ຫາລືລະດັບຊາດ ສ້າງແຜນດໍາເນີນການກຽມສະເໜີແຫຼ່ງອຸທິຍານທໍລະນີ ໃນ ສປປ ລາວ
ຫ້ອງການເລຂາຄະນະກຳມາທິການແຫ່ງຊາດລາວ ເພື່ອອຸຍແນັດສະໂກ ກົມຮ່ວມມືກັບຕ່າງປະເທດ ກະຊວງສຶກສາທິການ ແລະ ກິລາ ໄດ້ຈັດກອງປະຊຸມປຶດສາຫາລືລະດັບຊາດ ເພື່ອສ້າງແຜນດໍາເນີນການກະກຽມສະເໜີແຫຼ່ງອຸທິຍານທໍລະນີ (Geopark) ໃນ ສປປ ລາວ ເມື່ອວັນທີ 27 ກັນຍາ 2023 ທີ່ເມືອງວັງວຽງ ແຂວງວຽງຈັນ ໂດຍພາຍໃຕ້ການເປັນປະທານຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີກະຊວງສຶກສທິການ ແລະ ກິລາ, ປະທານຄະນະກຳມາທິການແຫ່ງຊາດລາວ ເພື່ອອຸຍແນັດສະໂກ, ມີຜູ້ຕາງໜ້າຈາກກົມປ່າໄມ້ ກະຊວງກະສິກຳ ແລະ ປ່າໄມ້, ກົມທໍລະນີສາດ ແລະ ແຮ່ທາດ ກະຊວງພະລັງງານ ແລະ ບໍ່ແຮ່, ກົມພັດທະນາການທ່ອງທ່ຽວ, ກົມໂຄສະນາການທ່ອງທ່ຽວ ກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ກົມຄຸ້ມຄອງວິທະຍາສາດ ກະຊວງສຶກສາທິການ ແລະ ກິລາ, ຄະນະສິ່ງແວດລ້ອມ ມະຫາວິທະຍາໄລແຫ່ງຊາດ, ຫ້ອງວ່າການສຳນັກງານນາຍົກລັດຖະມັນຕີ, ຫ້ອງການເລຂາຄະນະກຳມາທິການແຫ່ງຊາດລາວ ເພື່ອອຸຍແນັດສະໂກ, ຮອງຫົວໜ້າພະແນກກະສິກຳ ແລະ ປ່າໄມ້, ຮອງຫົວໜ້າພະແນກສຶກສາທິການ ແລະ ກິລາແຂວງ, ຮອງຫົວໜ້າພະແນກ ຖວທ ແຂວງ, ເຈົ້າເມືອງຄຸນຄຳ, ເຈົ້າເມືອງນາກາຍ, ຕາງໜ້າໂຄງການພັດທະນາແຫຼ່ງທ່ອງທ່ຽວແບບອະນຸລັກ (Tétraktys) ແຂວງຄຳມ່ວນ.
ໃນກອງປະຊຸມ, ຜູ້ເຂົ້າຮ່ວມໄດ້ຮຽນຮູ້ຄວາມເປັນມາ, ການພັດທະນາ ແລະ ທິດທາງການບໍລິຫານອຸທິຍານທໍລະນີໂລກ ສະຕູນ; ລະບົບອຸທິຍານທໍລະນີໃນປະເທດໄທ, ທິດທາງການພັດທະນາແຫຼ່ງທໍລະນີສູ່ອຸທິຍານທໍລະນີ ແລະ ອຸທິຍານທໍລະນີໂລກ; ທິດທາງທີ່ຈະພັດທະນາ, ອະນຸລັກ, ສ້າງຄຸ້ນຄ່າໃຫ້ເກີດປະໂຫຍດ ແລະ ສົ່ງເສີມໂຄສະນາເຂດພື້ນທີ່ອຸທິຍານທໍລະນີ; ຫຼັກເກນ, ເອກະສານ ແລະ ເຄື່ອງມືປະເມີນອຸທິຍານທໍລະນີຂອງ UNESCO ຊຶ່ງບັນຍາຍໂດຍ ດຣ ນັດຖະພັນ ເຂຊະຣະນັນທາ ທີ່ປຶກສາດ້ານວິຊາການ ແລະ ການຮ່ວມມືສາກົນຂອງອຸທິຍານທໍລະນີໂລກ ສະຕູນ ແລະ ດຣ ນາຣົງຣິດ ທຸ່ງປຣື ຜູ້ອຳນວຍການອຸທິຍານທໍລະນີໂລກ ສະຕູນ, ວິທະຍາກອນຈາກປະເທດໄທ. ນອກຈາກນັ້ນ, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການສະເໜີພາບລວມ, ທີ່ຕັ້ງ ແລະ ທ່າແຮງຂອງປ່າສະຫງວນແຫ່ງຊາດ ພູຫີນປູນ; ພາລະບົດບາດ ແລະ ນິຕິກໍາ ທີ່ຕິດພັນກັບການຄຸ້ມຄອງປ່າສະຫງວນ/ອຸທິຍານ ສະເໜີໂດຍວິທະຍາກອນຈາກກົມປ່າໄມ້ ກະຊວງກະສິກຳ ແລະ ປ່າໄມ້; ການກໍານົດ Geosite ແລະ ແນວຄວາມຄິດການພັດທະນາ Geopark ສະເໜີໂດຍພະແນກຂໍ້ມູນທໍລະນີສາດ ແລະ ແຮ່ທາດ ກະຊວງພະລັງງານ ແລະ ບໍ່ແຮ່.
ພາຍຫຼັງວິທະຍາກອນສະເໜີບົດສໍາເລັດ, ຜູ້ເຂົ້າຮ່ວມກອງປະຊຸມໄດ້ຄົ້ນຄວ້າ ແລະ ປະກອບຄຳເຫັນຕໍ່ຮ່າງຂໍ້ຕົກລົງແຕ່ງຕັ້ງຄະນະກຳມະການລະດັບຊາດ ເພື່ອການຈັດຕັ້ງປະຕິບັດວຽກງານ Geopark ໃນ ສປປ ລາວ ແລະ ໄດ້ຮ່າງແຜນດຳເນີນງານ (Roadmap) ການພັດທະນາອຸທິຍານທໍລະນີປ່າສະຫງວນແຫ່ງຊາດ ພູຫີນປູນ ແຂວງຄຳມ່ວນ ເປັນ Geopark ຂອງ ສປປ ລາວ.
ໂດຍ: ຫ້ອງການເລຂາຄະນະກຳມາທິການແຫ່ງຊາດລາວ ເພື່ອອຸຍແນັດສະໂກ
ຂ່າວທີ່ກ່ຽວຂ້ອງ
