ທ່ານ ລັດຖະມົນຕີ ກະຊວງສຶກສາທິການ ແລະ ກິລາ (ສສກ) ເນັ້ນໜັກໃຫ້ຄະນະຊາວໜຸ່ມ ແລະ ສະມາຊິກຊາວໜຸ່ມແຕ່ລະຂັ້ນທີ່ສັງກັດຢູ່ໃນການຈັດຕັ້ງ ທີ່ເຄື່ອນໄຫວວຽກງານການສຶກສາ, ວິທະຍາສາດ ແລະ ກິລາ ສຸມໃສ່ປະຕິບັດໜ້າທີ່ການເມືອງຢ່າງໜັກແໜ້ນ ແນໃສ່ເຮັດໃຫ້ວຽກງານໄດ້ຮັບໝາກຜົນ ແລະ ເປັນໄປຕາມແຜນທີ່ກຳນົດໄວ້.

ເມື່ອບໍ່ດົນມານີ້, ທີ່ຫ້ອງປະຊຸມ ກະຊວງສຶກສາທິການ ແລະ ກິລາ (ຕຶກໄອຊີທີ) ໄດ້ມີພິທີພົບປະໂອ້ລົມຂອງສະຫາຍເລຂາຄະນະບໍລິຫານງານພັກກະຊວງຕໍ່ຄະນະບໍລິຫານງານຊາວໜຸ່ມ, ສະມາຊິກຊາວໜຸ່ມທົ່ວຂະແໜງສຶກສາ-ກິລາ ໂອກາດສະເຫຼີມສະຫຼອງວັນຄູແຫ່ງຊາດ (7 ຕຸລາ) ຄົບຮອບ 29 ປີ ພ້ອມທັງປະກາດການແຕ່ງຕັ້ງຄະນະບໍລິຫານງານ ສະມາຄົມຊາວໜຸ່ມນັກຮຽນ, ນັກສຶກສາຂອງ ຄຊປປລ ກະຊວງສຶກສາທິການ ແລະ ກິລາ ສະໄໝທີ I ໂດຍພາຍໃຕ້ການເປັນປະທານ ແລະ ໂອ້ລົມຂອງສະຫາຍ ຮສ.ປອ ພຸດ ສິມມາລາ​ວົງ ກຳມະການ​ສູນ​ກາງ​ພັກ ເລຂາຄະນະບໍລິຫານ​ງານ​ພັກ​ກະຊວງ, ລັດຖະມົນຕີ ກະຊວງສຶກສາທິການ ແລະ ກິລາ, ມີສະຫາຍ ນາງ ວຽງແກ້ວ ພົມມະວົງ ຄະນະປະຈໍາພັກກະຊວງ, ຜູ້ຊີ້ນໍາສາມອົງການຈັດຕັ້ງມະຫາຊົນ ກະຊວງສຶກສາທິການ ແລະ ກິລາ​​, ສະຫາຍ ປອ ຕຸດາວັນ ໜໍ່ເມືອງເສດ ເລຂາທິການສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມ ກະຊວງສຶກສາທິການ ແລະ ກິລາ​​ ພ້ອມດ້ວຍບັນດາກໍາມະການສູນກາງຊາວໜຸ່ມ, ຫົວໜ້າຫ້ອງການ, ກົມ, ຜູ້ຕາງໜ້າຫ້ອງການ, ກົມ ຈາກສູນກາງຊາວໜຸ່ມ, ຮອງເລຂາ, ຄະນະປະຈໍາ, ຄະນະບໍລິຫານງານຊາວໜຸ່ມກະຊວງ, ເລຂາ-ຮອງເລຂາ, ຄະນະບໍລິຫານງານຊາວໜຸ່ມສໍານັກກະຊວງ, ວິທະຍາໄລອ້ອມຂ້າງກະຊວງ, ສະມາຄົມການສຶກສາພາກເອກະຊົນ, ມະຫາວິທະຍາໄລ, ວິທະຍາໄລຄູ, ສະຖານອາຊີວະສຶກສາ, ພະແນກສຶກສາທິການ ແລະ ກິລາແຂວງເຂົ້າຮ່ວມແບບເຊິ່ງໜ້າ ແລະ ອອນລາຍ.

