ກະຊວງສຶກສາທິການ ແລະ ກິລາ (ສສກ) ແລະ ລັດຖະບານອົດສະຕຣາລີ ໄດ້ເປີດກອງປະຊຸມຝຶກອົບຮົມຄູຝຶກຂັ້ນແຂວງ ກ່ຽວກັບວຽກງານພັດທະນາວິຊາຊີບຄູແບບຕໍ່ເນື່ອງສໍາລັບຜູ້ອໍານວຍການ (ຜອ) ໂຮງຮຽນປະຖົມສຶກສາ ເມື່ອວັນທີ 4 ມັງກອນ 2024 ທີ່ວິທະຍາໄລຄູ ສະຫວັນນະເຂດ ໂດຍໃຫ້ກຽດເປັນປະທານຮ່ວມຂອງທ່ານ  ອຳພອນ ຂາວເພ້ຍສຸພົມ ຮອງຜູ້ອໍານວຍການວິທະຍາໄລຄູສະຫວັນນະເຂດ ແລະ ທ່ານ ເຈບ ພິວກຣາມ ຜູ້ຈັດການດ້ານການພັດທະນາຫຼັກສູດຊັ້ນປະຖົມສຶກສາ ແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນ ສໍາລັບການສຶກສາຂັ້ນພື້ນຖານໃນ ສປປ ລາວ (ແຜນງານບີຄວາ), ມີຕາງໜ້າຈາກພະແນກສຶກສາທິການ ແລະ ກິລາ ແຂວງສະຫວັນນະເຂດ, ຜູ້ປະສານງານ, ວິທະຍາກອນ, ສໍາມະນາກອນຈາກວິທະຍາໄລຄູສະຫວັນນະເຂດ ແລະ ຈາກ 11 ຕົວເມືອງຂອງແຂວງສະຫວັນນະເຂດ ແລະ ແຂວງຄໍາມ່ວນເຂົ້າຮ່ວມ.

ກອງປະຊຸມຝຶກອົບຮົມດັ່ງກ່າວ, ເປັນສ່ວນໜຶ່ງຂອງຍຸດທະສາດຂອງແຜນງານບີຄວາ ໄລຍະ 2 ທີ່ກະຊວງສຶກສາທິການ ແລະ ກິລາ ແຫ່ງ ສປປ ລາວ ໄດ້ຮັບຮອງເອົາ ຊຶ່ງແນໃສ່ການແບ່ງຂັ້ນຄຸ້ມຄອງການພັດທະນາວິຊາຊີບຄູແບບຕໍ່ເນື່ອງ ແລະ ສະໜອງໂອກາດໃຫ້ແກ່ການພັດທະນາວິຊາຊີບຄູແບບຕໍ່ເນື່ອງໃນຂັ້ນໂຮງຮຽນໃຫ້ຫຼາຍຂຶ້ນ ໂດຍຜ່ານການສ້າງຕັ້ງທີມງານຜູ້ເຮັດວຽກສຶກສານິເທດພາຍໃນແຕ່ລະເມືອງ ຊຶ່ງທີມດັ່ງກ່າວປະກອບມີ ຄູ, ຮອງຜູ້ອໍານວຍການໂຮງຮຽນ ແລະ ຜູ້ອໍານວຍການໂຮງຮຽນ ໂດຍຍຸດທະສາດຂອງແຜນງານບີຄວາ ໄລຍະ 2 ແມ່ນພະຍາຍາມເພື່ອຮັບປະກັນການວາງແຜນ ແລະ ການຈັດຕັ້ງປະຕິບັດກິດຈະກໍາການພັດທະນາວິຊາຊີບຄູແບບຕໍ່ເນື່ອງໃຫ້ມີປະສິດທິຜົນ.

