ສສຊ ສະເໜີລັດຖະບານ ບັນຈຸຫຼັກສູດການຮຽນການສອນໃຫ້ຄົນພິການ, ເບິ່ງຄືນການຂຸດຄົ້ນແຮ່ທາດ
ການດໍາເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ IX ເມື່ອວັນທີ 11 ພະຈິກຜ່ານມາ ໂດຍການເປັນປະທານຂອງທ່ານ ປອ ນາງ ສູນທອນ ໄຊຍະຈັກ ຮອງປະທານສະພາເເຫ່ງຊາດ, ສະມາຊິກສະພາແຫ່ງຊາດ (ສສຊ) ແຕ່ລະເຂດເລືອກຕັ້ງ ໄດ້ສືບຕໍ່ຄົ້ນຄວ້າ, ປະກອບຄໍາເຫັນໃສ່ບົດລາຍງານຂອງລັດຖະບານ ທີ່ສະເໜີໂດຍທ່ານ ສອນໄຊ ສີພັນດອນ ນາຍົກລັດຖະມົນຕີ ເພື່ອຮັບປະກັບເຮັດໃຫ້ບົດລາຍງານສະບັບນີ້ ມີເນື້ອໃນຄົບຖ້ວນ, ສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ເເລະ ປະສິດທິຜົນຫຼາຍຂຶ້ນກວ່າເກົ່າ; ການປະກອບຄໍາເຫັນສ່ວນໃຫຍ່ ເເມ່ນເປັນໄປຕາມຄຳເຫັນເຈາະຈີ້ມຂອງປະທານກອງປະຊຸມ ລວມເຖິງບັນດາຄໍາສະເໜີຂອງປະຊາຊົນທີ່ສາມາດຮວບຮວມໄດ້.
ທ່ານ ນິສິດ ເເກ້ວປັນຍາ ສສຊ ປະຈຳເຂດເລືອກຕັ້ງທີ 4 ແຂວງອຸດົມໄຊ ສະເໜີໃຫ້ລັດຖະບານປັບປຸງບາງເນື້ອໃນຂອງບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໂດຍສະເພາະເນື້ອໃນທີ່ເວົ້າເຖິງການຍົກລະດັບພື້ນຖານໂຄງລ່າງຄົມມະນາຄົມຢູ່ລາວເຮົາ ເຫັນວ່າຍັງບໍ່ທັນສອດຄ່ອງກັບສະພາບເງື່ອນໄຂຕົວຈິງເທົ່າທີ່ຄວນ.
ທ່ານ ນາງ ມະນີວັນ ເຍຍປາວເຮີ ສສຊ ປະຈຳເຂດເລືອກຕັ້ງທີ 6 ແຂວງຫຼວງພະບາງ ສະເໜີໃຫ້ລັດຖະບານກໍານົດເເຜນພັດທະນາວຽກງານການສຶກສາ ຕິດພັນກັບເເຜນພັດທະນາປົກປ້ອງສັງຄົມເເຫ່ງຊາດ ໃຫ້ເປັນອັນລະອຽດຈະເເຈ້ງໃນປີຕໍ່ໆໄປ ໂດຍສະເພາະການບັນຈຸຫຼັກສູດການຮຽນການສອນໃຫ້ຄົນພິການ ພ້ອມທັງເອົາໃຈໃສ່ພັດທະນາສີມືເເຮງງານໄປນໍາ ເພື່ອເຮັດໃຫ້ເຂົາເຈົ້າສາມາດສ້າງອາຊີບ ມີລາຍຮັບລ້ຽງຕົນເອງໄດ້.
ທ່ານ ປອ ສຸວັນນີ ໄຊຊະນະ ສສຊ ປະຈຳເຂດເລືອກຕັ້ງທີ 11 ແຂວງບໍລິຄຳໄຊ ສະແດງຄວາມເຫັນດີເປັນເອກະພາບຕໍ່ບົດລາຍງານຂອງລັດຖະບານ ເຫັນວ່າມີຫຼາຍໜ້າວຽກໄດ້ຮັບການຈັດຕັ້ງປະຕິບັດຢ່າງມີຜົນສຳເລັດໂດຍພື້ນຖານ, ແຕ່ສະເໜີໃຫ້ລັດຖະບານຄົ້ນຄວ້າພິຈາລະນາເບິ່ງຄືນກ່ຽວກັບບັນຫາຕ່າງໆທີ່ຍັງຄົງຄ້າງໃນການຂຸດຄົ້ນແຮ່ທາດຂອງບັນດາບໍລິສັດ ເນື່ອງຈາກບັນຫາເຫຼົ່ານີ້ ໄດ້ສ້າງຜົນເສຍຫາຍຫຼາຍກວ່າຜົນໄດ້ຮັບ ໂດຍສະເພາະຜົນກະທົບຕໍ່ສະພາບແວດລ້ອມ, ຖະໜົນຫົນທາງເປ່ເພ ແລະ ອື່ນໆ.
ທ່ານ ສາຍທອງ ໄຊຍະວົງ ສສຊ ປະຈຳເຂດເລືອກຕັ້ງທີ 15 ແຂວງຈໍາປາສັກ ສະເໜີໃຫ້ລັດຖະບານເອົາໃຈໃສ່ຢ່າງແຂງແຮງ ແລະ ພິຈາລະນາຢ່າງຖີ່ຖ້ວນຮອບຄອບ ກ່ອນອະນຸມັດໃຫ້ມີການຂຸດຄົ້ນເເຮ່ທາດຂອງບັນດາບໍລິສັດ ເນື່ອງຈາກໄລຍະຜ່ານມາ ໄດ້ສ້າງຜົນກະທົບຫຼາຍດ້ານຕໍ່ສິ່ງເເວດລ້ອມເປັນບໍລິເວນກວ້າງ.
ພາບ-ຂ່າວ: (ສພຊ)
