ສະ​ຖານເອກ​ອັກ​ຄະ​ລັດ​ຖະ​ທູດ​ລາວ ປະ​ຈຳ ສ​ສ ຫວຽດ​ນາມ ໄດ້​ຈັດກອງ​ປະ​ຊຸມ ສະຫຼຸບ​ວຽກ​ງານການ​ຄຸ້ມ​ຄອງ​ການ​​ສຶກ​ສາ​ລາວ ປະຈໍາສົກ​​ຮຽນ 2023-2024 ແລະ ວາງ​ທິດ​ທາງແຜນ​ການ ສົກ​ຮຽນ 2024-2025 ໃນວັນ​ທີ 12 ກໍ​ລະ​ກົດ 2024 ທີ່​​ມະ​ຫາ​ວິ​ທະ​ຍາ​ໄລ ກິວລອງ ແຂວງຫວິງລອງ ສ​ສ ຫວຽດ​ນາມ ໂດຍໃຫ້ກຽດເຂົ້າ​ຮ່ວມ​ຝ່າຍ​ລາວ​ມີ ທ່ານ ປອ ສຳ​ລານ ພັນ​ຄະ​ວົງ ຮອງ​ລັດ​ຖະ​ມົນ​ຕີ​ ກະ​ຊວງ​ສຶກ​ສາ​ທິ​ການ ແລະ ກິ​ລາ, ທ່ານ ປອ ຄຳ​ຕັນ ສົມ​ວົງ ທີ່​ປຶກ​ສາ​ສຶກ​ສາ-ວັດ​ທະ​ນະ​ທຳ ສະ​ຖານ​ທູດ​ລາວ ​ປະ​ຈຳ ສ​ສ ຫວຽດ​ນາມ ພ້ອມ​ດ້ວຍ​ບັນ​ດາ​ຫົວ​ໜ້າກົງ​ສູນ​ໃຫຍ່​​ລາວປະ​ຈຳ​ນະ​ຄອນໂຮ່​ຈີ​ມິນ, ນະ​ຄອນດາ​ໜັງ, ຜູ້​ຕາງ​ໜ້າ​ຈາກບັນ​ດາກົມຂອງ​ກະ​ຊວງ​ສຶກ​ສາ​ທິ​ການ ແລະ ກິ​ລາ ແລະ ຕາງ​ໜ້າພະ​ແນກ​ສຶກ​ສາ​ ແລະ ກິ​ລາ​ແຂວງ​ຂອງ​ລາວ ຕະຫຼອດຮອດ​ຜູ້​ຕາງ​ໜ້າ​ນັກ​ສຶກ​ສາ​ລາວ​ທີ່​ກຳ​ລັງ​ຮ່ຳ​ຮຽນ​ຄົ້ນ​ຄວ້າ​ຢູ່ ສ​ສ ຫວຽດ​ນາມ ຈຳ​ນວນ 100 ກວ່າຄົນ​. ​

ຝ່າຍ​ຫວຽດ​ນາມ ​ມີ ທ່ານ ຮ​ສ​.ປອ ຫງວຽນ ວັນ​ຟຸກ ຮອງ​ລັດ​ຖະ​ມົນ​ຕີກະ​ຊວງ​ສຶກ​ສາ ແລະ ກໍ່​ສ້າງ​ພະ​ນັກ​ງານ​ຫວຽດ​ນາມ, ທ່ານ ປອ ຫງວຽນ ທິກວຽນ​ແທັກ ​ຮອງປະ​ທານ​ສະ​ພາ​ປະ​ຊາ​ຊົນ​ແຂວງຫວິງ​ລອງ, ພ້ອມດ້ວຍຜູ້​ອຳ​ນວຍ​ການ​​ມະ​ຫາ​ວິ​ທະ​ຍາ​ໄລ ກິວລອງ, ຜູ້​ຕາງ​ໜ້າ​ສະ​ຖານ​ທູດ​ຫວຽດ​ນາມ​ ປະ​ຈຳ ສ​ປ​ປ ລາວ ເຂົ້າ​ຮ່ວມ.