ກອງ​ປະ​ຊຸມແມ່ນດໍາເນີນໄປເປັນເວລາ 5 ວັນ ໂດຍໄດ້ນຳສະເໜີຫົວ​ຂໍ້​ຕ່າງໆ​ທີ່​ມີຄວາມສຳຄັນ ເປັນຕົ້ນແມ່ນຄວາມ​ເຂົ້າ​ໃຈ​ກ່ຽວກັບການພັດທະນາວິຊາຊີບຄູແບບຕໍ່ເນື່ອງ, ຫຼັກສູດຊັ້ນປະຖົມສຶກສາ, ພາ​ລະ​ບົດ​ບາດຂອງຜູ້ອຳນວຍການ ແລະ ຄວາມ​ຮັບ​ຜິດ​ຊອບ​ຂອງ​ຄູ​​ທີ່​ກ່ຽວ​ຂ້ອງ​ກັບການພັດທະນາວິຊາຊີບຄູແບບຕໍ່ເນື່ອງ, ຍຸດ​ທະ​ສາດ​ເພື່ອ​ສ້າງ​ສະ​ພາບ​ແວດ​ລ້ອມ​ທີ່ເອື້ອອຳນວຍຕໍ່ການພັດທະນາວິຊາຊີບຄູແບບຕໍ່ເນື່ອງ, ພ້ອມທັງເນັ້ນໃສ່​ການສ້າງ​ຄວາມເຂົ້າໃຈລະຫວ່າງຜູ້ອຳນວຍການ ແລະ ​ຄູ​ສອນ, ຊຸກຍູ້​ການ​ເຮັດ​ວຽກ​ເປັນ​ທີມ​ໃຫ້​ມີ​ປະສິດທິ​ຜົນ, ນຳ​ໃຊ້​ເຕັກ​ນິກ​ການ​ຮຽນ​ຮູ້​ດ້ວຍການປະຕິບັດຕົວຈິງ ​ແລະ ຄົ້ນຄວ້າ​ຍຸດ​ທະ​ສາດ​ການ​ປະ​ເມີນ​ຜົນ.

ພາຍຫຼັງສຳເລັດການຝຶກອົບຮົມ, ຜູ້ອໍານວຍການຈະນໍາໃຊ້ຄວາມຮູ້ ແລະ ທັກສະທີ່ໄດ້ຮຽນຮູ້ໃໝ່ ເພື່ອສ້າງສະພາບແວດລ້ອມທີ່ເໝາະສົມສໍາລັບການພັດທະນາວິຊາຊີບຄູແບບຕໍ່ເນື່ອງຂອງຄູໃນໂຮງຮຽນ ເພື່ອສະໜັບສະໜູນຄູປະຕິບັດການພັດທະນາວິຊາຊີບຄູແບບຕໍ່ເນື່ອງໃຫ້ມີປະສິດຕິຜົນ ເພາະການວາງແຜນພັດທະນາວິຊາຊີບຄູແບບຕໍ່ເນື່ອງຂອງຄູ ແມ່ນມີຄວາມສຳຄັນຫຼາຍ. ອີງຕາມແຜນວຽກ ຈະມີການຈັດ​ກອງ​ປະຊຸມ​ຝຶກອົບຮົມເປັນເວລາເຄິ່ງວັນໃນ​ສົກຮຽນ 2023-2024 ທີ່ບັນດາ​ຜູ້​ອໍານວຍ​ການໂຮງຮຽນ ​ຈະ​ໄດ້​ມີ​ໂອກາດ​ຮຽນຮູ້ ແລະ ແລກປ່ຽນບົດຮຽນເຊິ່ງກັນ ແລະ ກັນ ​ໃນ​ການສ້າງ​ສະພາບ​ແວດ​ລ້ອມ​ທີ່ເໝາະສົມເພື່ອການພັດທະນາວິຊາຊີບຄູແບບຕໍ່ເນື່ອງ. ສຳລັບກອງປະຊຸມດັ່ງກ່າວນີ້ ແມ່ນໄດ້ຈັດຂຶ້ນຢູ່ພາຍໃນ 3 ແຂວງ ຄື: ແຂວງສະຫວັນນະເຂດ, ຊຽງຂວາງ ແລະ ແຂວງຫຼວງນໍ້າທາ.

ກົມສ້າງຄູ ກະຊວງສຶກສາທິການ ແລະ ກິລາ ໄດ້ຮັບການສະໜັບສະໜູນຈາກລັດຖະບານອົດສະຕຣາລີ ແລະ ອົງການ USAID, ໄດ້ສົ່ງເສີມວັດທະນະທໍາການຮຽນຮູ້ຢ່າງຕໍ່ເນື່ອງໃນລະດັບໂຮງຮຽນ ເພື່ອໃຫ້ຄູໄດ້ຮັບໂອກາດປັບປຸງຄຸນນະພາບການສອນທີ່ເທົ່າທຽບກັນ ແລະ ຄຳນຶງເຖິງການສຶກສາຮຽນຮ່ວມໃນດ້ານການຮຽນການສອນ.

ໂດຍ ບົວລະພາ

ຂ່າວ​ທີ່​ກ່ຽວ​ຂ້ອງ