ຄະນະນຳສະຫະພັນກິລາມະຫາວິທະຍາໄລລາວ ຮ່ວມຫາລືໃນສະພາກິລາມະຫາວິທະຍາໄລອາຊຽນ ຄັ້ງທີ 36 ທີ່ອິນໂດເນເຊຍ

ຄະນະນຳສະຫະພັນກິລາມະຫາວິທະຍາໄລລາວ (ສກມລ) ນໍາໂດຍ ທ່ານ ຮສ.ປອ ອຸດົມ ພອນຄໍາເພັງ ປະທານສະຫະພັນກິລາມະຫາວິທະຍາໄລລາວ ໄດ້ເຂົ້າຮ່ວມກອງປະຊຸມສະພາກິລາມະຫາວິທະຍາໄລອາຊຽນ (AUSC) ຄັ້ງທີ 36 ເມື່ອວັນທີ 24 ມິຖຸນາ 2024 ທີ່ໂຮງແຮມ ເມີກິວ ແກຣນ ເມືອງຊູຣາບາຢາ ແຂວງຈາວາຕາເວັນອອກ (Java East) ປະເທດອິນໂດເນເຊຍ ໂດຍພາຍໃຕ້ການເປັນປະທານຂອງທ່ານ ດຣ Mohd Rusllim Mohamed ປະທານສະພາກິລາມະຫາວິທະຍາໄລອາຊຽນ, ມີທ່ານ ຮສ.ປອ ສິນທະວອນ ດາລາວົງ ຮອງປະທານ ແລະ ເລຂາທິການສະຫະພັນກິລາມະຫາວິທະຍາໄລລາວ, ທ່ານ ປອ ສຸລິວັນ ເຊີນວິໄລ ຮອງເລຂາທິການສະຫະພັນກິລາມະຫາວິທະຍາໄລລາວ, ທ່ານ ພູວົງ ພິມມະກອງ ຮອງເລຂາທິການສະຫະພັນກິລາມະຫາວິທະຍາໄລລາວ ພ້ອມດ້ວຍປະທານ ແລະ ຄະນະສະຫະພັນກິລາມະຫາວິທະຍາໄລຂອງບັນດາປະເທດສະມາຊິກອາຊຽນເຂົ້າຮ່ວມ.

ໃນກອງປະຊຸມ, ໄດ້ມີການລາຍງານການກະກຽມຄວາມພ້ອມຮອບດ້ານ ໃນການຈັດງານມະຫາກໍາກິລາມະຫາວິທະຍາໄລອາຊຽນ ຄັ້ງທີ 21 ປີ 2024 ຂອງປະເທດເຈົ້າພາບ ອິນໂດເນເຊຍ ຊຶ່ງດັ່ງກ່າວ (ASEAN University Games (AUG) 2024) ຈະ​ເລີ່ມ​ແຕ່​ວັນ​ທີ 25 ມິຖຸນາ ຫາ 6 ກໍລະກົດ 2024 ໂດຍ​ມີແຂວງຈາວາຕາເວັນອອກ (Java East) ເປັນ​ເຈົ້າພາບ. ງານ​ກິລາ​ລະຫວ່າງ​ມະຫາວິທະຍາ​ໄລ​ອາ​ຊຽນ​ຄັ້ງ​ນີ້ ​ມີ​ການ​ເຂົ້າ​ຮ່ວມ​ຢ່າງ​ຕັ້ງໜ້າ​ຈາກ 11 ປະ​ເທດ​ສະມາຊິກ​ອາ​ຊຽນ ຄື: ອິນ​ໂດ​ເນ​ເຊຍ, ມາ​ເລ​ເຊຍ, ລາວ, ມຽນມາ, ຫວຽດນາມ, ຕີ​ມໍ​ເລັດສະ​ເຕ, ບຣູ​ໄນ​ ດາ​ຣູ​ຊາ​ລາມ, ​ໄທ, ສິງກະ​ໂປ, ກຳປູ​ເຈຍ ແລະ ​ຟີ​ລິບ​ປິນ

ໂດຍຄາດວ່າປະມານ 4.000 ຫາ 5.000 ຄົນ (ນັກກິລາ, ຄູຝຶກ, ເຈົ້າໜ້າທີ່, ຜູ້ສະໜັບສະໜູນ ແລະ ອື່ນໆ), ​ມີ​ການ​ແຂ່ງຂັນ​ໃນ 21 ກິລາ​ ຄື: ຟຸດ​ຊໍ, ເປ​ຕັງ, ບານ​ສົ່ງ, ​ເທັນ​ນິດ, ລອຍ​ນ້ຳ, ກິລາ​ປີນ​ພູ, ບ້ວງ 3×3, ຢູ​ໂດ, ບານ​ມື, ວູຊູ, ບຣິດ, ​ໝາກເສິກ, ແລ່ນ-ລານ, ບານບ້ວງ, ​ດອກປີກໄກ່, ຍິງທະນູ, ບານ​ສົ່ງ​ຫາດ​ຊາຍ, ​ກະຕໍ້, ເທຄວັນໂດ, ປັນຈັກຊີລັດ ແລະ ຄາຣາເຕ

ຊຶ່ງນໍາໃຊ້ 9 ສະໜາມທໍາການແຂ່ງຂັນ ປະກອບມີ State University of Surabaya, Airlangga University, Sepuluh Nopember Institute of Technology, University of Surabaya, UPN “Veteran” East Java, State University of Malang, Brawijaya University, Malang Muhammadiyah University ແລະ Malang Islamic University. ພິທີເປີດ AUG 2024 ຈະຈັດຂຶ້ນທີ່ສະໜາມກິລາບານບ້ວງສາກົນ (UNESA Campus 2 Lidah Wetan, Surabaya) ໂດຍການສະແດງສິລະປະຕ່າງໆຈາກ ນັກສິລະປິນແຫ່ງຊາດ ແລະ ນັກສຶກສາຢ່າງຄຶກຄື້ນ.

ນອກຈາກນີ້, ກອງປະຊຸມຍັງໄດ້ມີການຢືນຢັນ​ບົດ​ບັນທຶກ​ກອງ​ປະຊຸມ​ຄັ້ງຜ່ານມາ, ບັນຫາທີ່ເກີດຈາກກອງປະຊຸມ AUSC ຄັ້ງທີ 35, ລາຍງານກອງປະຊຸມ AUSC 2024, ລາຍງານຂອງຄະນະກໍາມະການເຕັກນິກ ແລະ ຈັດການແຂ່ງຂັນ AUSC, ລາຍງານຂອງຄະນະກຳມະການການແພດ AUSC ແລະ ຕ້ານສານເສບຕິດ, ລາຍງານຂອງຄະນະກໍາມະການ ການສຶກສາ AUSC.

 ໂດຍ ດາວຫວຽດ ລາຍງານຈາກປະເທດອິນໂດເນເຊຍ