ຈຸດປະສົງຂອງກອງປະຊຸມຄັ້ງນີ້, ແມ່ນເພື່ອສະຫຼຸບ, ຕີລາຄາຄືນສະພາບການຄຸ້ມຄອງ, ການເຄື່ອນໄຫວ ແລະ ການຮໍ່າຮຽນຂອງນັກສຶກສາລາວ ທີ່ກຳລັງສຶກ​ສາ​ຮ່ຳຮຽນຢູ່​ຕາມສະຖານການສຶກສາຕ່າງໆໃນທົ່ວປະເທດຂອງ ຫວຽດນາມ ໃນສົກຮຽນ 2023-2024 ແລະ ກຳ​ນົດທິດທາງແຜນການເຄື່ອນໄຫວໃນ​ສົກຮຽນ 2024-2025 ຊຶ່ງເປັນສົກຮຽນທີ່ມີຄວາມໝາຍສຳຄັນ ເພື່ອສືບ​ຕໍ່​ຈັດ​ຕັ້ງ​ຜັນ​ຂະ​ຫ​ຍາຍໂຄງການຍົກສູງຄຸນນະພາບ ແລະ ປະສິດທິຜົນ ໃນການຮ່ວມມື ລາວ-ຫວຽດນາມ, ຫວຽດ​ນາມ-ລາວ ໃນຂົງເຂດການສຶກສາ ແລະ ພັດທະນາຊັບພະຍາກອນມະນຸດ ໃນແຕ່ໄລ​ຍະ​ຂອງກະຊວງສຶກສາທິການ ແລະ ກິລາ​ ລາວ ແລະ ກະຊວງສຶກສາ ແລະ ກໍ່ສ້າງ​ພະ​ນັກ​ງານ ຫວຽດນາມ.

ໃນ​ສົກ​ຮຽນ 2023-2024 ມີ​ນັກ​ຮຽນ​, ນັກ​ສຶກ​ສາ​ລາ​ວ​ທີ່​ກຳ​ລັງ​ສຶກ​ສາ​ຮ່ຳ​ຮຽນ​ຢູ່ ສ​ສ ຫວຽດ​ນາ​ມ ​ທັງ​ໝົດ 10.190 ຄົນ, ຍິງ 4.277 ຄົນ. ໃນ​ນັ້ນ​, ສາຍ​ປົກ​ຄອງ​ມີ 8.478 ຄົນ, ຍິງ 3.911 ຄົນ, ສາຍ​ປ້ອງກ​ັນ​ຄວາມ​ສະ​ຫງົບ 827 ຄົນ, ຍິງ 335 ຄົນ ແລະ ປ້ອງ​ກັນ​ຊາດ 885 ຄົນ, ຍິງ 31 ຄົນ. ທຶນ​ລັດ​ຖະ​ບານ​ມີ 3.417 ຄົນ, ຍິງ 1.431 ຄົນ, ທຶນ​ຮ່ວມ​ມື​ລະ​ຫວ່າງ​ແຂວງ  4.244 ຄົນ, ຍິງ 2.221 ຄົນ, ທຶນ​ສ່ວນ​ຕົວ 1.058 ຄົນ, ຍິງ 561 ຄົນ ແລະ ຜູ້​ໃຫ້​ທຶນ​ອື່ນໆ 141 ຄົນ, ຍິງ 64 ຄົນ. ສຳ​ເລັດ​ການ​ສຶກ​ສາ ແລະ ກັບ​ຄືນ​ປະ​ເທດ​ທັງ​ໝົດ 476 ຄົນ, ຍິງ 256 ຄົນ.

 ຂ່າວ, ພາບ: ສະຖານທູດລາວ ປະ​ຈຳ ສສ ຫວຽດ​ນາມ

ຂ່າວ​ທີ່​ກ່ຽວ​ຂ້ອງ