ຜູ້ບໍລິຫານການສຶກສາ ແລະ ກິລາ ເມືອງສີໂຄດຕະບອງ ນະຄອນຫຼວງວຽງຈັນ ຈັດຕັ້ງປະຕິບັດວຽກງານຈຸດສຸມ ແລະ ຍຸດທະສາດຕ່າງໆຂອງຫ້ອງການສຶກສາທິການ ແລະ ກິລາເມືອງ ທີ່ກໍານົດໃນສົກຮຽນ 2021-2022  ເຫັນໄດ້ວ່າໃນຈໍານວນ 18 ຄາດໝາຍຫຼັກ ທີ່ກໍານົດໃນແຜນມີ 6 ຄາດໝາຍສາມາດບັນລຸຕາມແຜນ ແລະ ມີອີກ 4 ຄາດໝາຍທີ່ໃກ້ຈະບັນລຸ ໃນສົກ 2022-2023.

ເມື່ອວັນທີ 19 ຕຸລາ 2023, ຫ້ອງການສຶກສາທິການ ແລະ ກິລາ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ຈັດກອງປະຊຸມຜູ້ບໍລິຫານການສຶກສາ ແລະ ກິລາທົ່ວເມືອງ ປະຈໍາສົກຮຽນ 2022-2023 ທີ່ສະໂມສອນໂຮງຮຽນ ມ.ປາຍ ວຽງຈັນ-ໂຮ່ຈິມິນ ໂດຍເປັນກຽດເຂົ້າຮ່ວມຂອງທ່ານ ທະວີໄຊ ເໝົາຊົມພູ ເຈົ້າເມືອງສີໂຄດຕະບອງ, ທ່ານ ນາງ ລີປ່າເອ້ຍ ບົວປາວ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ທ່ານ ມະນີຫົງ ຈັນທະວົງສາ ຫົວໜ້າຫ້ອງການສຶກສາທິການ ແລະ ກິລາ ເມືອງສີໂຄດຕະບອງ ພ້ອມດ້ວຍຄະນະ, ບັນດາຜູ້ບໍລິຫານການສຶກສາ-ກິລາ ທັງພາກລັດ ແລະ ເອກະຊົນທົ່ວເມືອງຢ່າງພ້ອມພຽງ.

ໃນກອງປະຊຸມ, ທ່ານ ສິນໄຊ ສຸທຳມະວົງ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງ ໄດ້ຜ່ານບົດສະຫຼຸບຫຍໍ້ຂອງຫ້ອງການສຶກສາທິການ ແລະ ກິລາເມືອງ ສົກຮຽນ 2022-2023 ແລະ ແຜນພັດທະນາການສຶກສາ ສົກຮຽນ 2023-2024 ຊຶ່ງໃນສົກຮຽນ 2022-2023 ຜ່ານມາ ແມ່ນເປັນສົກຮຽນທີ 3 ແລະ ເປັນໄລຍະກາງສະໄໝ ຂອງການຈັດຕັ້ງປະຕິບັດແຜນພັດທະນາຂະແໜງການສຶກສາ ແລະ ກິລາ 5 ປີ ຄັ້ງທີ IX (2021-2025) ຊຶີ່ງວ່າການສຶກສາ, ວິທະຍາສາດ ແລະ ກິລາ ໄດ້ມີການປັບປຸງດີຂຶ້ນນທຽບໃສ່ປີຜ່ານມາ ທັງນີ້ ກໍຍ້ອນຄວາມເອົາໃຈໃສ່ຂອງຜູ້ບໍລິຫານການສຶກສາທຸກຂັ້ນແຕ່ສູນກາງຮອດທ້ອງຖິ່ນຕໍ່ກັບການແກ້ໄຂການແຜ່ລະບາດຂອງພະຍາດໂຄວິດ-19, ໄດ້ເຮັດໃຫ້ສະຖານການສຶກສາທຸກແຫ່ງໃນທົ່ວເມືອງສາມາດກັບມາເປີດຄືນແບບເຊິ່ງໜ້າໄດ້ຢ່າງເປັນປົກກະຕິ ພ້ອມດຽວກັນ ຫ້ອງການສຶກສາທິການ ແລະ ກິລາ ເມືອງສີໂຄດຕະບອງ ໄດ້ສືບຕໍ່ສຸມທຸກຊັບພະຍາກອນທີີ່ມີຢ່າງຈໍາກັດເຂົ້າໃສ່ການສົ່ງເສີມການເຂົ້າຮຽນໃນທຸກຊັ້ນທຸກສາຍ, ລະດົມນັກຮຽນທີີ່ປະລະ ແລະ ມີແນວໂນ້ມທີີ່ຈະປະລະການຮຽນໃຫ້ມາສືບຕໍ່ຮຽນ, ພ້ອມທັງໄດ້ສຸມງົບປະມານເຂົ້າໃນການຝຶກອົບຮົມຄູສອນ ແລະ ສະໜອງອຸບປະກອນຮັບໃຊ້ການສິດ ສອນ ເພື່ອແນໃສ່ການປັບປຸງຄຸນນະພາບການສຶກສາໃນທຸກຊັ້ນທຸກສາຍ. ພ້ອມດຽວກັນນັ້ນ, ໄດ້ພະຍາຍາມຍົກສູງ ປະສິດທິພາບໃນການຄຸ້ມຄອງບໍລິຫານ ໂດຍສະເພາະການຈັດສັນ ແລະ ສັບຊ້ອນຄູໃຫ້ມີຄວາມສະເໝີພາບ ແລະ ເທົ່າທຽມຫຼາຍຂຶ້ນ, ປັບປຸງການຄຸ້ມຄອງ ແລະ ນໍາໃຊ້ງົບປະມານລວມທັງໄດ້ດຸ່ນດ່ຽງງົບປະມານຂັ້ນສູນກາງລົງໄປໃຫ້ຂັ້ນທ້ອງຖິີ່ນ ເພື່ອຮັບໃຊ້ເຂົ້າໃນວຽກງານປັບປຸງຄຸນນະພາບ ແລະ ວຽກງານຕິດຕາມ ແລະ ກວດກາການສຶກສາ ອັນເຮັດໃຫ້ມີຫຼາຍຕົວຊີ້ບອກສາມາດບັນລຸໄດ້ລື່ນຄາດໝາຍ ແລະ ປະຕິບັດໄດ້ດີກວ່າປີຜ່ານມາ.

ຜ່ານການຈັດຕັ້ງປະຕິບັດວຽກງານຈຸດສຸມ ແລະ ຍຸດທະສາດຕ່າງໆຂອງຫ້ອງການສຶກສາທິການ ແລະ ກິລາເມືອງ ທີ່ກໍານົດໃນສົກຮຽນ 2021-2022 ເຫັນໄດ້ວ່າ ໃນຈໍານວນ 18 ຄາດໝາຍຫຼັກທີ່ກໍານົດໃນແຜນມີ 6 ຄາດໝາຍທີ່ບັນລຸຕາມແຜນ ຄື: ອັດຕາເຂົ້າຮຽນສຸດທິຊັ້ນປະຖົມເພີ່ມຈາກ 99,74% ມາເປັນ 100,07% ທຽບໃສ່ສົກຮຽນຜ່ານມາແມ່ນເພີ່ມຂຶ້ນ 0,33% (ຄາດໝາຍສະພານະຄອນຫຼວງ 100%); ອັດຕາເຂົ້າຮຽນລວມຊັ້ນ ມ.