ພິທີມອບ-ຮັບ ໂຄງການກໍ່ສ້າງ ໂຮງຮຽນມັດທະຍົມສົມບູນ (ມສ) ນາຊາຍທອງ ຊຶ່ງແມ່ນທຶນຊ່ວຍເຫຼືອລ້າຈາກລັດຖະບານ ສປ ຈີນ ໄດ້ຈັດຂຶ້ນໃນວັນທີ 22 ພະ​ຈິກ 2023 ທີ່ໂຮງຮຽນດັ່ງກ່າວ ເມືອງນາຊາຍທອງ ນະຄອນຫຼວງວຽງຈັນໂດຍເປັນກຽດເຂົ້າຮ່ວມຂອງທ່ານ ອາດ​ສະ​ພັງ​ທອງ ສີ​ພັນ​ດອນ ເຈົ້າ​ຄອງນະ​ຄອນຫຼວງວຽງ​ຈັນ, ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ຫວາງ ສ້າງ ອຸ​ປະ​ທູດ​ຊົ່ວ​ຄາວ ສະ​ຖານ​ເອກ​ອັກ​ຄະ​ລັດ​ຖະ​ທູດ​ແຫ່ງ ສປ ​ຈີນ ປະ​ຈຳ ສປປ ລາວ, ພ້ອມດ້ວຍຮອງເຈົ້າ​ຄອງນະ​ຄອນຫຼວງວຽງ​ຈັນ, ພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຄະນະຜູ້ແທນທັງສອງຝ່າຍ ລາວ-ຈີນ ແລະ ແຂກຖືກເຊີນຢ່າງຫຼວງຫຼາຍ.

ໃນພິທີ, ທ່ານ ຈ້າວ ເວີນ​ຍູ ທີ່​ປຶກ​ສາ​ທູດ​ເສດ​ຖະ​ກິດ ແລະ ການ​ຄ້າ ​ສະ​ຖານ​ທູດ ສປ ​ຈີນ ປະ​ຈຳ​ ສປປ ລາວ ໄດ້ກ່າວວ່າ: ໂຄງການກໍ່ສ້າງ ໂຮງຮຽນ ມສ ນາ​ຊາຍ​ທອງ ນອນຢູ່ໃນໂຄງການ 10 ແຫ່ງທີ່ການນຳຂັ້ນສູງສຸດຂອງສອງປະເທດ ລາວ-ຈີນໄດ້ຕົກລົງເອກະພາບກັນໃນປີ 2016 ຊຶ່ງເປັນໂຄງການບູລິມະສິດທີ່ສຳຄັນໜຶ່ງໃນການພັດທະນາຊັບພະຍາກອນມະນຸດຂອງ ສປປ ລາວ ກໍຄື ການຮ່ວມມືລະຫວ່າງສອງປະເທດ ລາວ-ຈີນ ເປັນທຶນຊ່ວຍເຫຼືອລ້າຈາກລັດຖະບານແຫ່ງ ສປ ຈີນ ໂດຍໄດ້ມີການລົງນາມສັນຍາການຈັດຕັ້ງປະຕິບັດໂຄງການຊ່ວຍເຫຼືອໃນວັນທີ 4 ກັນ​ຍາ 2019 ລວມມູນຄ່າກໍ່ສ້າງທັງໜົດ 126.100.000 ຢວນ, ມີເນື້ອທີ່ທັງໜົດ 11.480 ຕາແມັດ ຊຶ່ງໄດ້ເລີ່ມກໍ່ສ້າງມາແຕ່ວັນທີ 28 ກຸມ​ພາ 2021 ແລະ ສຳເລັດ 31 ສິງ​ຫາ 2023, ປະກອບມີ ອາຄານຮຽນ, ຫ້ອງຮຽນ, ຫ້ອງຄູອາຈານ, ຫ້ອງຄອມພິວເຕີ, ຫ້ອງທົດລອງ, ຫ້ອງສະມຸດ, ຫ້ອງປະຊຸມ ແລະ ເດີ່ນ​ເຕະ​ບານ.

ພ້ອມດຽວກັນນັ້ນ, ທ່ານ ຫວາງ ສ້າງ ອຸ​ປະ​ທູດ​ຊົ່ວ​ຄາວ ສະ​ຖານ​ເອກ​ອັກ​ຄະ​ລັດ​ຖະ​ທູດ​ແຫ່ງ ສປ ​ຈີນ ປະ​ຈຳ ສປປ ​ລາວ ໄດ້ມອບຢ່າງເປັນທາງການ ແລະ ຕາງໜ້າລັດຖະບານແຫ່ງ ສປປ ລາວ ຮັບໂດຍທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມທັງກ່າວວ່າ: ໂຄງການກໍ່ສ້າງ ໂຮງຮຽນ ມສ ນາ​ຊາຍທອງ ແມ່ນໂຄງການໜຶ່ງທີ່ລັດຖະບານແຫ່ງ ສປ ຈີນ ໃຫ້ການຊ່ວຍເຫຼືອແກ່ ສປປ ລາວ ທີ່ສະແດງໃຫ້ເຫັນເຖິງນໍ້າໃຈໄມຕີຈິດໃຫ້ກັບພັກ, ລັດ ແລະ ປະຊາຊົນລາວ ໂດຍສະເພາະຊາວນະຄອນຫຼວງວຽງຈັນ. ໃນການຊ່ວຍເຫຼືອກໍ່ສ້າງໂຮງຮຽນຫຼັງນີ້, ຖືເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ເວົ້າລວມ, ເວົ້າສະເພາະແມ່ນການພັດທະນາພື້ນຖານໂຄງລ່າງຂອງຂະແໜງການສຶກສາ ແລະ ພັດທະນາຊັບພະຍາກອນມະນຸດຂອງ ສປປ ລາວ ໃຫ້ມີຄວາມເຂັ້ມແຂງ.

ພ້ອມດຽວກັນນັ້ນ, ເປັນສັນຍາລັກແຫ່ງສາຍພົວພັນອັນເປັນມູນເຊື້ອລາວ-ຈີນ, ການຮ່ວມມືແບບເພື່ອນມິດຍຸດທະສາດຮອບດ້ານ, ໜັ້ນຄົງຍາວນານຕາມທິດ 4 ດີ ຄື: ບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມື ແລະ ຄູ່ຮ່ວມສະຕາກຳລາວ-ຈີນ ແລະ ໃນຕອນທ້າຍ, ທ່ານ ໄດ້ຕາງໜ້າລັດຖະບານແຫ່ງ ສປປ ລາວ ກ່າວສະແດງຄວາມຂອບໃຈ ແລະ ຮູ້ບຸນຄຸນຕໍ່ພັກ, ລັດ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ແລະ ສຸມທຸກເຫື່ອແຮງເຂົ້າໃນການຈັດຕັ້ງປະຕິບັດໂຄງການດັ່ງກ່າວຈົນມີຜົນສຳເລັດຢ່າງຈົບງາມ.

ໂດຍ: ສີ​ວອນ ສຶກສາ-ກິລາ ນວ

ຂ່າວ​ທີ່​ກ່ຽວ​ຂ້ອງ