ກົມ​ການ​ສຶກ​ສາ​ກ່ອນ​ໄວ​ຮຽນ ກະຊວງສຶກສາທິການ ແລະ ກິລາ (ສສກ) ຈັດກອງ​ປະ​ຊຸມຖອດ​ຖອນ​ບົດ​ຮຽນກ່ຽວກັບການ​ຈັດ​ຕັ້ງ​ປະ​ຕິ​ບັດ​ວຽກ​ການ​ສຶກ​ສາ​ກ່ອນ​ໄວ​ຮຽນ ປະ​ຈຳ​ປີ 2023 ແລະ ວາງແຜນ​ວຽກ​ຈຸດ​ສຸມ ປະ​ຈຳ​ປີ 2024 ໃນຮູບແບບເຊິ່ງໜ້າ ແລະ ອອນລາຍ ເພື່ອເປັນການແລກປ່ຽນບົດຮຽນ ແລະ ປະສົບການໃນການຈັດຕັ້ງປະຕິບັດບັນດາໂຄງການ ແລະ ແຜນກິດຈະກຳທີ່ສະໜັບສະໜູນໃຫ້ແກ່ການຂະຫຍາຍໂອກາດການເຂົ້າເຖິງການສຶກສາກ່ອນໄວຮຽນ ເພື່ອເຮັດໃຫ້ການເບິ່ງແຍງລ້ຽງດູ ແລະ ການກຽມຄວາມພ້ອມທາງດ້ານການຮຽນຂອງເດັກກ່ອນໄວຮຽນໃຫ້ທົ່ວເຖິງ.

ກອງປະຊຸມດັ່ງກ່າວ, ໄດ້ຈັດຂຶ້ນໃນ​ວັນ​ທີ 4 ມັງກອນ ຜ່ານມາ ທີ່ຫ້ອງປະຊຸມ ກະຊວງສຶກສາທິການ ແລະ ກິລາ (ຕຶກ ICT) ໂດຍພາຍໃຕ້ການເປັນປະທານຂອງທ່ານ ປອ ນາງ ສີສຸກ ວົງວິຈິດ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ນາງ ສີພາພອນ ມະນີວັນ ຫົວ​ໜ້າກົມ​ການ​ສຶກ​ສາ​ກ່ອນ​ໄວ​ຮຽນ ພ້ອມດ້ວຍຜູ້ຕາງໜ້າກົມສ້າງຄູ, ກົມສາມັນສຶກສາ, ກົມຈັດຕັ້ງ ແລະ ພະນັກງານ, ກົມແຜນການ, ກົມ​ການ​ເງິນ, ກົມປະກັນຄຸນນະພາບ, ຜູ້ອຳນວຍການ/ຮອງ​​ອຳ​ນວຍ​ການສະຖາບັນ/ສູນ,  ສຳ​ນັກ​ພິມ​ສຶກ​ສາ ແລະ ກິ​ລາ, ຫ້ອງການສົ່ງເສີມການສຶກສາພາກເອກະຊົນ, ຫົວໜ້າ/ຮອງຫົວໜ້າພະແນກຈາກພາກສ່ວນຕ່າງໆຂອງກະຊວງສຶກສາທິການ ແລະ ກິລາ, ຫົວໜ້າ/ຮອງພະແນກສຶກສາທິການ ແລະ ກິລາແຂວງ/ນະຄອນຫຼວງ (18 ແຂວງ), ຫົວໜ້າ ແລະ ວິຊາການຈາກຂະແໜງການສຶກສາກ່ອນໄວຮຽນ (18 ແຂວງ), ຮອງປະທານສະມາຄົມການສຶກສາພາກເອກະຊົນ, ຜູ້ອໍານວຍການໂຮງຮຽນອະນຸບານສຶກສາ, ສາທາ, ໂຮງຮຽນອະນຸບານດາຣາ, ຊະນະພົນ (ເອກະຊົນ), ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານຮອງລັດຖະມົນຕີ ສສກ ໄດ້ກ່າວວ່າ: ກອງປະຊຸມຄັ້ງນີ້ ເປັນການຖອດ​ຖອນ​ບົດ​ຮຽນ ແລະ ສະຫຼຸບການ​ຈັດ​ຕັ້ງ​ປະ​ຕິ​ບັດ​ວຽກ​ງານການ​ສຶກ​ສາ​ກ່ອນ​ໄວ​ຮຽນ ປະ​ຈຳ​ປີ 2023 ແລະ ​ ວາງແຜນ​ວຽກ​ຈຸດ​ສຸມ ປະ​ຈຳ​ປີ 2024 ຊຶ່ງເປັນກອງປະຊຸມທີ່ມີຄວາມສຳຄັນຢ່າງຍິ່ງ ທີ່ພວກເຮົາຈະໄດ້ພ້ອມກັນຮັບຮູ້ຜົນສຳເລັດ, ບັນຫາ ແລະ ສິ່ງທ້າທາຍ ແລະ ແລກປ່ຽນບົດຮຽນໃນການຈັດຕັ້ງປະຕິບັດການສຶກສາກ່ອນໄວຮຽນທີ່ຜ່ານມາ ເພື່ອຊອກຫາວິທີທາງແກ້ໄຂ ພ້ອມທັງປັບປຸງ ແລະ ສົ່ງເສີມວຽກງານການສຶກສາກ່ອນໄວຮຽນໃນຫຼາຍໆດ້ານ ເປັນຕົ້ນແມ່ນການຂະຫຍາຍໂອກາດໃຫ້ເດັກນ້ອຍກ່ອນໄວຮຽນຮັບການເບິ່ງແຍງ ດູແລ ແລະ ສົ່ງເສີມການຮຽນຮູ້ຂັ້ນຕົ້ນ ເພື່ອກຽມຄວາມພ້ອມດ້ານການຮຽນຮູ້ຢ່າງຮອບດ້ານ ກ່ອນເຂົ້າຮຽນຊັ້ນປະຖົມສຶກສາ.