ປາຍ ເພີ່ມຈາກ 86% ມາເປັນ 88,4% ທຽບໃສ່ສົກຮຽນຜ່ານມາແມ່ນເພີ່ມຂຶ້ນ 2,4% (ຄາດໝາຍສະພານະຄອນຫຼວງ 87%); ອັດຕາເຂົ້າຮຽນລວມໃໝ່ ປ.5 ປະຕິບັດໄດ້ 100% ທຽບໃສ່ສົກຮຽນຜ່ານມາ ແມ່ນຊໍ່າເກົ່າ (ຄາດໝາຍສະພານະຄອນຫຼວງ 100%); ອັດຕາເຂົ້າຮຽນລວມໃໝ່ ມ.4 ເພີ່ມຈາກ 92,1% ມາເປັນ 95% ທຽບໃສ່ສົກຮຽນຜ່ານມາແມ່ນເພີ່ມຂຶ້ນ 2,9% (ຄາດໝາຍສະພານະຄອນຫຼວງ 92%); ອັດຕາປະລະ ປ.1 ຫຼຸດລົງຈາກ 5,39% ມາເປັນ 0% ທຽບໃສ່ສົກຮຽນຜ່ານມາແມ່ນຫຼຸດລົງ 5,39% (ຄາດໝາຍສະພານະຄອນຫຼວງ 3%) ແລະ ສູ້ຊົນໃຫ້ພົນລະເມືອງໃນເກນອາຍຸເຂົ້າຮຽນຈົບມັດທະຍົມຕອນຕົ້ນໄດ້ຮຽນພາສາສາກົນຢ່າງໜ້ອຍ 1 ພາສາ ນັບແຕ່ ປ.3 ຂຶ້ນໄປ 100% ແລະ 60% ຂອງນັກຮຽນມັດທະຍົມໄດ້ຮຽນຄອມພິວເຕີ. ພ້ອມດຽວກັນນັ້ນ, ປະຊາກອນໃນເກນອາຍຸຮຽນໄດ້ຮຽນບຳລຸງຈົບ ມ.ປາຍ ໂດຍພື້ນຖານ ສຳລັບການສຶກສານອກໂຮງຮຽນ.

ສະເພາະຄາດໝາຍທີ່ໃກ້ຈະບັນລຸມີ 4 ຄາດໝາຍ ປະກອບມີ ອັດຕາເຂົ້າຮຽນຂອງເດັກ 5 ປີ ເພີ່ມຈາກ 96,04% ມາເປັນ 97,98% ທຽບໃສ່ສົກຮຽນຜ່ານມາແມ່ນເພີ່ມຂຶ້ນ 1,94% (ຄາດໝາຍສະພານະຄອນຫຼວງ 98,5%); ອັດຕາລອດເຫຼືອຊັ້ນປະຖົມຮອດ ປ.5 ເພີ່ມຈາກ 86,69% ມາເປັນ 92,80% ທຽບໃສ່ສົກຮຽນຜ່ານມາແມ່ນເພີ່ມຂຶ້ນ 6,11% (ຄາດໝາຍສະພານະຄອນຫຼວງ 95,5%); ອັດຕາປະລະຊັ້ນປະຖົມ ຫຼຸດລົງຈາກ 2,96% ມາເປັນ 1,81% ທຽບໃສ່ສົກຮຽນຜ່ານມາແມ່ນຫຼຸດລົງ 1,15% (ຄາດໝາຍສະພານະຄອນຫຼວງ 1,2%) ແລະ ອັດຕາເຂົ້າຮຽນລວມ ມ.ຕົ້ນ ເພີ່ມຈາກ 98,7% ມາເປັນ 99,5% ທຽບໃສ່ສົກຮຽນຜ່ານມາແມ່ນເພີ່ມຂຶ້ນ 0,8% (ຄາດໝາຍສະພານະຄອນຫຼວງ 100%)

ສ່ວນ 7 ຄາດໝາຍທີ່ບໍ່ບັນລຸ ປະກອບມີ ອັດຕາຄ້າງຫ້ອງ ປ.1; ອັດຕາຄ້າງຫ້ອງຊັ້ນປະຖົມ; ອັດຕາປະລະຊັ້ນ ມ.ຕົ້ນ; ອັດຕາປະລະຊັ້ນ ມ.ປາຍ; ສົ່ງເສີມໃຫ້ນັກຮຽນທີ່ຮຽນຈົບຊັ້ນມັດທະຍົມຕອນຕົ້ນໄດ້ເຂົ້າຮຽນສາຍອະຊີວະໃຫ້ໄດ້ 5%, ສ່ວນທີ່ເຫຼືອໃຫ້ເຂົ້າຮຽນຕໍ່ຊັ້ນ ມ.