ໃນວັນທີ 8 ກັນຍາ 2026, ທ່ານ ຮສ.ປອ ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ ໂຮງຮຽນເຕັກນິກ-ວິຊາຊີບແບບປະສົມ ແຂວງສາລະວັນ ໃຫ້ການຕ້ອນຮັບຢ່າງອົບອຸ່ນໂດຍ ທ່ານ ແຫວນເພັດ ລັດດາວົງ ຮອງປະທານຄະນະກໍາມະການປົກຄອງແຂວງ, ຜູ້ຊີ້ນໍາວຽກງານວັດທະນະທໍາ-ສັງຄົມ, ທ່ານ ສຸນີ ນາມມະບົວລີ ຫົວໜ້າພະແນກສຶກສາທິການ ແລະ ກິລາ ແຂວງສາລະວັນ, ພ້ອມດ້ວຍຄະນະພັກ, ຄະນະນໍາ, ຄະນະອໍານວຍການໂຮງຮຽນ, ພະນັກງານຄູ-ອາຈານ ແລະ ພາກສ່ວນທີ່ກ່ຽວຂ້ອງ.

ໃນໂອກາດນີ້, ທ່ານ ສິດທິເດດ ຈັນທະບຸດດີ ຜູ້ອໍານວຍການໂຮງຮຽນເຕັກນິກ-ວິຊາຊີບແບບປະສົມ ແຂວງສາລະວັນ ໄດ້ລາຍງານສະພາບການເຄື່ອນໄຫວ ແລະ ການຈັດການຮຽນ-ການສອນໃຫ້ຮູ້ວ່າ: ໂຮງຮຽນເຕັກນິກ-ວິຊາຊີບແບບປະສົມ ແຂວງສາລະວັນ ແມ່ນສະຖາບັນອາຊີວະສຶກສາທີ່ຂຶ້ນກັບການຄຸ້ມຄອງຂອງ ພະແນກສຶກສາທິການ ແລະ ກິລາ ແຂວງສາລະວັນ ແລະ ກົມອາຊີວະສຶກສາ ກະຊວງສຶກສາທິການ ແລະ ກິລາ. ໂຮງຮຽນມີເນື້ອທີ່ທັງໝົດ 7,5 ເຮັກຕາ, ປະກອບມີ 7 ພະແນກ (3 ພະແນກບໍລິຫານ ແລະ 4 ພະແນກວິຊາສະເພາະ), ມີພະນັກງານຄູ-ອາຈານ 50 ທ່ານ. ປັດຈຸບັນ ມີນັກຮຽນທັງໝົດ 442 ຄົນ (ຍິງ 140 ຄົນ, ສຳເລັດການສຶກສາແລ້ວ 198 ຄົນ), ນອກນີ້ ເປັນນັກຮຽນສາມັນວິຊາຊີບ (ມ.5) 104 ຄົນ ແລະ ຢູ່ລະຫວ່າງການຮັບສະໝັກນັກຮຽນປີ 1 (ປັດຈຸບັນຮັບໄດ້ 22 ຄົນ).

ສໍາລັບການຈັດການຮຽນ-ການສອນ ໄດ້ເປີດສອນ 5 ລະດັບ (ຊັ້ນຕົ້ນ C1-C3, ຊັ້ນກາງ 9+3/12+2, ແລະ ຊັ້ນສູງຕໍ່ເນື່ອງ 12+2+1) ໃນ 4 ຂົງເຂດ ngành/ສາຂາ ຫຼັກ ໄດ້ແກ່: ປູກຝັງ ແລະ ລ້ຽງສັດ; ຊ່າງກໍ່ສ້າງ, ໄຟຟ້າ, ລົດຈັກ/ລົດຍົນ, ໄມ້/ເຊື່ອມໂລຫະ; ຄະຫະກຳ (ຕັດຫຍິບ, ປຸງແຕ່ງອາຫານ/ໂຮງແຮມ). ຊຶ່ງຮູບແບບການຮຽນ-ການສອນ ແມ່ນເນັ້ນໃສ່ສະມັດຖະພາບ (ຮຽນຢູ່ໂຮງຮຽນ ຄວບຄູ່ກັບການຝຶກງານຢູ່ສະຖານປະກອບການ), ການຮຽນແບບຄູ່ຂະໜານ (ສາມັນ 3 ວັນ / ວິຊາຊີບ 2 ວັນ) ແລະ ຮູບແບບປະສົມປະສານ. ນອກຈາກນີ້, ຍັງໄດ້ຈັດຝຶກອົບຮົມວິຊາຊີບໄລຍະສັ້ນໃຫ້ແກ່ປະຊາຊົນໃນ 8 ຕົວເມືອງທົ່ວແຂວງ.

ຍ້ອນຂັ້ນເທິງໃຫ້ຄວາມສຳຄັນ ແລະ ມີການປັບປຸງຫຼັກສູດໃໝ່, ໂຮງຮຽນຈຶ່ງໄດ້ຮັບການສະໜັບສະໜູນດ້ານເບ້ຍລ້ຽງ, ອຸປະກອນ, ການພັດທະນາຄູ ແລະ ງົບປະມານຈາກຫຼາຍໂຄງການ ເຊັ່ນ: VTESS, VEFF, VELA3, EESDP, GLAD ແລະ ບໍລິສັດ ອາຊີ-ໂປຕາສ. ພ້ອມທັງມີການຮ່ວມມືຢ່າງດີກັບສະຖານປະກອບການ ເຮັດໃຫ້ນັກຮຽນມີທັກສະຝີມືດີ ແລະ ມີອາຊີບຮອງຮັບຫຼັງຈົບການສຶກສາ. ເຖິງຢ່າງໃດກໍຕາມ, ທາງໂຮງຮຽນຍັງພົບສິ່ງທ້າທາຍ ເຊັ່ນ: ສັງຄົມ ແລະ ຊາວໜຸ່ມຍັງບໍ່ທັນໃຫ້ຄວາມສຳຄັນຕໍ່ການຮຽນອາຊີວະສຶກສາເທົ່າທີ່ຄວນ; ການໂຄສະນາແນະນຳອາຊີບຍັງບໍ່ທັນກວ້າງຂວາງ; ຕະຫຼາດແຮງງານ ແລະ ຄ່າຕອບແທນ/ສະຫວັດດີການ ຍັງບໍ່ທັນຕອບສະໜອງຄວາມຕ້ອງການ; ພື້ນຖານໂຄງລ່າງ ແລະ ເຄື່ອງຈັກອຸປະກອນຍັງຢູ່ຂັ້ນພື້ນຖານ; ລວມທັງນັກຮຽນບາງສ່ວນຂາດຄວາມກະຕືລືລົ້ນ ແລະ ຂາດຮຽນ.

ໃນໂອກາດດັ່ງກ່າວ, ທ່ານ ຮສ.ປອ ທອງສະລິດ ມັງໜໍ່ເມກ ໄດ້ໃຫ້ຮູ້ວ່າ: ການລົງມາເຄື່ອນໄຫວຢ້ຽມຢາມໃນຄັ້ງນີ້ ແມ່ນເພື່ອເກັບກຳສະພາບລວມດ້ານການສຶກສາ, ຊຸກຍູ້ການໄຂສົກຮຽນໃໝ່ ແລະ ຕິດຕາມສະພາບການສຶກສາໃນແຕ່ລະທ້ອງຖິ່ນ. ພ້ອມກັນນັ້ນ, ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ໂຮງຮຽນຍາດມາໄດ້ ແລະ ເນັ້ນໃຫ້ທຸກພາກສ່ວນສືບຕໍ່ເອົາໃຈໃສ່ສະໜັບສະໜູນການຮຽນວິຊາຊີບ ເພາະ “ຮຽນຈົບແລ້ວ ມີວຽກເຮັດງານທຳທັນທີ”. ນອກຈາກນີ້ ຍັງໄດ້ເນັ້ນໃສ່ການປັບປຸງລະບຽບການໃນສະຖາບັນການສຶກສາ ແລະ ຂໍໃຫ້ທຸກຝ່າຍສືບຕໍ່ຈັດຕັ້ງປະຕິບັດແຜນງານທີ່ວາງໄວ້ໃຫ້ປະກົດຜົນເປັນຮູບປະທຳ ເພື່ອສ້າງຜົນສໍາເລັດທີ່ຍິ່ງໃຫຍ່ກວ່າເກົ່າ.