ກອງທຶນພັດທະນາວິທະຍາສາດ ແລະ ເຕັກໂນໂລຊີ (ກພວຕ), ກະຊວງສຶກສາທິການ ແລະ ກິລາ ໄດ້ຈັດກອງປະຊຸມຕິດຕາມ, ກວດກາ ແລະ ປະເມີນຜົນ ການຈັດຕັ້ງປະຕິບັດຫົວຂໍ້ຄົ້ນຄວ້າວິທະຍາສາດ ຂອງ ປີ 2023 ໃນລະຫວ່າງວັນທີ 6-7 ສິງຫາ 2026 ຢູ່ທີ່ຫ້ອງປະຊຸມກອງທຶນພັດທະນາວິທະຍາສາດ ແລະ ເຕັກໂນໂລຊີ, ໂດຍການເປັນປະທານຂອງ ທ່ານ ສຸດທິພົງ ວົງໄຊຍາ ຮອງຫົວໜ້າກອງເລຂາກອງທຶນ, ຮອງຫົວໜ້າຫ້ອງການສະພາວິທະຍາສາດແຫ່ງຊາດ, ມີບັນດາຮອງຫົວໜ້າຫ້ອງການ, ຄະນະກຳມະການວິຊາການ ຕິດຕາມ, ກວດກາ ແລະ ປະເມີນຜົນຫົວຂໍ້ຄົ້ນຄວ້າວິທະຍາສາດ, ກອງເລຂາຊ່ວຍວຽກກກອງທຶນ, ຫົວໜ້າຫົວຂໍ້ ແລະ ທີມງານຄົ້ນຄວ້າ ທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້, ຈັດຂຶ້ນເພື່ອປະເມີນຄວາມຖືກຕ້ອງ, ຄວາມສອດຄ່ອງຕາມແຜນການ, ຄວາມໂປ່ງໃສ ແລະ ຮັບປະກັນການນໍາໃຊ້ງົບປະມານຂອງລັດໃຫ້ເກີດປະສິດທິພາບສູງສຸດ. ໃນນັ້ນ, ໄດ້ສຸມໃສ່ການຄົ້ນຄວ້າຊອກຫາສາເຫດຂອງບັນດາຫົວຂໍ້ຄົ້ນຄວ້າທີ່ດຳເນີນການຫຼ້າຊ້າກວ່າແຜນ. ພ້ອມດຽວກັນ, ກໍໄດ້ພິຈາລະນາການສະເໜີຂໍຕໍ່ສັນຍາບົນຫຼັກການວິທະຍາສາດຢ່າງກົງໄປກົງມາ, ເນັ້ນໃສ່ການວັດແທກຜົນໄດ້ຮັບ ແລະ ຜົນຜະລິດຕົວຈິງທີ່ມີເອກະສານຢັ້ງຢືນຈະແຈ້ງ ເຊັ່ນ: ຜົນງານການຕີພິມວິຊາການ, ການຈົດທະບຽນຊັບສິນທາງປັນຍາ, ປຶ້ມວິຊາການ ແລະ ການກໍ່ສ້າງບຸກຄະລາກອນ. ນອກຈາກນີ້, ຍັງໄດ້ກຳນົດມາດຕະການທາງວິໄນຢ່າງເດັດຂາດຕໍ່ຫົວຂໍ້ທີ່ບໍ່ສຳເລັດໂດຍບໍ່ມີເຫດຜົນສົມ ຄວນ ເພື່ອສ້າງບັນທັດຖານໃໝ່ທີ່ມີຄວາມຮັບຜິດຊອບສູງ ແລະ ຍົກລະດັບການຄຸ້ມຄອງກອງທຶນໃຫ້ມີຄວາມສັກສິດ ແລະ ຍືນຍົງ.

ໂອກາດດັ່ງກ່າວ, ທ່ານ ສຸດທິພົງ ວົງໄຊຍາ ຍັງໄດ້ຮຽກຮ້ອງມາຍັງຄະນະກຳມະການ ແລະ ຜູ້ແທນເຂົ້າຮ່ວມ ເອົາໃຈໃສ່ປະກອບຄຳເຫັນຢ່າງສ້າງສັນ ແລະ ຮັບຜິດຊອບສູງໃນ 6 ຈຸດສຳຄັນ ຄື: ກວດກາຫົວຂໍ້ກາຍເວລາ ໂດຍໃຫ້ກວດກາຄືນຫົວຂໍ້ທີ່ສິ້ນສຸດໄລຍະເວລາສັນຍາແລ້ວ ແຕ່ຍັງບໍ່ສາມາດປິດໄດ້ ຫຼື ປະຕິບັດຫຼ້າຊ້າກວ່າບົດຄົ້ນຄວ້າ; ປະເມີນຄວາມເປັນໄປໄດ້ ໃນການກວດກາ ແລະ ປະເມີນວ່າຖ້າຕໍ່ສັນຍາແລ້ວ ຫົວຂໍ້ດັ່ງກ່າວຈະສາມາດສຳເລັດຕາມແຜນທີ່ກຳນົດໄວ້ໄດ້ຫຼືບໍ່; ເນັ້ນໃສ່ຜົນໄດ້ຮັບຕົວຈິງ ການປະເມີນຜົນງານຕົວຈິງ ເຊັ່ນ: ການຕີພິມລົງວາລະສານພາຍໃນ-ສາກົນ, ການຈົດຊັບສິນທາງປັນຍາ, ປຶ້ມວິຊາການ ແລະ ການກໍ່ສ້າງບຸກຄະລາກອນລະດັບ ປະລິນຍາຕີ, ໂທ ແລະ ເອກ; ກຳນົດມາດຕະການຊັດເຈນ ສະເໜີໃຫ້ມີຄຳເຫັນໂຈະ ຫຼື ປະຕິບັດຕາມສັນຍາກຳນົດ ຖ້າຫົວຂໍ້ບໍ່ສຳເລັດ; ເຮັດບົດບັນທຶກໃຫ້ຄະນະກຳມະການຮ່ວມກັບກອງເລຂາ ເຮັດບົດບັນທຶກກັບຫົວໜ້າຫົວຂໍ້ ເພື່ອເປັນບ່ອນອີງໃນການຈັດຕັ້ງປະຕິບັດ; ນຳໃຊ້ແບບພິມມາດຕະຖານ ເຊິ່ງການປະເມີນຄັ້ງນີ້ໄດ້ນຳໃຊ້ແບບພິມ 8, 9 ແລະ 10 ໃນການຕິດຕາມ-ກວດກາ.

ສຳລັບກອງປະຊຸມແມ່ນດຳເນີນເປັນເວລາ 2 ວັນ ລະຫວ່າງວັນທີ 6-7 ສິງຫາ 2026, ເຊິ່ງຄະນະກຳມະການໄດ້ຮ່ວມກັນປະເມີນຫົວຂໍ້ຄົ້ນຄວ້າໃນຂົງເຂດວິທະຍາສາດຊີວະພາບ ຈຳນວນ 8 ຫົວຂໍ້ ແລະ ວິທະຍາສາດເສດຖະກິດ ຈຳນວນ 6 ຫົວຂໍ້.

ພາບ-ຂ່າວໂດຍ: ການຈະນາ