ຄະນະນຳ ກະຊວງສຶກສາທິການ ແລະ ກິລາ (ສສກ) ນຳໂດຍທ່ານ ປອ ສໍາລານ ພັນຄະວົງ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ຮສ.ປອ ເດຊານຸລາດ ແສນດວງເດດ ວ່າການແທນອະທິການບໍດີ ມະ​ຫາ​ວິ​ທະ​ຍາ​ໄລ​ແຫ່ງ​ຊາດ (ມຊ), ທ່ານ ຮ​ສ.ປອ ອາ​ນຸ​ລົມ​ ວິ​ໄລ​ພອນ ຜູ້​ອຳ​ນວຍ​ການ​ສະ​ຖາ​ບັນ​ຄົ້ນ​ຄວ້າ​ວິ​ທະ​ຍ​າ​ສາດ​ການ​ສຶກ​ສາ (ສວ​ສ) ພ້ອມດ້ວຍຄະນະ, ຜູ້​ຕາງ​ໜ້າ​ກົມຮ່ວມມືກັບຕ່າງປະເທດ ກະ​ຊວງ​ສຶກ​ສາ​ທິ​ການ ແລະ ກິ​ລາ, ສະຖາບັນຂົງຈື, ມະ​ຫາ​ວິ​ທະ​ຍາ​ໄລ​ແຫ່ງ​ຊ​າດ ໄດ້ເດີນ​ທາງ​ໄປຢ້ຽມ​ຢາມ ສາ​ທາ​ລະ​ນະ​ລັດ ປະ​ຊາ​ຊົນ​ຈີນ (ສ​ປ ຈີນ) ໃນ​ວັນ​ທີ 2 ກໍ​ລະ​ກົດ 2024 ໂດຍອີງຕາມການເຊື້ອເຊີນຂອງສູນຮ່ວມມືພາສາຈີນ-ພາສາຕ່າງປະເທດແຫ່ງຊາດຈີນ ແລະ ມະຫາວິທະຍາໄລຊົນເຜົ່າກວາງຊີ ສປ ຈີນ.

ການເຄື່ອນໄຫວປະຕິບັດວຽກງານຂອງຄະນະນຳ ສສກ ຢູ່ ສປ ຈີນ ຄັ້ງນີ້, ແມ່ນໄດ້ເດີນທາງໄປຢ້ຽມ​ຢາມສະຖານທູດລາວ ປະຈໍາ ​ສປ ຈີນ ທີ່ປັກກິ່ງ ໃນວັນທີ 3 ກໍ​ລະ​ກົດ 2024 ໂດຍມີທ່ານ ສົມພອນ ສີຈະເລີນ ເອກອັກຄະລັດຖະທູດ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ (ສ​ປ​ປ ລາວ) ຜູ້ມີອໍານາດເຕັມແຫ່ງ ສປ ຈີນ ໃຫ້​ການ​ຕ້ອນ​ຮັບຢ່າງອົບອຸ່ນ. ຫຼັງຈາກນັ້ນ, ຄະນະໄດ້ເດີນທາງໄປຢ້ຽມຢາມສູນຮ່ວມມືພາສາຈີນ-ພາສາຕ່າງປະເທດ ໂດຍ​ໄດ້​ຮັບ​ການ​ຕ້ອນ​ຮັບ​ຈາກທ່ານ ຫົວໜ້າສູນຮ່ວມມືພາສາຈີນ-ພາສາຕ່າງປະເທດ, ທ່ານ ຮອງຫົວໜ້າສູນ ແລະ ທ່ານ ຮອງອະທິການບໍດີມະຫາວິທະຍາໄລຊົນເຜົ່າກວາງຊີ ພ້ອມດ້ວຍຄະນະ

ຊຶ່ງໃນໂອກາດດັ່ງກ່າວ ທ່ານ ປອ ສຳ​ລານ ພັນ​ຄະ​ວົງ ໄດ້ສະແດງຄວາມຂອບໃຈເປັນຢ່າງສູງທີ່ທາງສູນໄດ້ເອົາໃຈໃສ່ຊຸກຍູ້ວຽກງານການຮຽນການສອນພາສາຈີນຢູ່ ສປປ ລາວ ໂດຍສະເພາະແມ່ນ​ຈະ​ໄດ້​ໃຫ້​ຄວາມ​ຊ່ວຍ​ເຫຼືອ​ໂຄງ​ການ​ສຶກ​ສາ​ພາ​ສາ​ຈີນ​ເຂົ້າ​ຊັ້ນ​ມັດ​ທະ​ຍົມ​ສຶກ​ສາ​ຢູ່ ສປ​ປ ລາວ. ນອກຈາກນັ້ນ ທ່ານ ປອ ສໍາລານ ພັນ​ຄະ​ວົງ ຍັງໄດ້ສະເໜີໃຫ້ສູນຮ່ວມມືພາສາຈີນ-ພາສາຕ່າງປະເທດ ພິຈາລະນາໃນການເປີດສະຖາບັນຂົງຈືເພີ່ມຢູ່ໃນພາກໃຕ້ຂອງ ສປປ ລາວ ຂະນະດຽວກັນນີ້ ທາງສູນຍິນດີທີ່ຈະສືບຕໍ່ໃຫ້ການສະໜັບສະໜູນການແລກປ່ຽນວັດທະນະທໍາລະຫວ່າງສອງຊາດ ລາວ-ຈີນ ແລະ ການສົ່ງຄູອາຈານຈີນໄປຊ່ວຍສິດສອນພາສາຈີນ, ສ້າງຫຼັກ​ສູດ, ປຶ້ມ​ແບບ​ຮຽນ, ຄູ່​ມື​ຄູ ແລະ ສື່​ການ​ຮຽນ​ການ​ສອນ ເພື່ອ​ໃຫ້​ແທດ​ເໝາະ​ກັບ​ສະ​ພາບ​ການ​ຮຽນ​ການ​ສອນ​ຕົວ​ຈິງ ທີ່ ສປປ ລາວ. ຫຼັງຈາກສໍາເລັດກອງປະຊຸມ, ທັງສອງຝ່າຍໄດ້ເຊັນໜັງສືເຈດຈໍານົງ ວ່າດ້ວຍການຮ່ວມມືດ້ານການສຶກສາພາສາຈີນຢູ່ຊັ້ນມັດທະຍົມສຶກສາໃນ ສ​ປ​ປ ລາວ.

