ກົມຄຸ້ມຄອງວິທະຍາສາດ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມຜ່ານຮ່າງຍຸດທະສາດການພັດທະນາວິທະຍາສາດ ແລະ ນະວັດຕະກຳແຫ່ງຊາດ ໄລຍະປີ 2023-2035 ເມື່ອວັນທີ 4 ຕຸລາ 2023 ທີ່ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ ສສກ ໂດຍພາຍໃຕ້ການເປັນປະທານຂອງທ່ານ ປອ ສຸລິອຸດົງ ສູນດາຣາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີຂະແໜງການຈາກກະຊວງທີ່ກ່ຽວຂ້ອງ, ບັນດາກົມ, ຫ້ອງການ, ມະຫາວິທະຍາໄລແຫ່ງຊາດ, ກະຊວງສຶກສາທິການ ແລະ ກິລາ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ, ທ່ານ ປອ ສຸລິອຸດົງ ສູນດາຣາ ໄດ້ກ່າວວ່າ: ປັດຈຸບັນອີງຕາມການມອບໝາຍຈາກລັດຖະບານເພື່ອໃຫ້ກະຊວງສຶກສາທິການ ແລະ ກິລາ ເປັນຫຼັກໃນວຽກງານພັດທະນາວິທະຍາສາດ ແລະ ຕໍ່ສະພາບການພັດທະນາ ວິທະຍາສາດ ເຕັກໂນໂລຊີ ແລະ ນະວັດຕະກຳໃນພາກພື້ນ ແລະ ສາກົນ ທີ່ມີການພັດທະນາຢ່າງກ້າວກະໂດດ ຊຶ່ງ ສປປ ລາວ ໄດ້ໃຫ້ຄວາມສຳຄັນໃນວຽກງານການພັດທະນາວິທະຍາສາດ ເຕັກໂນໂລຊີ ແລະ ນະວັດຕະກໍາ ໂດຍກໍາລັງກະກຽມສ້າງຍຸດທະສາດການພັດທະນາວິທະຍາສາດ ແລະ ນະວັດຕະກຳແຫ່ງຊາດ 2023-2035 ເພື່ອເປັນແນວທາງໃນການພັດທະນາວິທະຍາສາດ ເຕັກໂນໂລຊີ ແລະ ນະວັດຕະກຳຂອງປະເທດເຮົາໃນຊຸມປີຕໍ່ໜ້າ. ຈຸດປະສົງຂອງກອງປະຊຸມວິຊາການໃນຄັ້ງນີ້, ແມ່ນເພື່ອປຶກສາຫາລື ແລະ ແລກປ່ຽນຄຳຄິດຄຳເຫັນຕໍ່ຮ່າງຍຸດທະສາດການພັດທະນາວິທະຍາສາດ ແລະ ນະວັດຕະກຳແຫ່ງຊາດ ໄລຍະປີ 2023-2035 ແນໃສ່ນຳເອົາຄວາມເຫັນດີເປັນເອກະພາບທາງດ້ານເນື້ອໃນ ໂດຍສະເພາະ ການວາງເປົ້າໝາຍ, ຍຸດທະສາດ ແລະ ແຜນງານ ໃນແຕ່ລະໄລຍະຂອງວຽກງານຍຸດທະສາດ ເພື່ອໃຫ້ມີຄວາມສອດຄ່ອງກັບສະພາບຄວາມເປັນຈິງຂອງການພັດທະນາເສດຖະກິດ-ສັງຄົມ ໃນໄລຍະໃໝ່ ແລະ ທັງເປັນການກຽມຄວາມພ້ອມທາງດ້ານເນື້ອໃນ ເພື່ອຜ່ານໃນກອງປະຊຸມເປີດກວ້າງຂອງຂະແໜງການ ແລະ ລັດຖະບານ.

ໃນກອງປະຊຸມຄັ້ງນີ້, ໄດ້ມີການສະເໜີບົດ ແລະ ສົນທະນາກ່ຽວກັບຮ່າງຍຸດທະສາດການພັດທະນາວິທະຍາສາດ ແລະ ນະວັດຕະກຳແຫ່ງຊາດ ໄລຍະປີ 2023-2035 ຊຶ່ງທັງໝົດນັ້ນ ແມ່ນສ້າງໂອກາດອັນດີສໍາລັບຜູ້ເຂົ້າຮ່ວມສາມາດແລກປ່ຽນຄຳເຫັນຢ່າງເຕັມສ່ວນຕໍ່ກັບບັນດາເປົ້າໝາຍ, ຍຸດທະສາດ ແລະ ແຜນງານທີ່ກໍານົດຈາກຄະນະກຳມະການເນື້ອໃນຂອງກົມຄຸ້ມຄອງວິທະຍາສາດ ກະຊວງສຶກສາທິການ ແລະ ກິລາ. ນອກຈາກນັ້ນ, ຜົນສໍາເລັດຂອງກອງປະຊຸມຄັ້ງນີ້, ແມ່ນຈະນໍາໄປປັບປຸງເນື້ອໃນຂອງຮ່າງຍຸດທະສາດດັ່ງກ່າວເພີ່ມຕື່ມ ແລະ ສະເໜີຜ່ານກອງປະຊຸມເປີດກວ້າງຕາມຂັ້ນຕອນຂອງການສ້າງນິຕິກຳໃນຕໍ່ໜ້າ.

ໂດຍ ບົວລະພາ

ຂ່າວທີ່ກ່ຽວຂ້ອງ