ນາຍົກລັດຖະມົນຕີ ຟາມ ມິງ ຈິ໋ງ ແຫ່ງ ສສ ຫວຽດນາມ ສະແດງຄວາມໝັ້ນໃຈວ່າການມາຢ້ຽມຢາມຂອງຄະນະຜູ້ແທນກະຊວງສຶກສາທິການ ແລະ ກິລາ ຈາກ ສປປ ລາວ ໃນຄັ້ງນີ້ ຈະເຮັດໃຫ້ສາຍພົວພັນພິເສດລະຫວ່າງຫວຽດນາມ-ລາວ ເລິກເຊິ່ງຍິ່ງຂຶ້ນ ພ້ອມທັງສົ່ງເສີມການຮ່ວມມືທີ່ມີປະສິດທິພາບ ແລະ ໜ້າເຊື່ອຖືລະຫວ່າງກະຊວງສຶກສາທິການ ແລະ ຝຶກອົບຮົມຫວຽດນາມ ແລະ ກະຊວງສຶກສາທິການ ແລະ ກິລາລາວ.

ໃນໂອກາດທີ່ຄະນະຜູ້ແທນຈາກກະຊວງສຶກສາທິການ ແລະ ກິລາ ລາວ ຊຶ່ງນຳໂດຍ ທ່ານ ທອງສະລິດ ມັງໜໍ່ເມກ, ເລຂາຄະນະບໍລິຫານງານສູນກາງພັກ, ລັດຖະມົນຕີກະຊວງສຶກສາທິການ ແລະ ກິລາ, ພ້ອມດ້ວຍຄະນະຜູ້ແທນ ໄດ້ເຂົ້າຢ້ຽມຂໍ່ານັບທ່ານ ຟາມ ມິງ ຈິ໋ງ, ນາຍົກ ລັດຖະມົນຕີ ແຫ່ງ ສສ ຫວຽດນາມ ທີ່ຮ່າໂນ້ຍ, ໃນວັນທີ 16 ທັນວາ ຜ່ານມານີ້, ທ່ານນາຍົກລັດຖະມົນຕີຫວຽດນາມ ໄດ້ສົ່ງຄຳຢ້ຽມຢາມຖາມຂ່າວ ມາຍັງຜູ້ນຳພັກ, ລັດ, ລັດຖະບານ ແລະ ສະພາແຫ່ງຊາດລາວ. ທ່ານສະແດງຄວາມໝັ້ນໃຈວ່າການຢ້ຽມຢາມຄັ້ງນີ້ຈະເຮັດໃຫ້ສາຍພົວພັນພິເສດລະຫວ່າງຫວຽດນາມ-ລາວ ເລິກເຊິ່ງຍິ່ງຂຶ້ນ ພ້ອມທັງສົ່ງເສີມການຮ່ວມມືທີ່ມີປະສິດທິພາບ ແລະ ໜ້າເຊື່ອຖືລະຫວ່າງກະຊວງສຶກສາທິການ ແລະ ຝຶກອົບຮົມຫວຽດນາມ ແລະ ກະຊວງສຶກສາທິການ ແລະ ກິລາລາວ.

ທ່ານໄດ້ກ່າວວ່າ ທ່ານເລຂາທິການໃຫຍ່ພັກ ໂຕ ເລິມ ໄດ້ໄປຢ້ຽມຢາມລາວຢ່າງເປັນທາງການເມື່ອບໍ່ດົນມານີ້; ສອງພັກໄດ້ຈັດກອງປະຊຸມຂັ້ນສູງ, ແລະ ນາຍົກລັດຖະມົນຕີຂອງທັງສອງປະເທດໄດ້ຮ່ວມເປັນປະທານກອງປະຊຸມ ຄັ້ງທີ 48 ຂອງຄະນະກຳມະການລະຫວ່າງລັດຖະບານຫວຽດນາມ-ລາວ.

ທ່ານກ່າວຕື່ມວ່າ: ສອງຝ່າຍໄດ້ຕົກລົງເຫັນດີທີ່ຈະເພີ່ມທະວີ ແລະ ຍົກລະດັບສາຍພົວພັນຫວຽດນາມ-ລາວ ສູ່ລະດັບໃໝ່ຂອງ “ມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ, ຄວາມສາມັກຄີທາງຍຸດທະສາດ” ເຊິ່ງການສຶກສາ ແລະ ການຝຶກອົບຮົມໄດ້ຮັບການຍອມຮັບວ່າເປັນຈຸດສຳຄັນໃນການຊຸກຍູ້ສາຍພົວພັນຍຸດທະສາດໃນໄລຍະໃໝ່,

