ສປປ ລາວ ຮ່ວມເປັນປະເທດຜູ້ສ້າງຕັ້ງ “ອົງການຮ່ວມມືປັນຍາປະດິດໂລກ” ທີ່ນະຄອນຊຽງໄຮ້ ມຸ່ງເນັ້ນພັດທະນາ AI ຢ່າງປອດໄພ ແລະ ຍຸຕິທຳ
21/07/2026
ຕາມຂ່າວສານວິທະຍຸ-ໂທລະພາບ ສູນກາງຈີນ (CMG) ລາຍງານວ່າ: ໃນວັນທີ 16 ກໍລະກົດ 2026 ນີ້, ໄດ້ມີພິທີລົງນາມໃນສັນຍາສ້າງຕັ້ງ “ອົງການຮ່ວມມືປັນຍາປະດິດໂລກ” (World Artificial Intelligence Cooperation Organization ຫຼື WAICO) ຢ່າງເປັນທາງການ ທີ່ນະຄອນຊຽງໄຮ້, ສປ ຈີນ. ໃນໂອກາດອັນສະຫງ່າລາສີນີ້, ທ່ານ ຫວາງຢີ້ ກຳມະການກົມການເມືອງສູນກາງພັກກອມມູນິດຈີນ, ລັດຖະມົນຕີກະຊວງການຕ່າງປະເທດ ໄດ້ຕາງໜ້າໃຫ້ແກ່ລັດຖະບານຈີນ ເປັນຜູ້ລົງນາມໃນສັນຍາປະຫວັດສາດສະບັບນີ້.
ສັນຍາສ້າງຕັ້ງດັ່ງກ່າວ ໄດ້ລະບຸຢ່າງຈະແຈ້ງວ່າ: ອົງການຮ່ວມມືປັນຍາປະດິດໂລກ ແມ່ນອົງການຈັດຕັ້ງສາກົນລະຫວ່າງລັດຖະບານທີ່ມີຄວາມເປັນອິດສະຫຼະ ໂດຍຍຶດໝັ້ນ ແລະ ເຄົາລົບ “ກົດບັດສະຫະປະຊາຊາດ” ຢ່າງເຂັ້ມງວດ. ອົງການນີ້ຈະດຳເນີນງານພາຍໃຕ້ວິໄສທັດ “ປຶກສາຫາລືຮ່ວມກັນ, ສ້າງສາຮ່ວມກັນ ແລະ ຊົມໃຊ້ຜົນປະໂຫຍດຮ່ວມກັນ” ໂດຍຖືເອົາມະນຸດເປັນສູນກາງ. ຈຸດປະສົງຫຼັກແມ່ນເພື່ອຊຸກຍູ້ການຮ່ວມມືສາກົນ ແລະ ປັບປຸງລະບົບການບໍລິຫານຈັດການປັນຍາປະດິດ (AI) ໃນລະດັບທົ່ວໂລກ ເພື່ອຮັບປະກັນໃຫ້ເຕັກໂນໂລຊີ AI ມີການຂະຫຍາຍຕົວຢ່າງປອດໃສ, ມີລະບຽບຮຽບຮ້ອຍ, ປອດໄພ, ຍຸຕິທຳ ແລະ ສ້າງຜົນປະໂຫຍດອັນແທ້ຈິງໃຫ້ແກ່ມວນມະນຸດ ໂດຍມີສຳນັກງານໃຫຍ່ຕັ້ງຢູ່ ນະຄອນຊຽງໄຮ້.
ໃນພິທີດັ່ງກ່າວ, ທ່ານ ທອງສະຫວັນ ພົມວິຫານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຜູ້ຕາງໜ້າລະດັບສູງຈາກອີກ 28 ປະເທດ ເປັນຕົ້ນແມ່ນ ຣັດເຊຍ, ກາຊັກສະຖານ, ປາກິດສະຖານ ແລະ ອິນໂດເນເຊຍ ໄດ້ຮ່ວມລົງນາມໃນສັນຍາສະບັບນີ້ ແລະ ໄດ້ກາຍເປັນປະເທດຮ່ວມສ້າງຕັ້ງອົງການດັ່ງກ່າວຢ່າງເປັນທາງການ.
ນອກຈາກນີ້, ພິທີດັ່ງກ່າວຍັງໄດ້ຮັບກຽດເຂົ້າຮ່ວມຈາກຜູ້ຕາງໜ້າຂອງຫຼາຍປະເທດ ແລະ ອົງການຈັດຕັ້ງສາກົນຕ່າງໆ ເຊິ່ງລວມມີ ທ່ານ ອັນໂຕນີໂອ ກູເຕີເລດ (António Guterres) ເລຂາທິການໃຫຍ່ອົງການສະຫະປະຊາຊາດ ທີ່ໄດ້ເຂົ້າຮ່ວມເປັນສັກຂີພິຍານໃນເຫດການຄັ້ງປະຫວັດສາດນີ້ດ້ວຍ.
