ກົມຄຸ້ມຄອງວິທະຍາສາດ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມວິຊາການກ່ຽວກັບ ການຈັດຕັ້ງປະຕິບັດວຽກງານຄໍ້າປະກັນວັດສະດຸນິວເຄຣຍ ໃນລະຫວ່າງວັນທີ 15-18 ມັງກອນ 2024 ທີ່ໂຮງແຮມຄຣາວພຣາຊາ ນະຄອນຫຼວງວຽງຈັນ ໂດຍໃຫ້ກຽດເປັນປະທານຂອງທ່ານ ປອ ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີຄະນະຜູ້ຕາງໜ້າຈາກສະຖານທູດ ສະຫະລັດອາເມຣິກາ ປະຈຳ ສປປ ລາວ, ຄະນະຊ່ຽວຊານຈາກກົມພະລັງງານ ສະຫະລັດອາເມຣິກາ, ຊ່ຽວຊານຈາກອົງການພະລັງງານປະລໍາມະນູສາກົນ, ກະຊວງອ້ອມຂ້າງ ຕະຫຼອດຮອດພະນັກງານທີ່ກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ, ທ່ານ ປອ ສຸລິອຸດົງ ສູນດາລາ ໄດ້ກ່າວ່າ: ກອງປະຊຸມຄັ້ງນີ້, ຜູ້ເຂົ້້າຮ່ວມຈະໄດ້ຮຽນຮູ້, ຮັບຮູ້ ແລະ ເຂົ້າໃຈຕໍ່ກັບສະພາບລວມ, ບັນດາຫຼັກການ, ຜົນປະໂຫຍດ ແລະ ຄວາມສ່ຽງຈາກການນໍາໃຊ້ເຕັກໂນໂລຊີນິວເຄຣຍເພື່ອສັນຕີ ລວມໄປເຖິງບັນດາລະບຽບການ, ນິຕິກຳ, ຂັ້ນຕອນ ແລະ ຂະບວນການໃນການຈັດຕັ້ງປະຕິບັດວຽກງານການຄຸ້ມຄອງ, ການກວດສອບ ແລະ ການລາຍງານກ່ຽວກັບການນຳໃຊ້ວັດສະດຸນິວເຄຣຍ. ສິ່ງ ສຳຄັນໄປກ່ວານັ້ນ, ຍັງຈະໄດ້ແລກປ່ຽນບົດຮຽນ, ປະສົບການໃນການຈັດຕັ້ງປະຕິບັດວຽກງານຄ້ຳປະກັນວັດສະດຸນິວເຄຣຍ ໂດຍສະເພາະແມ່ນອະນູສັນຍາ ວ່າດ້ວຍລັດທີ່ມີປະລິມານວັດສະດຸນິວເຄຣຍໜ້ອຍ ສະບັບປັບປຸງ (Modified Small Quantities Protocol-SQP) ທີ່ ສປປ ລາວ ໄດ້ຮັບຮອງໃນປີ 2022 ແລະ ວິທີການ ແລະ ຂັ້ນຕອນໃນການລາຍງານໃຫ້ແກ່ອົງການພະລັງງານປະລໍາມະນຸສາກົນ (IAEA) ຢ່າງຖືກຕ້ອງ ແລະ ແຖດເໝາະກັບສະພາບການຕົວຈິງ ເພື່ອປະຕິບັດສັນຍາລະຫວ່າງ ສປປ ລາວ ແລະ ອົງການປະລໍາມະນູສາກົນ.

ນອກຈາກນີ້, ໃນກອງປະຊຸມຍັງໄດ້ມີການນໍາສະເໜີບົດກ່ຽວກັບສິດ ແລະ ພັນທະພາຍຫຼັງທີ່ຮັບຮອງອະນຸສັນຍາ ວ່າດ້ວຍລັດທີ່ມີປະລິມານວັດສະດຸນິວເຄຣຍໜ້ອຍ ສະບັບປັບປຸງ (Modified Small Quantities Protocol-SQP); ສິດ ແລະ ໜ້າທີ່ຂອງອົງການຄຸ້ມຄອງຄວາມປອດໄພຈາກລັງສີ ແລະ ນິວເຄຣຍ, ການຈັດຕັ້ງປະຕິບັດວຽກງານຢັ້ງຢືນຄວາມປອດໄພຂອງວັດສະດຸນິວເຄຣຍ; ບັນດາບົດຮຽນ ແລະ ປະສົບການຂອງບາງປະເທດສະມາຊິກ ທີ່ຈັດຕັ້ງປະຕິບັດ ເປັນຕົ້ນ ສສ ຫວຽດນາມ, ອົດສະຕຣາລີ ແລະ ປະເທດອື່ນໆ, ລວມໄປເຖິງ ການກຳນົດຊອກຫາວັດສະດຸນິວເຄຣຍ, ລະບົບຂັ້ນຕອນໃນການຈັດຕັ້ງປະຕິບັດຢ່າງມີປະສິດທິຜົນ ແລະ ຍືນຍົງໃຫ້ແກ່ໜ່ວຍງານວິຊາການທີ່ຄຸ້ມຄອງຄວາມປອດໄພລັງສີ-ນິວເຄຣຍ. ພ້ອມກັນນັ້ນ, ໄດ້ມີການແລກປ່ຽນບົດຮຽນຈາກບັນດາຊ່ຽວຊານອີກດ້ວຍ.

ໂດຍ ບົວລະພາ

ຂ່າວທີ່ກ່ຽວຂ້ອງ