ໃນ​ຕອນ​ເຊົ້າ​ຂອງວັນ​ທີ 4 ກໍ​ລະ​ກົດ 2024, ຄະນະນໍາ ສສກ ໄດ້ເດີນທາງໄປເມືອງໜານໜິງ ແລະ ໃນຕອນບ່າຍ​ຂອງວັນ​ດຽວ​ກັນໄດ້ພົບປະກັບທ່ານ ອະທິການບໍດີ ມະຫາວິທະຍາໄລຊົນເຜົ່າກວາງຊີ ພ້ອມດ້ວຍຄະນະ.

​​          ພ້ອມກັນນັ້ນ, ໃນ​ຕອນ​ເຊົ້າ​ຂອງວັນ​ທີ 5 ກໍ​ລະ​ກົດ 2024, ທ່ານ ປອ ສໍາລານ ພັນ​ຄະ​ວົງ, ທ່ານ ຮສ.ປອ ເດຊານຸລາດ, ທ່ານ ຮ​ສ.ປອ ອາ​ນຸ​ລົມ ວິ​ໄລ​ພອນ ພ້ອມດ້ວຍຄະນະ ໄດ້ພົບປະໂອ້ລົມຕໍ່ນັກສຶກສາລາວ ທີ່ກໍາລັງສຶກສາຢູ່ມະ​ຫາ​ວິ​ທະ​ຍາ​ໄລ​ຊົນ​ເຜົ່າກວາງຊີ ຊຶ່ງ​ບັນ​ດາ​ທ່ານ​ໄດ້​ໃຫ້​ທິດ​ທາງ​ໃນ​ການ​ສຶກ​ສາ​ຮ່ຳ​ຮຽນ ແລະ ການ​ດຳ​ລົງ​ຊີ​ວິດ​ໃນ​ຕ່າງ​ແດນ, ທິດ​ທາງ​ໃນ​ການ​ຄົ້ນ​ຄວ້າ​ຮ່ຳ​ຮຽນ, ແນະ​ນຳປຶ້ມ​ວ່າ​ດ້ວຍ​ຫຼັກ​ການ​ ການນໍາ​ໃຊ້​ພາ​ສາ​ລາວ ທີ່​ທາງ​ສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶກ​ສາ ​ໄດ້​ຮຽບ​ຮຽງ​ຂຶ້ນ​ມາ ແລະ ຈະ​ເປັນຫຼັກ​ການ​ນຳ​ໃຊ້​ພາ​ສາ​ລາວ​ໃນ​ຂອບ​ເຂດ​ທົ່ວ​ປະ​ເທດ. ໃນຕອນບ່າຍຂອງວັນ​ດຽວ​ກັນ, ທາງຄະນະໄດ້ພົບປະກັບຮອງປະທານເຂດປົກຄອງຕົນເອງຊົນເຜົ່າຈວ້າງກວາງຊີ (ທ່ານ ຮອງເຈົ້າແຂວງ) ພ້ອມດ້ວຍຄະນະ ໂດຍມີຫົວໜ້າພະແນກສຶກສາແຂວງ, ຫົວໜ້າພະແນກຮ່ວມມືກັບຕ່າງປະເທດເຂົ້າຮ່ວມ.

ໃນ​ການ​ພົບ​ປະ​ດັ່ງ​ກ່າວ, ທ່ານ ຮອງ​ເຈົ້າ​ແຂວງ​ ໄດ້​ກ່າວ​ວ່າ: ແຂວງກວາງຊີ ຈະສືບຕໍ່ເສີມຂະຫຍາຍ ແລະ ຊຸກຍູ້ການສຶກສາຂອງ ສປປ ລາວ ໂດຍສະເພາະໃນຂົງເຂດອາຊີວະສຶກສາ, ການສຶກສາຊັ້ນສູງ ແລະ ບັນດາພື້ນຖານໂຄງລ່າງການສຶກສາຂອງ ສປປ ລາວ. ໃນຕອນທ້າຍ, ທັງ​ສອງ​ຝ່າຍ​ໄດ້​ຕົກ​ລົງ​ເຫັນ​ດີ​ເປັນ​ເອ​ກະ​ພາບ ຜັນ​ຂະ​ຫຍາຍ​ການ​ຮ່ວມ​ມື​ສອງ​ຊາດ ລາວ-ຈີນ, ຈີນ-ລາວ ໂດຍ​ສະ​ເພາະ​ໃນ​ຂົງ​ເຂດ​ການ​ສຶກ​ສາ​ໃຫ້​ຂະ​ຫຍາຍ​ຕົວ​ຂຶ້ນ​ໄປ​ເລື້ອຍໆ.

ຫຼັງຈາກນັ້ນ, ໃນວັນ​ທີ 6 ກໍ​ລະ​ກົດ 2024 ທາງຄະ​ນະນໍາ ສສກ ​ໄດ້​ເດີນ​ທາງ​ກັບ ສ​ປ​ປ ລາວ ດ້ວຍ​ຜົນສໍາເລັດອັນຈົບງາມ.