ໃນໂອກາດດັ່ງກ່າວ, ສະຫາຍ ຮສ.ປອ ພຸດ ສິມມາລາ​ວົງ ໄດ້ກ່າວໂອ້ລົມໃຫ້ຄະນະຊາວໜຸ່ມ ແລະ ສະມາຊິກຊາວໜຸ່ມແຕ່ລະຂັ້ນທີ່ສັງກັດຢູ່ໃນການຈັດຕັ້ງ ທີ່ເຄື່ອນໄຫວວຽກງານການສຶກສາ, ວິທະຍາສາດ ແລະ ກິລາ ຈະຕ້ອງໄດ້ສຸມໃສ່ປະຕິບັດໜ້າທີ່ການເມືອງ ເປັນຕົ້ນແມ່ນ ການນໍາຊາວໜຸ່ມແຕ່ລະຂັ້ນ ຕ້ອງເອົາໃຈໃສ່ວຽກງານແນວຄິດການເມືອງຕໍ່ສະມາຊິກໃຫ້ມີຄວາມເຊື່ອໝັ້ນ ແລະ ມີຄວາມອຸ່ນອ່ຽນທຸ່ນທ່ຽງ ໃນການນໍາພາຂອງພັກ-ລັດ ຕໍ່ໜ້າສະພາບການປັດຈຸບັນທີ່ປະເທດຊາດຂອງພວກເຮົາກໍາລັງພົບພໍ້ ໂດຍສະເພາະສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ, ບັນຫາຢາເສບຕິດ (ວາລະແຫ່ງຊາດ) ແລະ ອື່ນໆ  ພ້ອມທັງເປັນເຈົ້າການໃນການສົ່ງເສີມ, ຈັດຕັ້ງປະຕິບັດ ແລະ ຜັນຂະຫຍາຍວຽກງານວິຊາສະເພາະຂອງຕົນໃຫ້ມີຜົນສໍາເລັດ ດ້ວຍຈິດໃຈບຸກທະລຸ ແລະ ຫັນປ່ຽນຢ່າງແຂງແຮງ; ຝຶກຝົນຕົນເອງໃຫ້ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທໍາປະຕິວັດ ແລະ ແບບແຜນການກໍາລົງຊີວິດອັນຖືກຕ້ອງ ແລະ ມູນເຊື້ອຂອງຊາດ, ຂອງພັກ, ຂອງຊາດ ໃຫ້ກວ້າງຂວາງ ແລະ ເລິກເຊິ່ງ; ຄົ້ນຄວ້າສຶກສາຮໍ່າຮຽນ, ຮຽນຮູ້ວິທະຍາສາດເຕັກໂນໂລຊີ ແລະ ນະວັດຕະກໍາອັນໃໝ່ໆ.

