ການນຳ ສສກ-ມຊ ຈັດກິດຈະກຳແຂ່ງຂັນກິລາເຕະບານມິດຕະພາບ ຕ້ອນຮັບກອງປະຊຸມໃຫຍ່ 3 ຂັ້ນຂອງພັກ
08/08/2024
ການນຳກະຊວງສຶກສາທິການ ແລະ ກິລາ ຫຼື ສສກ ຮ່ວມກັບ ການນຳມະຫາວິທະຍາໄລແຫ່ງຊາດ (ມຊ) ຈັດກິດຈະກຳແຂ່ງຂັນກິລາເຕະບານມິດຕະພາບ ເພື່ອສ້າງຂະບວນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນສຳຄັນຕ່າງໆຂອງພັກ, ຂອງຊາດ ແລະ ຂອງສາກົນ ເວົ້າລວມ, ເວົ້າສະເພາະແມ່ນຕ້ອນຮັບກອງປະຊຸມໃຫຍ່ 3 ຂັ້ນຂອງອົງຄະນະພັກກະຊວງສຶກສາທິການ ແລະ ກິລາ ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍສຳຄັນເລິກເຊິ່ງ.
ກິດຈະກຳແຂ່ງຂັນກິລາເຕະບານມິດຕະພາບໃນຄັ້ງນີ້ ໄດ້ມີຂຶ້ນໃນຕອນແລງວັນທີ 7 ສິງຫາ 2024 ທີ່ສະໜາມກິລາກາງ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ) ເມືອງໄຊທານີ ນະຄອນຫຼວງວຽງຈັນ, ໃຫ້ກຽດເຂົ້າຮ່ວມຂອງ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ ພ້ອມດ້ວຍບັນຫາຫົວໜ້າ-ຮອງຫົວໜ້າກົມ, ຜູ້ອຳນວຍການສະຖາບັນ, ຄະນະອະທິການບໍດີ ມະຫາວິທະຍາໄລແຫ່ງຊາດ ຕະຫຼອດຮອດພະນັກງານ, ຄູອາຈານຈາກບັນດາກົມ ແລະ ມະຫາວິທະຍາໄລແຫ່ງຊາດຢ່າງພ້ອມພຽງ.
ການຈັດກິດຈະກຳແຂ່ງຂັນກິລາເຕະບານມິດຕະພາບໃນຄັ້ງນີ້ ນອກຈາກເປັນສ້າງຂະບວນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນສຳຄັນຕ່າງໆຂອງພັກ, ຂອງຊາດ ແລະ ຂອງສາກົນ ເວົ້າລວມ, ເວົ້າສະເພາະແມ່ນຕ້ອນຮັບກອງປະຊຸມໃຫຍ່ 3 ຂັ້ນຂອງອົງຄະນະພັກກະຊວງສຶກສາທິການ ແລະ ກິລາ ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍສຳຄັນເລິກເຊິ່ງແລ້ວ ຍັງເປັນການຮັດແໜ້ນຄວາມສາມັກຄີຮັກແພງລະຫວ່າງຄະນະນຳ, ພະນັກງານ ແລະ ຄູອາຈານ ລະຫວ່າງ ກະຊວງ ສສກ ແລະ ມະຫາວິທະຍາໄລແຫ່ງຊາດ ໃຫ້ມີຄວາມໃກ້ຊິດຕິດແທດ ແລະ ແໜ້ນແຟ້ນກັນຍິ່ງຂຶ້ນ. ຄຽງຄູ່ກັນນັ້ນກໍເພື່ອເປັນການສ້າງໂອກາດໃຫ້ພະນັກງານ, ຄູອາຈານ ໃຫ້ຫຼິ້ນກິລາເພື່ອເຮັດໃຫ້ມີສຸຂະພາບແຂງແຮງ ພ້ອມກັນປະຕິບັດໜ້າທີ່ວຽກງານທີ່ໄດ້ຮັບການມອບໝາຍຈາກຂັ້ນເທິງໃຫ້ມີຜົນສຳເລັດເປັນກ້າວໆ. ຜ່ານການແຂ່ງຂັນຜົນປະກົດວ່າ ທີມການນຳກະຊວງສຶກສາທິການ ແລະ ກິລາ ເອົາຊະນະ ທີມການນຳມະຫາວິທະຍາໄລແຫ່ງຊາດ ໄປໄດ້ 4-3 ປະຕູ.
ຂ່າວໂດຍ: ລູກນ້ຳເຊ ອິນທະດາລິນ