ປາຍ ແລະ ນັກຮຽນທີ່ຮຽນຈົບ ມ.ປາຍ ໃຫ້ເຂົ້າຮຽນໃນລະດັບຕ່າງໆ; ສືບຕໍ່ຈັດບຳລຸງລົບລ້າງຄວາມບໍ່ຮູ້ໜັງສືໃຫ້ປະຊາກອນອາຍຸ 15-40 ປີໃຫ້ໄດ້ 100 ຄົນ, ບໍາລຸງຍົກລະດັບ ມ.ຕົ້ນ ໃນເກນອາຍຸ 15-35 ປີ ຜູ້ທີ່ໄດ້ປະລະການຮຽນ ແລະ ຍົກຍ້າຍມາຢູ່ໃໝ່ໃຫ້ໄດ້ 100 ຄົນ, ບໍາລຸງຍົກລະດັບ ມ.ປາຍໃຫ້ປະຊາຊົນ ໃຫ້ໄດ້ 100 ຄົນ; ສົ່ງເສີມມວນຊົນທຸກເພດທຸກໄວເຂົ້າຮ່ວມຫັດກາຍະບໍລິຫານ, ການອອກກຳລັງກາຍ ແລະ ການຫຼິ້ນກິລາກາຍະກຳ.

ສຳລັບວຽກຈຸດສຸມໃນສົກຮຽນ 2023-2024 ແມ່ນສືບຕໍ່ຂະຫຍາຍຫ້ອງກຽມປະຖົມຢ່າງມີຈຸດສຸມ ພ້ອມຮັບປະກັນສະໜອງຄູສອນໃຫ້ສອດຄ່ອງກັບມາດຕະຖານການຈັດສັນຄູພາຍໃນເມືອງ; ພັດທະນາມາດຕະຖານຂັ້ນພື້ນຖານ ສຳລັບການສຶກສາກ່ອນໄວຮຽນ ເພື່ອແນໃສ່ປັບປຸງຄຸນນະພາບຂອງການບໍລິການ; ສືບຕໍ່ສົ່ງເສີມວຽກງານໂພຊະນາການ ແລະ ສຸຂະອະນາໄມໃນໂຮງຮຽນ; ສ້າງຄວາມເຂັ້ມແຂງໃຫ້ຜູ້ອຳນວຍການໂຮງຮຽນ ໃນການຄຸ້ມຄອງໂຮງຮຽນ ແລະ ຝຶກອົບຮົມໃຫ່ແກ່ຄູສອນ/ຜູ້ດູແລເດັກໃຫ້ມີຄວາມຮູ້ ແລະ ຄວາມສາມາດຕາມມາດຕະຖານທີ່ກຳນົດ;ສືບຕໍ່ຈັດຕັ້ງປະຕິບັດຫຼັກສູດໃໝ່ໃຫ້ທົ່ວເຖິງ ພ້ອມສະໜອງອຸປະກອນຮັບໃຊ້ການຮຽນການສອນ; ສຸມໃສ່ການສອນພາສາລາວ ແລະ ຄະນິດສາດ ໃນຂັ້ນ ປ.1 ແລະ ປ.2 ເພື່ອຮັບປະກັນໃຫ້ນັກຮຽນອ່ານອອກ ແລະ ຄິດໄລ່ເລກພື້ນຖານເປັນຕາມມາດຕະຖານຂອງຫຼັກສູດ; ປັບປຸງ ແລະ ສ້າງຄວາມເຂັ້ມແຂງໃຫ້ລະບົບນິເທດພາຍໃນ, ລວມທັງສ້າງຄວາມເຂັ້ມແຂງໃຫ້ກຸ່ມໂຮງຮຽນ; ຈັດຕັ້ງປະຕິບັດມາດຕະຖານຄຸນນະພາບຂັ້ນພື້ນຖານຂອງການສຶກສາຊັ້ນປະຖົມໃຫ້ປະກົດຜົນເປັນຈິງ; ປັບປຸງລະບົບການສອບເສັງເລື່ອນຂັ້ນ ແລະ ຈົບຊັ້ນໃຫ້ມີຄຸນນະພາບ, ສ້າງຄວາມເຂັ້ມແຂງໃຫ້ແກ່ວຽກງານການປະເມີນຜົນການຮຽນຂອງນັກຮຽນໃນຫ້ອງ, ພ້ອມທັງດຳເນີນການປະເມີນຢ່າງເປັນປົກກະຕິ.

