ໂວວີນາມລາວ ຕັ້ງເປົ້າຢ່າງໜ້ອຍ 1 ຫຼຽນຄຳ ງານກິລານັກຮຽນອາຊຽນ ຄັ້ງທີ 13 ທີ່ສສ ຫວຽດນາມ ເປັນເຈົ້າພາບ

ທັບນັກກິລາໂວວີນາມນັກຮຽນທີມຊາດລາວ ມີຄວາມພ້ອມແລ້ວເກືອບ 100% ເຫຼືອພຽງລໍຖ້າແຕ່ເດີນທາງ ແລະ ລົງສະໜາມແຂ່ງຂັນ ໂດຍຈະສົ່ງຄະນະຄູຝຶກ 3 ທ່ານ ແລະ ນັກກິລາ 12 ຄົນ, ຍິງ 5 ຄົນ ເຂົ້າຮ່ວມຊີງໄຊ 10 ລາຍການ ໃນນີ້ແບ່ງເປັນປະເພດຕໍ່ສູ້ 4 ຮຸ່ນ ແລະ ປະເພດຟ້ອນ ຫຼື ສະແດງ 6 ລາຍການ ພ້ອມຕັ້ງເປົ້າຈະພະຍາຍາມສູ້ຊົນຍາດໃຫ້ໄດ້ຢ່າງໜ້ອຍ 1 ຫຼຽນຄຳ, 1 ຫຼຽນເງິນ ແລະ 2 ຫຼຽນທອງ ໃນການເຂົ້າຮ່ວມງານແຂ່ງຂັນກິລານັກຮຽນອາຊຽນ ຄັ້ງທີ 13 ທີ່ນະຄອນດານັງ ສສ ຫວຽດນາມ ເປັນເຈົ້າພາບ ລະຫວ່າງວັນທີ 1-8 ມິຖຸນາ 2024.

ສຳລັບງານແຂ່ງຂັນກິລານັກຮຽນອາຊຽນ ຄັ້ງທີ 13 ເຈົ້າພາບ ຫວຽດນາມ ບັນຈຸແຂ່ງຂັນທັງໝົດ 6 ປະເພດກິລາ ຄື: ແລ່ນ-ລານ, ລອຍນໍ້າ, ດອກປີກໄກ່, ບານບ້ວງ, ປັນຈັກສີລັດ ແລະ ໂວວີນາມ. ໃນນີ້ ສປປ ລາວ ຈະສົ່ງຄະນະນຳ, ຄູຝຶກ ແລະ ນັກກິລາ ເຂົ້າຮ່ວມແຂງຂັນເກືອບ 100 ຄົນ ໃນ 6 ປະເພດກິລາ ພ້ອມຕັ້ງເປົ້າຈະສູ້ຊົນໃຫ້ໄດ້ຢ່າງໜ້ອຍ 2 ຫຼຽນຄຳ, 3 ຫຼຽນເງິນ ແລະ 5 ຫຼຽນທອງ.

ສຳລັບຂະບວນນັກກິລາລາວ ຈະເດີນທາງດ້ວຍລົດ ຊຸດທຳອິດແມ່ນກິລາບານບ້ວງ ຈະອອກເດີນທາງໃນວັນທີ 29 ພຶດສະພາ 2024 ຈາກນັ້ນທີ່ເຫຼືອທັງໝົດຈະເດີນທາງ ໃນວັນທີ 30 ພຶດສະພາ 2024.

ຂ່າວໂດຍ: ລູກນ້ຳເຊ ອິນທະດາລິນ