ທ່ານຮອງລັດຖະມົນຕີ ສສກ ກ່າວອີກວ່າ: ເພື່ອໃຫ້ເດັກກ່ອນໄວຮຽນ ໄດ້ຮັບການດູແລ ເບິ່ງແຍງ ແລະ ກຽມຄວາມພ້ອມໃນການຮຽນຮູ້ຂັ້ນຕົ້ນໄດ້ດີ ແລະ ເພື່ອໃຫ້ຄາດໝາຍຕ່າງໆທີ່ຍັງບໍ່ບັນລຸ ສາມາດບັນລຸໄປຕາມແຜນທີ່ວາງໄວ້ ຂ້າພະເຈົ້າຈຶ່ງຂໍຮຽກຮ້ອງໃຫ້ຜູ້ບໍລິຫານການສຶກສາທຸກຂັ້ນ ທຸກລະດັບ ນັບແຕ່ຂັ້ນສູນກາງ, ຂັ້ນແຂວງ, ຂັ້ນເມືອງ ຕະຫຼອດຮອດຂັ້ນທ້ອງຖິ່ນ ແລະ ຄູ່ຮ່ວມພັດທະນາ ທັງທີ່ຢູ່ໃນຫ້ອງປະຊຸມ ແລະ ທາງອອນລາຍ ຈົ່ງໃຫ້ຄວາມຮ່ວມມືໃນການປະກອບຄຳຄິດເຫັນ ແລະ ຂໍ້ສະເໜີແນະຕ່າງໆເຂົ້າໃນການຈັດຕັ້ງປະຕິບັດແຜນພັດທະນາການສຶກສາກ່ອນໄວຮຽນໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ ເລັ່ງໃສ່ປັບປຸງກົນໄກ, ສ້າງລະບົບການຕິດຕາມ, ປະເມີນຜົນ ແລະ ວິທີການຈັດຕັ້ງປະຕິບັດ ໂດຍອີງໃສ່ບັນດາວຽກຈຸດສຸມຕ່າງໆ ເພື່ອໃຫ້ບັນລຸເປົ້າໝາຍ ໃນປີ 2025 ເປັນຕົ້ນແມ່ນ ອັດຕາການເຂົ້າຮຽນຂອງນັກຮຽນ ອາຍຸ 5 ປີໃຫ້ບັນລຸ 86%, ອັດຕາການເຂົ້າຮຽນຂອງນັກຮຽນ ອາຍຸ 5 ປີ ໃນ 40 ເມືອງຈຸດສຸມໃຫ້ບັນລຸ 83% ແລະ ອັດຕາເຂົ້າຮຽນໃໝ່ຂອງນັກຮຽນຫ້ອງ ປ.1 ທີ່ໄດ້ຜ່ານຫ້ອງອະນຸບານ 3, ຫ້ອງກຽມປະຖົມ, ກຸ່ມຮຽນຜ່ານການຫຼິ້ນໃຫ້ບັນລຸ 75%. ພ້ອມດຽວກັນນີ້, ກໍຫວັງເປັນຢ່າງຍິ່ງວ່າ ພວກເຮົາຈະໄດ້ພ້ອມກັນຊອກຫາຊ່ອງທາງ ແລະ ປຶກສາຫາລື ແລກປ່ຽນຄຳຄິດເຫັນຢ່າງສ້າງສັນ ແລະ ກົງໄປກົງມາ ເພື່ອເຮັດໃຫ້ການຈັດຕັ້ງປະຕິບັດການສຶກສາກ່ອນໄວຮຽນມີຄຸນນະພາບ ໂດຍສະເພາະ ຜູ້ບໍລິຫານລະດັບພະແນກສຶກສາທິການ ແລະ ກິລາແຂວງ/ນະຄອນຫຼວງ ຊີ້ນຳ ຫ້ອງການສຶກສາທິການ ແລະ ກິລາເມືອງ/ນະຄອນ ເອົາໃຈໃສ່ປັບປຸງຄຸນນະພາບ, ປະສິດທິພາບ ປະສິດທິຜົນຂອງການຈັດການຮຽນການສອນ ສະຖານການສຶກສາກ່ອນໄວຮຽນ ດ້ວຍຄວາມຮັບຜິດຊອບສູງ ໂດຍສະເພາະໃຫ້ສອດຄ່ອງກັບພາລະບົດບາດໃນການຄຸ້ມຄອງບໍລິຫານຂອງຂະແໜງການ ແລະ ໜ່ວຍງານການສຶກສາກ່ອນໄວຮຽນ ໂດຍມີເປົ້າໝາຍເພື່ອສົ່ງເສີມໃຫ້ເດັກກ່ອນໄວຮຽນໄດ້ຮັບການເບິ່ງແຍງລ້ຽງດູໃຫ້ມີສຸຂະພາບ ແລະ ໂພຊະນາການທີ່ດີ, ສົ່ງເສີມໃຫ້ເດັກໄດ້ຮັບການພັດທະນາທາງດ້ານຕ່າງໆ ເພື່ອໃຫ້ເຂົາເຈົ້າໄດ້ກຽມຄວາມພ້ອມກ່ອນເຂົ້າຮຽນໃນຊັ້ນປະຖົມ ດ້ວຍຮູບແບບທີ່ສອດຄ່ອງກັບແຕ່ລະທ້ອງຖິ່ນ.