ນອກຈາກນີ້, ໃນກອງປະຊຸມ ຍັງໄດ້ມີການປະກອບຄຳເຫັນໃສ່ບົດສະຫຼຸບ ແລະ ແຜນພັດທະນາການສຶກສາ; ຮັບຟັງການໂອ້ລົມຈາກການນຳ ພະແນກສຶກສາທິການ ແລະ ກິລາ ນະຄອນຫຼວງວຽງຈັນ; ລາຍງານຫຍໍ້ການປະຕິບັດວຽກງານພາຍໃນໜ່ວຍງານການສຶກສາກ່ອນໄວຮຽນ; ການປະຕິບັດວຽກງານພາຍໃນໜ່ວຍງານການສຶກສາພາກບັງຄັບ; ການປະຕິບັດວຽກງານພາຍໃນໜ່ວຍງານພັດທະນາຄູ; ຜ່ານມະຕິກອງປະຊຸມຜູ້ບໍລິຫານການສຶກສາ-ກິລາຂອງພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ລາຍງານຫຍໍ້ ການເຜີຍແຜ່ບັນດານິຕິກຳ, ການປະຕິບັດວຽກງານ ແລະ ການສິດສອນຂອງຄູ; ການປະຕິບັດວຽກງານພາຍໃນໜ່ວຍງານພະລະ-ສິລະປະ ສຶກສາ; ການປະຕິບັດວຽກງານພາຍໃນໜ່ວຍງານກວດກາປະເມີນຜົນ ແລະ ປະກັນຄຸນນະພາບ; ລາຍງານກ່ຽວກັບຫົວຂໍ້: ສອນດີ-ຮຽນເກັ່ງ ເລັ່ງພັດທະນາຊັບພະຍາກອນມະນຸດສູ່ຄຸນນະພາບໃໝ່; ລາຍງານກ່ຽວກັບຫົວຂໍ້: ການສ້າງໂຮງຮຽນຂຽວສະອາດ ແລະ ສິ່ງແວດລ້ອມດີ; ລາຍງານກ່ຽວກັບວາລະແຫ່ງຊາດ ການຕ້ານ ແລະ ສະກັດກັ້ນຢາເສບຕິດໃນໂຮງຮຽນ; ລາຍງານກ່ຽວກັບວຽກງານ 5 ຫຼັກມູນການສຶກສາ ພາຍໃຕ້ຫົວຂໍ້: ຄຸນສົມບັດສຶກສາ; ລາຍງານກ່ຽວກັບຜົນງານການຈັດຕັ້ງປະຕິບັດວຽກງານກິລາ-ສິລະປະພາຍໃນໂຮງຮຽນ; ກຸ່ມເກົ້າລ້ຽວ ລາຍງານຜົນການຈັດຕັ້ງປະຕິບັດວຽກງານກຸ່ມໂຮງຮຽນປະຖົມສຶກສາ ແລະ ກຸ່ມສີໄຄ ລາຍງານຜົນການຈັດຕັ້ງປະຕິບັດວຽກງານກຸ່ມໂຮງຮຽນ ມັດທະຍົມສຶກສາ.

