ຜູ້ປະກອບການພາກເອກະຊົນຫຼາຍພາກສ່ວນ  ຮ່ວມປຶກສາຫາລື ແລະ ປະກອບຄໍາຄິດຄໍາເຫັນຕໍ່ຮ່າງຍຸດທະສາດ ແລະ ແຜນດຳເນີນງານແຫ່ງຊາດ ດ້ານວິທະຍາສາດ ເຕັກໂນໂລຊີ ແລະ ນະວັດຕະກຳ ແນໃສ່ເປັນບ່ອນອີງໃນການປັບປຸງຍຸດທະສາດ ທີ 5 ເພີ່ມທະວີສ້າງເຄືອຂ່າຍການຮ່ວມມື ແລະ ການມີສ່ວນຮ່ວມຂອງຂະແໜງການດັ່ງກ່າວ.

ກົມຄຸ້ມຄອງວິທະຍາສາດ ກະຊວງສຶກສາທິການ ແລະ ກິລາ ຫຼື ສສກ ຮ່ວມກັບອົງການອຸຍເນັດສະໂກ (UNESCO) ພາຍໃຕ້ໂຄງການ Developing a comprehensive Science, Technology and Innovation Strategy in Lao PDR (2026-2040) through public private consultation and partnerships” ຈັດກອງປະຊຸມປຶກສາຫາລື ແລະ ປະກອບຄໍາຄິດຄໍາເຫັນຂອງຜູ້ປະກອບການພາກເອກະຊົນຕໍ່ຮ່າງຍຸດທະສາດ ແລະ ແຜນດຳເນີນງານແຫ່ງຊາດ ດ້ານວິທະຍາສາດ ເຕັກໂນໂລຊີ ແລະ ນະວັດຕະກຳ ໃນວັນທີ 26 ກັນຍາ 2024 ທີ່ໂຮງແຮມລາວພຣາຊາ, ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ປອ ສຸລິອຸດົງ  ສຸນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີບັນດາຜູ້ຕາງໜ້າຈາກຫ້ອງການ, ກົມທີ່ກ່ຽວຂ້ອງ ແລະ ບັນດາຜູ້ຕາງໜ້າຈາກບໍລິສັດເອກະຊົນເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້, ຈັດຂຶ້ນແມ່ນເພື່ອເປີດໂອກາດໃຫ້ຜູ້ເຂົ້າຮ່ວມໄດ້ສົນທະນາແລກປ່ຽນເປັນຫຼັກ, ເພື່ອຈະຮັບຮູ້ເຖິງສະພາບຄວາມຕ້ອງການ, ການຮ່ວມມື, ບັນຫາ, ຄວາມຄາດຫວັງ ແລະ ວິທີການແກ້ໄຂໃນການມູມມອງຂອງພາກເອກະຊົນຕໍ່ກັບການສົ່ງເສີມ ແລະ ພັດທະນາວຽກງານວິທະຍາສາດ ເຕັກໂນໂລຊີ ແລະ ນະວັດຕະກໍາໃນໄລຍະໃໝ່, ເນື່ອງຈາກວ່າ ພາກເອກະຊົນແມ່ນຫົວໜ່ວຍສໍາຄັນໃນການພັດທະນາເສດຖະກິດ-ສັງຄົມ ແລະ ນໍາໃຊ້ເຕັກໂນໂລຊີຢ່າງມີຄຸນນະພາບ ເພື່ອເປັນບ່ອນອີງໃນການປັບປຸງຍຸດທະສາດ ທີ 5 ກໍຄື ເພີ່ມທະວີສ້າງເຄືອຂ່າຍການຮ່ວມມື ແລະ ການມີສ່ວນຮ່ວມຂອງຂະແໜງການ.

ພາບ-ຂ່າວໂດຍ ສົງການ ພັນແພງດີ

ຂ່າວທີ່ກ່ຽວຂ້ອງ