍາຂອງແຂວງ, ເມືອງ, ອົງການຈັດຕັ້ງບ້ານ, ເຖົ້າແກ່ອາວຸໂສຜູ້ຊົງຄຸນວຸດທິ, ບໍລິສັດ, ລັດວິສາຫະກິດ ຕະຫຼອດຮອດນັກສີພາຍຍິງ-ຊາຍ ແລະ ມວນຊົນຊາວຫຼວງນໍ້າທາເຂົ້າຮ່ວມດ້ວຍບັນຍາກາດຄຶກຄື້ນມ່ວນຊື່ນ.
ໃນພິທີ, ທ່ານ ຫຼ້າປະເສີດ ສີປະເສີດ ກ່າວວ່າ: ງານແຂ່ງຂັນຊ່ວງເຮືອ ເນື່ອງໃນວັນບຸນອອກພັນສາປະວໍລະນາ ປະຈຳປີ 2023 ແມ່ນງານບຸນປະເພນີຂອງຊາວພຸດກໍຄືຊາວລາວທີ່ໄດ້ສືບທອດກັນມາແຕ່ບູຮານນະການພາຍຫຼັງຈໍາພັນສາປະຕິບັດທໍາຂອງພະສົງສໍາມະເນນ ໂດຍການແຂ່ງຂັນຊ່ວງເຮືອປີນີ້ ມີເຮືອເຂົ້າແຂ່ງຂັນທັງໝົດ 18 ລໍາ, ໃນນີ້ເຮືອປະເພດ 30 ສີພາຍຊາຍ 6 ລໍາ, ເຮືອປະເພດ 30 ສີພາຍ 5 ລໍາ ແລະ ເຮືອ 12 ສີພາຍຊາຍ 7 ລໍາ.
ຜ່ານການແຂ່ງຂັນຊ່ວງເຮືອປະເພດ 30 ສີພາຍຊາຍ ຊະນະເລີດ ເຮືອບ້ານຂອນ ໄດ້ຮັບຂັນເງິນ 1 ໜ່ວຍ ພ້ອມເງິນສົດ 15 ລ້ານກີບ, ອັນດັບທີ 2 ເຮືອ ປກສ ແຂວງ ໄດ້ຮັບເງິນລາງວັນ 12 ລ້ານກີບ, ອັນດັບທີ 3 ເຮືອບ້ານຫຼວງ ໄດ້ຮັບເງິນລາງວັນ 10 ລ້ານກີບ ແລະ ອັນດັບທີ 4 ເຮືອບ້ານວຽງໃຕ້ ໄດ້ຮັບເງິນລາງວັນ 6 ລ້ານກີບ; ເຮືອປະເພດ 30 ສີພາຍຍິງ ຊະນະເລີດ ເຮືອບ້ານຂອນ ໄດ້ຮັບຂັນເງິນ 1 ໜ່ວຍ ພ້ອມເງິນລາງວັນ 15 ລ້ານກີບ, ອັນດັບທີ 2 ເຮືອບ້ານວຽງເໜືອ ໄດ້ຮັບເງິນລາງວັນ 12 ລ້ານກີບ, ອັນດັບທີ 3 ເຮືອບ້ານວຽງໃຕ້ ໄດ້ຮັບເງິນລາງວັນ 10 ລ້ານກີບ ແລະ ອັນດັບທີ 4 ເຮືອບ້ານຫຼວງ ໄດ້ຮັບເງິນລາງວັນ 6 ລ້ານກີບ; ເຮືອປະເພດ 12 ສີພາຍຊາຍ ຊະນະເລີດ ເຮືອອີໂວຕາດນໍ້າດີ ໄດ້ຮັບຂັນເງິນ 1 ໜ່ວຍ ພ້ອມເງິນລາງວັນ 10 ລ້ານກີບ, ອັນດັບທີ 2 ເຮືອຮ້ານອາຫານ 902 ໄດ້ຮັບເງິນລາງວັນ 8 ລ້ານກີບ, ອັນດັບທີ 3 ເຮືອພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ໄດ້ຮັບເງິນລາງວັນ 6 ລ້ານກີບ ແລະ ອັນດັບທີ 4 ເຮືອບໍລິສັດແກັດຊັງລຽວ ໄດ້ຮັບເງິນລາງວັນ 4 ລ້ານກີບ.
ໃນວັນບຸນອອກພັນສາປະວໍລະນາຢູ່ເມືອງຫຼວງນໍ້າທາຄັ້ງນີ້ ນອກຈາກການແຂ່ງຂັນຊ່ວງເຮືອແລ້ວ ພາຍໃນງານ ຍັງໄດ້ມີການຄົບງັນຂອງວົງດົນຕີ, ຕະຫຼາດນັດຂາຍເສື້ອຜ້າ, ການວາງສະແດງສິນຄ້າ, ຜະລິດຕະພັນຕ່າງໆ ຕະຫຼອດຮອດເຄື່ອງຫຼິ້ນ, ເຄື່ອງກິນ-ດື່ມຕ່າງໆ ຄອຍບໍລິການໃຫ້ແກ່ຜູ້ໄປທ່ຽວງານບຸນ, ໃນເວລາຕອນຄໍ່າໄດ້ມີການວຽນທຽນ, ລອຍກະໂທງ, ໄຫຼເຮືອໄຟຕາມຮີດຄອງປະເພນີຕື່ມອີກ.
ຂ່າວ: ສົມພອນ ຂຸນດາວົງ
