“ມັດ ຖິ່ນມະນາວ” ສາວຈອມພະລັງ ຕັ້ງເປົ້າຄວ້າ 2 ຫຼຽນຄຳ ໃຫ້ເຈົ້າພາບ ນະຄອນຫຼວງວຽງຈັນ

ນາງ ມັດ ຖິ່ນມະນາວ ສາວນັກກິລາແລ່ນ-ລານຈອມພະລັງເຈົ້າຂອງ 2 ຫຼຽນຄຳ “ຊຽງຂວາງ ເກມ 2022” ພ້ອມຈະສ້າງຜົນງານໄລ່ລ່າ 2 ຫຼຽນຄຳ ໃຫ້ເຈົ້າພາບ ນະຄອນຫຼວງວຽງຈັນ ໃນການແຂ່ງຂັນກິລາຊັດຫຼາວ ແລະ ແກວ່ງຄ້ອນ ປະເພດລານຍິງ ໃນງານມະຫາກຳກິລາແຫ່ງຊາດ ຄັ້ງທີ XII ຫຼື “ນະຄອນຫຼວງວຽງຈັນ ເກມ 2025” ຈະຈັດຂຶ້ນລະຫວ່າງວັນທີ 15-25 ພະຈິກ 2025.

ນາງ ມັດ ຖິ່ນມະນາວ ສາວນັກກິລາປະເພດລານຍິງຂອງ ເຈົ້າພາບ ນະຄອນຫຼວງວຽງຈັນ ສືບຕໍ່ຝຶກຊ້ອມຢ່າງເປັນປົກກະຕິ ທີ່ສະຖາບັນກິລາ-ກາຍະກຳ ເຂດບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ ໄດ້ໃຫ້ສຳພາດຕໍ່ສື່ມວນຊົນມວນສຶກສາ, ວິທະຍາສາດ ແລະ ກິລາ ເມື່ອບໍ່ດົນມານີ້ ວ່າ: ນ້ອງຮູ້ສຶກເປັນກຽດຢ່າງສູງທີ່ໄດ້ສືບຕໍ່ຮັບໃຊ້ບ້ານເກີດເມືອງນອນ ນະຄອນຫຼວງວຽງຈັນ ເຂົ້າຮ່ວມງານມະຫາກຳກິລາແຫ່ງຊາດ ອີກປີໜຶ່ງ ພາຍຫຼັງທີ່ໄດ້ເກັບຕົວຝຶກຊ້ອມໄດ້ 2 ເດືອນ ຜ່ານມາ ປັດຈຸບັນນ້ອງໄດ້ຟື້ນຟູກຳລັງ, ເທັກນິກ ແລະ ທັກສະກັບມາຢູ່ໃນລະດັບສູງອີກຄັ້ງ ກ່ອນຈະຮອດການເຂົ້າຮ່ວມແຂ່ງຂັນຕົວຈິງເຊື່ອວ່າ ນ້ອງຈະສາມາດທຳສະຖິຕິໄດ້ດີກວ່າຜ່ານມາແນ່ນອນ ສິ່ງສຳຄັນ ຕອນນີ້ ຄືນ້ອງຢາກຝາກຂໍກຳລັງໃຈຈາກພໍ່ແມ່ປະຊາຊົນຊາວ ນະຄອນຫຼວງວຽງຈັນ ຊ່ວຍເປັນກຳລັງໃຈ ສົ່ງແຮງເຊຍມາເຊຍພວກເຮົາດ້ວຍ ແລ້ວພວກເຮົາທັບນັກກິລາແລ່ນ-ລານ ລູກຫຼານຊາວນະຄອນຫຼວງວຽງຈັນ ຈະເຮັດໃຫ້ບັນດາທ່ານບໍ່ຜິດຫວັງຢ່າງແນ່ນອນ.

ມັດ ຖິ່ນມະນາວ ເກີດທີ່ບ້ານໂນນຊາຍ ເມືອງປາກງື່ມ ນະຄອນຫຼວງວຽງຈັນ ໄດ້ຫຼິ້ນໃຫ້ນະຄອນຫຼວງວຽງຈັນ ໃນງານກິລາແຫ່ງຊາດ ຜ່ານມາ 3 ຄັ້ງ  ກໍຄື ງານກິລາແຫ່ງຊາດ ຄັ້ງທີ 9 ແຂວງຫຼວງພະບາງ ເປັນເຈົ້າພາບ ປີ 2011 ຍາດໄດ້ 1 ຫຼຽນຄຳ ປະເພດຊັດຫຼາວ ແລະ 1 ຫຼຽນທອງ ແກວ່ງຄ້ອນ; ງານກິລາແຫ່ງຊາດ ຄັ້ງທີ 10 ແຂວງອຸດົມໄຊ ເປັນເຈົ້າພາບ ປີ 2014 ຍາດໄດ້ 2 ຫຼຽນຄຳ ຈາກຊັດຫຼາວ ແລະ ຊຸກນໍ້າໜັກ; ງານກິລາແຫ່ງຊາດ ຄັ້ງທີ 11 ແຂວງຊຽງຂວາງ ເປັນເຈົ້າພາບ ປີ 2022 ຍາດໄດ້ 2 ຫຼຽນຄຳ ຈາກຊັດຫຼາວ ສະຖິຕິເຮັດໄດ້ 36 ແມັດ ແລະ ແກວ່ງຄ້ອນ ສະຖິຕິເຮັດໄດ້ 40,89 ແມັດ.

ພາບ-ຂ່າວໂດຍ: ສົງການ ພັນແພງດີ