ນັກສຶກສາລາວທີ່ກຳລັງສຶກສາຢູ່ ມະຫາວິທະຍາໄລວິງ (Vinh University) ສສ ຫວຽດນາມ ໄດ້ສ້າງຜົນງານອັນດີເດັ່ນ ແລະ ນຳເອົາຄວາມພາກພູມໃຈມາໃຫ້ປະເທດຊາດ ດ້ວຍການຄວ້າລາງວັນອັນດັບ 3 ໃນງານແຂ່ງຂັນ “ຮ້ອງເພງນັກສຶກສາ” ສົກຮຽນ 2025-2026.

​ງານແຂ່ງຂັນດັ່ງກ່າວ ໄດ້ຈັດຂຶ້ນຢ່າງຍິ່ງໃຫຍ່ ເນື່ອງໃນໂອກາດສະເຫຼີມສະຫຼອງວັນຄ້າຍວັນເກີດຂອງ ປະທານ ໂຮ່ຈີມິນ ຄົບຮອບ 136 ປີ (19/05/1890 – 19/05/2026) ແລະ ຄົບຮອບ 115 ປີ ແຫ່ງວັນທີ່ທ່ານ ໂຮ່ຈີມິນ ອອກເດີນທາງຊອກຫາເສັ້ນທາງກູ້ຊາດ (05/06/1911 – 05/06/2026). ​ໃນປີນີ້ ຖືເປັນຄັ້ງທຳອິດທີ່ຕົວແທນນັກສຶກສາລາວ ຈຳນວນ 37 ຄົນ ພາຍໃຕ້ການນຳພາຂອງຄະນະນັກສຶກສາລາວ ສົກຮຽນ 2025-2026 ໄດ້ເຂົ້າຮ່ວມການສະແດງ ດ້ວຍຄວາມຕັ້ງໃຈ ແລະ ເຕັມໄປດ້ວຍພອນສະຫວັນ, ທີມນັກສຶກສາລາວສາມາດຖ່າຍທອດສິລະປະ-ວັດທະນະທຳອັນງົດງາມຂອງລາວ ຜ່ານການຟ້ອນ ແລະ ຮ້ອງເພງ ທີ່ສະແດງໃຫ້ເຫັນເຖິງໄຊຊະນະ, ຄວາມອຸດົມຮັ່ງມີ, ຄວາມສາມັກຄີຂອງປະຊາຊົນຫວຽດນາມ ພ້ອມທັງສ່ອງແສງໃຫ້ເຫັນເຖິງມິດຕະພາບອັນຍືນຍົງລະຫວ່າງສອງຊາດ ລາວ-ຫວຽດນາມ ໄດ້ຢ່າງເລິກເຊິ່ງ ຈົນສາມາດຊະນະໃຈຄະນະກຳມະການ ແລະ ຄວ້າລາງວັນອັນດັບ 3 ມາຄອງໄດ້ຢ່າງສົດໃສ.

ການຮ່ວມງານໃນຄັ້ງນີ້ ບໍ່ພຽງແຕ່ເປັນການສະແດງຄວາມສາມາດເທົ່ານັ້ນ ແຕ່ເປັນຄວາມພາກພູມໃຈອັນຍິ່ງໃຫຍ່ ທີ່ນັກສຶກສາລາວໄດ້ມີສ່ວນຮ່ວມໃນເຫດການປະຫວັດສາດອັນສຳຄັນຂອງມະຫາວິທະຍາໄລ ແລະ ຂອງປະເທດຫວຽດນາມ. ເຊິ່ງ​ຜົນສຳເລັດດັ່ງກ່າວ ເປັນສິ່ງຢັ້ງຢືນເຖິງສັກກາຍະພາບຂອງນັກສຶກສາລາວ ໃນການກ້າຄິດ, ກ້າສະແດງອອກ ແລະ ພັດທະນາຕົນເອງໃນເວທີສາກົນ. ພ້ອມດຽວກັນນັ້ນ, ຍັງເປັນການປະກອບສ່ວນອັນສຳຄັນໃນການຮັດແໜ້ນ, ເສີມສ້າງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ – ຫວຽດນາມ ໃຫ້ໝັ້ນຄົງຂະໜົງແກ່ນຊົ່ວກາລະນານ.