ໃນໂອກາດດັ່ງກ່າວນີ້, ທ່ານ ເຈົ້າເມືອງສີໂຄດຕະບອງ ໄດ້ກ່າວ​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ຂະ​ແໜງ​ການ​ສຶກສາ​ ກໍ​ຄືຜູ້ບໍລິຫານການສຶກສາ, ​ຄູອາຈານ​ທົ່ວ​ເມືອງ​ ແລະ ທຸກ​ພາກສ່ວນ​ທີ່​ກ່ຽວຂ້ອງ​ ທີ່​ໄດ້​ພ້ອມ​ກັນ​ປະຕິບັດ​ແຜນ​ພັດທະນາ​ການ​ສຶກສາ​ ປະຈຳ​ສົກ​ຮຽນ 2022-2023 ​ຊຶ່ງ​ໄດ້​ຮັບ​ຜົນສຳ​ເລັດ​ຕາມ​ລະດັບ​ຄາດໝາຍ​ທີ່​ວາງ​ໄວ້. ເຖິງ​ວ່າການ​ສຶກສາ​ຢູ່​ພາຍ​ໃນ​ເມືອງໄດ້​ປະສົບ​ຜົນສຳ​ເລັດ​ໃນ​ຫຼາຍ​ດ້ານ​ກໍຕາມ ​ແຕ່​ພວກ​ເຮົາຍັງ​ປະຕິ​ເສດ​ບໍ່​ໄດ້ຕໍ່​ກັບ​ບັນດາ​ຈຸດ​ອ່ອນ ​ແລະ ຂໍ້ຄົງ​ຄ້າງ​, ສິ່ງທ້າທາຍຈໍານວນ​ໜຶ່ງ  ທີ່​ຈະ​ຕ້ອງ​ໄດ້​ສືບຕໍ່​ສຸມໃສ່ວຽກງານຈຸດສຸມ ເພື່ອແກ້​ໄຂ​ປັບປຸງ ເປັນຕົ້ນແມ່ນ ການ​ຈັດການ​ຮຽນ ​ການ​ສອນ ​ແລະ ການ​ສອບ​ເສັງ​ເລື່ອນ​ຂັ້ນ ​ແລະ ຈົບ​ຊັ້ນ ຍັງ​ຈະ​ຕ້ອງ​ໄດ້ເຂັ້ມຂຸ້ນ​ຂຶ້ນ​ຕື່ມ ໂດຍສະເພາະ​ດ້ານ​ຄຸນ​ນະພາ​ບການສຶກສາຍັງ​ບໍ່​ທັນ​ດີ​ເທົ່າ​ທີ່​ຄວນ, ນັກຮຽນ​ຈຳນວນ​ໜຶ່ງຍັງ​ຂາດ​ຄຸນສົມບັດ​ສິນ​ທຳ​ປະຕິວັດ,  ນັກຮຽນ​ຈຳນວນ​ໜຶ່ງ​ມີ​ຄວາມ​ຮູ້​ແລ້ວ   ​ແຕ່​ບໍ່​ສາມາດກ້າ​ສະ​ແດງ​ອອກ, ອີກ​ຈຳນວນ​ໜຶ່ງ​ແມ່ນ​ຂາດ​ລະບຽບ​ວິ​ໄນ; ຄວາມ​ຮູ້, ຄວາມ​ສາມາດ​ຂອງ​ຄູອາຈານຈຳນວນ​ໜຶ່ງ​ຍັງ​ຈຳກັດ ຫົວຄິດ​ປະດິດ​ສ້າງຍັງ​ບໍ່​ທັນ​ກວ້າງ​ຂວາງ, ການ​ຈັດການ​ຮຽນການ​ສອນ ຄູອາຈານຕ້ອງໄດ້ເອົາໃຈໃສ່ໃນການຄົ້ນຄວ້າຫຼັກສູດໃໝ່ໆ ຍັງບໍ່ທັນມີຄວາມຮູ້ປະສົບການ ​ຕ້ອງໄດ້ເອົາໃຈໃສ່ຄົ້້ນຄວ້າຮໍ່າຮຽນຢ່າງທົ່ວເຖິງ ແລະ ເລິກເຊິ່ງ ຊ່ວຍສົ່ງເສີມ ແລະ ພັດທະນາແນວຄວາມຄິດ ຈິດຕະສາດ​ຂອງ​ຜູ້​ຮຽນ ​ໂດຍ​ສະ​ເພາະ​ແມ່ນຊັ້ນ​ມັດທະຍົມ. ຄຽງ​ຄູ່​ກັນ​ນັ້ນ, ການ​ຈັດການ​ຮຽນການ​ສອນ​ ຕ້ອງ​ໃຫ້​ບັນລຸ​ໄດ້ 3 ຂໍ້ແຂ່ງຂັນ 5 ຫຼັກ​ມູນຂອງ​ການສຶກສາ. ສໍາລັບຜູ້ບໍລິຫານຍິ່ງມີຄວາມຈໍາເປັນໃນການພັດທະນາແບບແຜນວິທີເຮັດວຽກຕາມ 7 ໜ້າວຽກຂອງຜູ້ບໍລິຫານ ໂດຍເນັ້ນໃສ່ວຽກວິຊາການເປັນຫຼັກ ອັນ​ທີ່​ຕ້ອງ​ໄດ້​ເອົາ​ໃຈ​ໃສ່ຕື່ມ​ອີກ​ ແມ່ນການ​ສຶກສາ​ແນວຄິດຄູອາຈານ ແລະ ນ້ອງນັກຮຽນ ລະຫວ່າງ​ໂຮງຮຽນ, ຄອບຄົວ ແລະ ສັງຄົມ ຊຶ່ງ​ຜ່ານ​ມາ​ແມ່ນ​ຍັງ​ຖືເບົາ ປະຕິ​ບັດໄດ້ດ້ານທິດສະດີ ການປະຕິບັດຕົວຈິງຍັງບໍ່ທັນ​ໄດ້ດີເທົ່າທີ່ຄວນ. ພ້ອມກັນນີ້, ຍັງ​ມີພໍ່​ແມ່ຜູ້ປົກຄອງນັກຮຽນ​ຈຳນວນ​ໜ້ອຍໜຶ່ງ ​ຍັງຂາດ​ການຕິດຕາມການຮຽນການສອນ ການສຶກສາ​ອົບຮົມແນວຄິດລູກ​ຫຼານ​ຂອງ​ຕົນໃຫ້ຫຼີກລ່ຽງບັນຫາປະກົດການຫຍໍ້ທໍ້ ໂດຍສະເພາະບັນຫາສິ່ງເສບຕິດຕ່າງໆ. ນອກຈາກນີ້, ທ່ານ ເຈົ້າເມືອງຍັງເຊື່ອ​ໝັ້ນວ່າ ພິທີໄຂສົກຮຽນໃໝ່ ເມືອງສີໂຄດຕະບອງ ສົກຮຽນ 2023-2024 ​ໃຫ້ນໍາເອົາເນື້ອໃນຈິດໃຈບັນຫາສິ່ງທ້າທາຍ ຂໍ້ຄົງຄ້າງ ການສະຫຼຸບຖອດຖອນບົດຮຽນ ໃນການວາງແຜນດຳ​ເນີນແຜນພັດທະນາການສຶກສາ ໃນສົກຮຽນ 2023-2024 ໃຫ້ມີຄຸນພະພາບ ທຽບທັນປະເທດເພື່ອນບ້ານ ແລະ ສາກົນ ແລະ ມີ​ຜົນສຳ​ເລັດຢ່າງ​ຈົບງາມ.

ໂດຍ ດາວຫວຽດ

ຂ່າວ​ທີ່​ກ່ຽວ​ຂ້ອງ