ໂຮງຮຽນນານາຊາດອົດສະຕຣາລີ (AIS) ໄດ້ຈັດພິທີວາງສີລາລຶກກໍ່ສ້າງອາຄານອະນຸບານຫຼັງໃໝ່ຢ່າງເປັນທາງການ ເປັນຂີດໝາຍປະຫວັດສາດສຳຄັນສຳລັບອະນາຄົດຂອງການສຶກສາລະດັບປະຖົມ ໃນ ສປປ ລາວ ແລະ ເປັນການເປີດຕົວໂຄງການອັນຍິ່ງໃຫຍ່ ແລະ ເຕັມໄປດ້ວຍຄວາມມຸ່ງໝັ້ນ ທີ່ຈະສ້າງສະພາບແວດລ້ອມການຮຽນຮູ້ທີ່ທັນສະໄໝລະດັບໂລກ ເພື່ອສະໜອງຫຼັກສູດການສຶກສາຊັ້ນອະນຸບານທີ່ດີເລີດທີ່ສຸດໃນປະເທດ.

ພິທີວາງສີລາລຶກຄັ້ງນີ້ ໄດ້ຈັດຂຶ້ນເມື່ອວັນທີ 19 ທັນວາ 2025 ທີ່ໂຮງຮຽນດັ່ງກ່າວ, ໂດຍພາຍໃຕ້ການເປັນປະທານຂອງ ທ່ານ ປອ ຄຳແສນ ສີສະວົງ ສະມາຊິກສະພາແຫ່ງຊາດ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ, ປະທານສະມາຄົມການສຶກສາພາກເອກະຊົນ ທັງເປັນປະທານກຸ່ມການສຶກສາແສງສະຫວັນ, ໃຫ້ກຽດເຂົ້າຮ່ວມຂອງ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ (LNCCI), ທ່ານ ບຸນທັນ ແສງມະນີ ຮອງຫົວໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ ແລະ ທ່ານ ນາງ ສັກດີນາ ໂຣຊານ (Ms. Sakdina Rosant) ຜູ້ອຳນວຍການໂຮງຮຽນນານາຊາດອົດສະຕຣາລີ, ປະທານສະພາການຄ້າອາເມຣິກາ ປະຈໍາ ສປປ ລາວ (AmCham), ປະທານສະມາຄົມນັກທຸລະກິດໜຸ່ມແຫ່ງຊາດລາວ, ພ້ອມດ້ວຍຄະນະບໍລິຫານຈາກສະພາການຄ້າອົດສະຕຣາລີ ແລະ ບັນດາອົງການຈັດຕັ້ງພາກລັດຢ່າງພ້ອມພຽງ.

ວຽກງານດັ່ງກ່າວ, ເປັນການຢັ້ງຢືນເຖິງຄວາມມຸ່ງໝັ້ນຂອງ AIS ໃນການຍົກລະດັບມາດຕະຖານໃໝ່ໃຫ້ແກ່ການສຶກສາລະດັບປະຖົມໄວ, ຫົວໃຈຫຼັກຂອງໂຄງການນີ້ແມ່ນການສຸມໃສ່ຢ່າງຕັ້ງໜ້າໃນການກໍ່ສ້າງອາຄານອະນຸບານທີ່ກ້າວໜ້າ ແລະ ທັນສະໄໝທີ່ສຸດໃນປະເທດ, ການອອກແບບ ແລະ ໂຄງຮ່າງພື້ນຖານຂອງອາຄານໄດ້ຖືກສ້າງຂຶ້ນຢ່າງພິຖີພິຖັນຕັ້ງແຕ່ຮາກຖານ ເພື່ອສ້າງສະພາບແວດລ້ອມທີ່ດີທີ່ສຸດ, ຊ່ວຍກະຕຸ້ນການຮຽນຮູ້ ແລະ ມີຄວາມປອດໄພ ເໝາະສົມສຳລັບເດັກນ້ອຍໃນໄວຮຽນ, ສະພາບແວດລ້ອມທີ່ຖືກສ້າງຂຶ້ນໂດຍສະເພາະນີ້ ແມ່ນພື້ນຖານທີ່ສຳຄັນທີ່ໂຮງຮຽນຈະໃຊ້ໃນການສະໜອງຫຼັກສູດອະນຸບານທີ່ດີເລີດ, ຮັບປະກັນວ່າເດັກທຸກຄົນໄດ້ຮັບຜົນປະໂຫຍດຈາກສະພາບແວດລ້ອມການສຶກສາທີ່ເໜືອກວ່າ ທີ່ຊ່ວຍກະຕຸ້ນຄວາມຢາກຮູ້ຢາກເຫັນ, ບົ່ມເພາະການພັດທະນາແບບຮອບດ້ານ ແລະ ສ້າງມາດຕະຖານສູງສຸດສຳລັບຄວາມເປັນເລີດໃນການສຶກສາລະດັບປະຖົມ.

ການເລີ່ມຕົ້ນໂຄງການຢ່າງເປັນທາງການນີ້, ສະແດງໃຫ້ເຫັນເຖິງການລົງທຶນຄັ້ງສຳຄັນທີ່ຈະສ້າງການປ່ຽນແປງໃຫ້ແກ່ຄົນຮຸ່ນໃໝ່ຂອງ ສປປ ລາວ ດ້ວຍການປະສົມປະສານຄວາມທຸ້ມເທ ແລະ ຄວາມເອົາໃຈໃສ່ຕໍ່ຄວາມເປັນເລີດທາງການສຶກສາ ເຂົ້າກັບວິໄສທັດທີ່ທັນສະໄໝ ແລະ ກ້າຫານ, ໂຮງຮຽນນານາຊາດອົດສະຕຣາລີ ພ້ອມແລ້ວທີ່ຈະຮັບປະກັນວ່ານັກຮຽນຂອງຕົນ ຈະໄດ້ຮັບການປະກອບສ້າງດ້ວຍທັກສະພື້ນຖານ ແລະ ແນວຄວາມຄິດທີ່ຈຳເປັນ ເພື່ອໃຫ້ສາມາດປະສົບຜົນສຳເລັດໃນໂລກແຫ່ງອະນາຄົດ.

ຂ່າວໂດຍ: ບົວລະພາ

ຂ່າວ​ທີ່​ກ່ຽວ​ຂ້ອງ