ລັດຖະບານຍີ່ປຸ່ນ ສະໜອງທຶນຊ່ວຍເຫຼືອລ້າ 378 ລ້ານເຢນ ເພື່ອພັດທະນາຊັບພະຍາກອນມະນຸດ ຢູ່ ສປປ ລາວ ພາຍໃຕ້ໂຄງການ JDS ສົກປີ 2026
21/07/2026
ໃນວັນທີ 15 ກໍລະກົດ 2026, ໄດ້ມີພິທີລົງນາມໃນສັນຍາຊ່ວຍເຫຼືອລ້າ ສໍາລັບ “ໂຄງການສະໜອງທຶນການສຶກສາເພື່ອພັດທະນາຊັບພະຍາກອນມະນຸດ (JDS) ສົກປີ 2026” ຢ່າງເປັນທາງການ ລະຫວ່າງ ກະຊວງການເງິນ ແຫ່ງ ສປປ ລາວ ແລະ ອົງການຮ່ວມມືສາກົນຍີ່ປຸ່ນ (JICA) ປະຈໍາ ສປປ ລາວ, ຕາງໜ້າລົງນາມໂດຍ ທ່ານ ວົງຄໍາແຫງ ວົງທະຈັກ ຫົວໜ້າກົມຮ່ວມມື ແລະ ການເງິນສາກົນ ກະຊວງການເງິນ ແລະ ທ່ານ ນາງ ໂຄບາຢາຊິ ມິຢາໂກະ ຫົວໜ້າອົງການໄຈກາ (JICA) ປະຈໍາ ສປປ ລາວ, ໂດຍມີຕາງໜ້າຈາກພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ພາຍໃຕ້ຂໍ້ຕົກລົງສະບັບນີ້, ລັດຖະບານຍີ່ປຸ່ນ ໄດ້ສະໜອງທຶນຊ່ວຍເຫຼືອລ້າ ຈຳນວນ 378 ລ້ານເຢນ ຫຼື ປະມານ 2,3 ລ້ານໂດລາສະຫະລັດ ເພື່ອມອບໂອກາດໃຫ້ແກ່ບຸກຄະລາກອນພາກລັດຂອງລາວ ທີ່ໄດ້ຮັບການຄັດເລືອກ ຈຳນວນ 21 ທ່ານ ໃນແຕ່ລະປີ ໄດ້ໄປສຶກສາຕໍ່ໃນລະດັບປະລິນຍາໂທ ແລະ ປະລິນຍາເອກ ຢູ່ບັນດາມະຫາວິທະຍາໄລຊັ້ນນໍາ ທີ່ປະເທດຍີ່ປຸ່ນ ໃນສາຂາວິຊາທີ່ເປັນບຸລິມະສິດສູງ ແລະ ມີຄວາມຈຳເປັນຕໍ່ການພັດທະນາເສດຖະກິດ-ສັງຄົມ ແຫ່ງຊາດ ຂອງ ສປປ ລາວ.
ໂຄງການທຶນການສຶກສາ JDS ໄດ້ເລີ່ມຈັດຕັ້ງປະຕິບັດຢູ່ ສປປ ລາວ ຕັ້ງແຕ່ປີ 2000 ເປັນຕົ້ນມາ ຢ່າງຕໍ່ເນື່ອງ. ມາຮອດປັດຈຸບັນ, ມີບຸກຄະລາກອນພາກລັດຂອງລາວ ທັງໝົດ 551 ທ່ານ ທີ່ໄດ້ຮັບທຶນໄປສຶກສາຕໍ່ຢູ່ປະເທດຍີ່ປຸ່ນ ແລະ ໄດ້ນຳເອົາຄວາມຮູ້ຄວາມສາມາດກັບຄືນມາພັດທະນາປະເທດຊາດ. ສໍາລັບສົກປີ 2026 ນີ້, ມີຜູ້ໄດ້ຮັບທຶນ JDS ຈຳນວນ 21 ທ່ານ ທີ່ກຳລັງກະກຽມຈະເດີນທາງໄປສຶກສາຕໍ່ ທີ່ປະເທດຍີ່ປຸ່ນ ໃນເດືອນສິງຫາ ທີ່ຈະມາເຖິງນີ້.
ສຳລັບຜູ້ທີ່ສົນໃຈສະໝັກທຶນ JDS ສົກປີໃໝ່ ທີ່ກຳລັງຈະເປີດຮັບສະໝັກໃນໄວໆນີ້, ສາມາດຕິດຕາມຂໍ້ມູນຂ່າວສານ ແລະ ລາຍລະອຽດເພີ່ມເຕີມໄດ້ທີ່ ເຟດບຸກເພຈ: JICA Laos ຫຼື JDS Laos.