ນອກຈາກນີ້, ໃນກອງປະຊຸມຍັງໄດ້ມີການສະເໜີຜົນສຳເລັດ​ການ​ຈັດ​ຕັ້ງ​​ປະ​ຕິ​ບັດວຽກງານ​ການ​ສຶກ​ສາ​ກ່ອນ​ໄວ​ຮຽນ ປະຈໍາປີ 2023 ແລະ ແຜນວຽກຈຸດສຸມ ປະຈໍາປີ 2024, ລາຍງານຜົນການຕິດຕາມການຈັດຕັ້ງປະຕິບັດວຽກງານການສຶກສາກ່ອນໄວຮຽນ, ລາຍງານການ​ຈັດ​ຕັ້ງ​ປະ​ຕິ​ບັດແຜນງານການກຽມຄວາມພ້ອມທາງດ້ານການຮຽນສຳລັບເດັກກ່ອນໄວຮຽນ, ການອົບຮົມກ່ຽວກັບການນໍາໃຊ້ແຜນຈັດປະສົບການຫ້ອງກຽມປະຖົມສະບັບປັບປຸງໃໝ່, ການຈັດຕັ້ງປະຕິບັດການສອນຄວບອາຍຸເດັກ 3-5 ປີ, ການຈັດຕັ້ງປະຕິບັດກຸ່ມພັດທະນາເດັກໃນຊຸມຊົນ, ການຈັດຕັ້ງປະຕິບັດກຸ່ມຮຽນຜ່ານການຫຼິ້ນ, ການກວດກາຄວາມບົກຜ່ອງໜ້າທີ່ການ, ນໍາສະເໜີແນວຄວາມຄິດກ່ຽວກັບການສ້າງໂຮງລ້ຽງເດັກ ແລະ ໂຮງຮຽນອະນຸບານຊຸມຊົນ. ນອກຈາກນັ້ນ, ຍັງມີການລາຍງານກ່ຽວກັບການຈັດພິມ ແລະ ແຈກຢາຍປື້ມ, ອຸປະກອນ ແລະ ເຄື່ອງຫຼິ້ນ ສຳລັບການສຶກສາກ່ອນໄວຮຽນ ແລະ ສັງລວມຜົນໄດ້ຮັບ ແລະ ຜ່ານຮ່າງມະຕິ​ກອງ​ປະ​ຊຸມດັ່ງກ່າວອີກດ້ວຍ.

 ໂດຍ ສົງການ ພັນແພງດີ

ຂ່າວ​ທີ່​ກ່ຽວ​ຂ້ອງ