ພິທີເຊັນສັນຍາໂຄງການຊ່ວຍເຫຼືອລ້າ ຈາກລັດຖະບານຍີ່ປຸ່ນ ຈັດຂຶ້ນໃນວັນທີ 28 ຕຸລາ 2025 ຢູ່ ແຂວງຫົວພັນ, ໂດຍໃຫ້ກຽດລົງນາມລະຫວ່າງ ທ່ານ ໂຄອິຊຶມິ ຊຶໂຕມຸ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ແລະ ທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ, ມີການນຳເມືອງວຽງໄຊ, ການນຳເມືອງແອດ ແລະ ພາກສ່ວນທີ່ກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ໂຄງການຊ່ວຍເຫຼືອລ້າຈາກລັດຖະບານຍີ່ປຸ່ນ ທີ່ມອບໃຫ້ແຂວງຫົວພັນໃນຄັ້ງນີ້ ມີ 2 ໂຄງການຄື: ໂຄງການກໍ່ສ້າງຊົນລະປະທານ ນ້ຳສິມ ເມືອງວຽງໄຊ ແຂວງຫົວພັນ ມີມູນຄ່າການກໍ່ສ້າງ 142.271 ໂດລາສະຫະລັດ ໂດຍແມ່ນຫ້ອງການກະສິກຳ ແລະ ສິ່ງແວດລ້ອມ ເມືອງວຽງໄຊ ເປັນເຈົ້າຂອງໂຄງການ ແລະ ໂຄງການກໍ່ສ້າງ ໂຮງຮຽນມັດທະຍົມຕອນຕົ້ນ ບ້ານແກ່ວກູ້ ເມືອງແອດ ແຂວງຫົວພັນ ມີມູນຄ່າການກໍ່ສ້າງ 91.345 ໂດລາ ສະຫະລັດ ໂດຍແມ່ນຫ້ອງການສຶກສາທິການ ແລະ ກິລາ ເມືອງແອດ ເປັນເຈົ້າຂອງໂຄງການ, ຊຶ່ງເປັນທຶນຊ່ວຍເຫຼືອລ້າຈາກລັດຖະບານຍີ່ປຸ່ນ ໂດຍຜ່ານສະຖານທູດຍີ່ປຸ່ນ ປະຈຳ ລາວ.

ທ່ານ ພອນສຸກ ອິນທະວົງ ໄດ້ສະແດງຄວາມຂອບໃຈຢ່າງສູງມາ ຍັງທ່ານເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປ ລາວ ຕະຫຼອດມາ ຖືເປັນການພົວພັນຮ່ວມມືທີ່ດີ ທີ່ມີມາແຕ່ດົນນານ ເຮັດໃຫ້ສາຍພົວພັນມິດຕະພາບຂອງສອງປະເທດ ໄດ້ຮັບການພັດທະນາ ແລະ ເສີມຂະຫຍາຍ ເປັນກ້າວໆໃນຫຼາຍດ້ານ ພ້ອມທັງສະແດງຄວາມຂອບໃຈ, ຮູ້ບຸນຄຸນທີ່ໄດ້ຮັບການຊ່ວຍເຫຼືອຈາກລັດຖະບານ ແລະ ປະຊາຊົນຍີ່ປຸ່ນໃນຫຼາຍດ້ານ ພ້ອມທັງໃຫ້ຄຳໝັ້ນສັນຍາວ່າ ຈະນຳເອົາຄວາມຊ່ວຍເຫຼືອທີ່ໄດ້ຮັບຄັ້ງນີ້ນຳໃຊ້ໃຫ້ເກີດ ຜົນປະໂຫຍດສູງສຸດ.

ຂ່າວ-ພາບ: ຂປລ

ຂ່າວ​ທີ່​ກ່ຽວ​ຂ້ອງ