ທ່ານນາຍົກລັດຖະມົນຕີຫວຽດນາມ ຍັງໄດ້ຮຽກຮ້ອງໃຫ້ກະຊວງສຶກສາທິການ ແລະ ກິລາຂອງລາວຮ່ວມມືຢ່າງໃກ້ຊິດກັບກະຊວງສຶກສາທິການ ແລະ ຝຶກອົບຮົມຂອງຫວຽດນາມເພື່ອປະຕິບັດຂໍ້ຕົກລົງລະດັບສູງຜ່ານໂຄງການ ແລະ ໂຄງການທີ່ເປັນຮູບປະທຳ, ໂດຍປະຕິບັດຕາມຫຼັກການຂອງ “ການເຮັດສຳເລັດແຕ່ລະໜ້າວຽກຢ່າງລະອຽດ, ເອົາໃຈໃສ່ ແລະ ໃຫ້ຄວາມສຳຄັນ” ນີ້ ລວມທັງການເລັ່ງການສ້າງຕັ້ງມະຫາວິທະຍາໄລລາວ-ຫວຽດນາມ ແລະ ສູນວັດທະນະທຳຫວຽດນາມໃນລາວ; ການປະສານງານການບັນຈຸນັກສຶກສາລາວ ຈາກເຂດຊາຍແດນເຂົ້າໂຮງຮຽນມັດທະຍົມຕອນປາຍຂອງຫວຽດນາມ; ເສີມຂະຫຍາຍການສອນ ແລະ ການຮຽນຮູ້ພາສາລາວ ແລະ ຫວຽດນາມໃນທັງສອງປະເທດ, ລວມທັງການສະເໜີພາສາຫວຽດນາມເປັນພາສາຕ່າງປະເທດທາງເລືອກໃນໂຮງຮຽນຂອງລາວ. ສອງຝ່າຍຍັງຈະສືບຕໍ່ພັດທະນາໂຄງການແລກປ່ຽນດ້ານວິຊາການ, ເສີມສ້າງການສຶກສາແບບດັ້ງເດີມ, ແລະ ບຳລຸງສ້າງມິດຕະພາບທີ່ຍາວນານ ລະຫວ່າງສອງປະເທດ.

ໃນຂະນະດຽວກັນ, ທ່ານ ທອງສະລິດ ມັງໜໍ່ເມກ ກໍໄດ້ກ່າວລາຍງານໃຫ້ທ່ານນາຍົກລັດຖະມົນຕີ ສສ ຫວຽດນາມ ຮັບຊາບຈຸດປະສົງໃນການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມ ຂອງຄະນະຜູ້ແທນກະຊວງສຶກສາທິການ ແລະ ກິລາ ລາວ ໃນຄັ້ງນີ້ ຊຶ່ງອີງໃສ່ຖະແຫຼງການຮ່ວມ ຄັ້ງທີ 48 ລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມ ໂດຍສະເພາະແມ່ນ ສອງວຽກໃຫຍ່ ຄື: ໂຄງການກໍ່ສ້າງ ມະຫາວິທະຍາໄລ ຫວຽດ-ລາວ ຂຶ້ນທີ່ ສປປ ລາວ ແລະ ໂຄງການ ສອນພາສາລາວ ລຽບຕາມຊາຍແດນ ລາວ-ຫວຽດນາມ. ທ່ານກ່າວວ່າ: “ການກະກຽມຕ່າງໆກຳລັງດຳເນີນຢູ່ສຳລັບການສ້າງຕັ້ງມະຫາວິທະຍາໄລລາວ-ຫວຽດນາມ ໃນລາວ, ລວມທັງການຮັບປະກັນທີ່ດິນທີ່ຕອບສະໜອງມາດຕະຖານ ແລະ ຄວາມຕ້ອງການ, ແລະ ການສຳເລັດແຜນການສຳລັບເນື້ອໃນ, ຂະໜາດ ແລະ ຕາຕະລາງການກໍ່ສ້າງຂອງມະຫາວິທະຍາໄລ. ຝ່າຍລາວຍັງໄດ້ລິເລີ່ມໂຄງການທົດລອງເພື່ອສົ່ງນັກສຶກສາຈາກເຂດຊາຍແດນໄປຮຽນຢູ່ໂຮງຮຽນຫວຽດນາມ. ໃນລາວ, ມີສະຖາບັນການສຶກສາ 13 ແຫ່ງທີ່ສອນພາສາຫວຽດນາມແລ້ວ, ໃນຂະນະທີ່ໂຄງການຝຶກອົບຮົມຄູສອນພາສາລາວ ແລະ ຫວຽດນາມ ສືບຕໍ່ຂະຫຍາຍການສອນພາສາໃນແຕ່ລະປະເທດ”.

ທ່ານ ທອງສະລິດ ມັງໜໍ່ເມກ ຍັງໄດ້ສະແດງຄວາມຂອບໃຈຢ່າງສູງ ຕໍ່ການສະໜັບສະໜູນໄລຍະຍາວຂອງຫວຽດນາມ ໃນການຝຶກອົບຮົມຊັບພະຍາກອນມະນຸດ, ຊຶ່ງທ່ານໄດ້ເນັ້ນໜັກວ່າ ສປປ ລາວ ໄດ້ວາງຍຸດທະສາດການພັດທະນາແຫ່ງຊາດຈົນຮອດປີ 2035 ແລະ ຊອກຫາການສະໜັບສະໜູນຢ່າງຕໍ່ເນື່ອງຈາກຫວຽດນາມ ໃນການຝຶກອົບຮົມຊັບພະຍາກອນມະນຸດ ໃນຂະແໜງການທີ່ສຳຄັນ, ໂດຍສະເພາະແມ່ນວິທະຍາສາດ, ເຕັກໂນໂລຊີ ແລະ ກິລາ, ໂດຍມີຄວາມໝັ້ນໃຈວ່າ ຫວຽດນາມຈະຍັງຄົງເປັນຄູ່ຮ່ວມງານທີ່ໜ້າເຊື່ອຖືໃນດ້ານການສຶກສາ, ການຝຶກອົບຮົມ ແລະ ກິລາ.

ທີ່ມາ: ສຳນັກຂ່າວ VOA, Vietnam News

ຮຽບຮຽງໂດຍ: ສຸກສາຄອນ ສີປະເສີດ