ພ້ອມກັນນັ້ນ, ກໍໃຫ້ຕິດ​ຕາມ, ກວ​ດ​ກາ, ໃຫ້ຄໍາປຶກສາ,  ປະຊາສໍາພັນ, ແຈ້ງຂໍ້ມູນຂ່າວສານທີ່ຖືກຕ້ອງ, ຕົວຈິງ ແລະ  ເປັນທາງການໃຫ້ສະມາຊິກຊາວໜຸ່ມຂອງຕົນ ທີ່ເປັນພະນັກງານ, ຄູອາຈານ ແລະ ນັກຮຽນ-ນັກສຶກສາຢ່າງວ່ອງໄວທົ່ວເຖິງ; ​ມີ​ສະ​ຕິ​ໃນ​ການ​ບໍ​ລິ​ໂພກ​ຂ່າວ​ສານ​ທາງ​ສື່​ອອນ​ໄລ​ຕ່າງໆ, ຕີຖອຍຂໍ້ມູນທີ່ບິດເບືອນ,​ ສ້າງສະຖານະການເຮັດໃຫ້ສັງຄົມເກີດມີຄວາມສັບສົນ, ລະແວງສົງໃສຕ່າງໆ; ຊາວໜຸ່ມຕ້ອງຮຽນຮູ້ 5 ທັກສະ ຄື: ວິຊາສະເພາະ ຄວາມເປັນຊ່ຽວຊານ, ການບໍລິຫານ (ວຽກງານ, ສຸຂະພາບ), ພາສາຕ່າງປະເທດ ຊາວໜຸ່ມຢ່າງໜ້ອຍ 3 ພາສາ, ຄອມພິວເຕີ; ຊາວໜຸ່ມຫັນລົງສູ້ຮາກຖານ; ຊາວໜຸ່ມຊ່ວຍຄະນະນໍາແກ້ໄຂ 3 ບັນຫາ ຄື: ຂາດແຄນຄູ, ລະດົມນັກຮຽນເຂົ້າມາຮຽນໃຫ້ຫຼາຍ, ບໍ່ຢາກຮຽນຕໍ່ວິຊາຊີບ, ມະຫາວິທະຍາໄລ (ຢ້ານບໍມີວຽກເຮັດງານທໍາ); ວຽກງານກິລາ ຕ້ອງສ້າງໃຫ້ໄດ້ນັກກິລາທີ່ດີເດັ່ນ; ການຄົ້ນຄວ້າວິທະຍາສາດ ສໍາຄັນຕ້ອງແມ່ນຄົນທີ່ມີຄວາມສາມາດ; ຕໍ່ກັບສະມາຄົມຊາວໜຸ່ມນັກຮຽນ, ນັກສຶກສາ ແມ່ນເຫັນດີຕາມແຜນທີ່ວາງໄວ້ ໂດຍມອບໃຫ້ຄະນະຊາວໜຸ່ມກະຊວງ ກໍຄືຄະນະບໍລິຫານງານສະມາຄົມຂອງຄະນະຊາວໜຸ່ມ ກະຊວງສຶກສາທິການ ແລະ ກິລາ ສະໄໝທີ I ນີ້  ເອົາໃຈໃສ່ຢ່າງແຂງແຮງໃນການເຜີຍແຜ່ຜັນຂະຫຍາຍການຈັດຕັ້ງ ແລະ ການເຄື່ອນໄຫວຂອງສະມາຄົມທົ່ວຂະແໜງສຶກ ແລະ ກິລາ ໃຫ້ກວ້າງຂວາງ, ຈັດຕັ້ງປະຕິບັດແຜນການເຄື່ອນໄຫວວຽກງານສະມາຄົມຊາວໜຸ່ມນັກຮຽນ, ນັກສຶກສາ ຄັ້ງທີ I (ໄລຍະ 2023-2025) ຂອງຊາວໜຸ່ມ ກະຊວງສຶກສາທິການ ແລະ ກິລາ ໃຫ້ມີຜົນສໍາເລັດ, ສ້າງເປັນແຜນສະເພາະ, ກິດຈະກໍາລະອຽດ.

ນອກຈາກນັ້ນ, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງສະພາບແຜນພັດທະນາການສຶກສາ ໃນ ສປປ ລາວ ສົກ 2022-2023, ພາລະບົດບາດ ແລະ ສິ່ງທ້າທາຍຂອງຊາວໜຸ່ມຕໍ່ກັບວຽກງານການຄົ້ນຄວ້າວິທະຍາສາດ, ການຊອກວຽກເຮັດງານທຳ, ມະຕິຕົກລົງຂອງຄະນະບໍລິຫານງານພັກ ກະຊວງສຶກສາທິການ ແລະ ກິລາ ສະບັບເລກທີ 253/ຄພສກ ລົງວັນທີ 2 ສິງຫາ 2023 ວ່າດ້ວຍການແຕ່ງຕັ້ງຄະນະບໍລິຫານງານ ສະມາຄົມຊາວໜຸ່ມນັກຮຽນ, ນັກສຶກສາ ຂອງຊາວໜຸ່ມ ກະຊວງສຶກສາທິການ ແລະ ກິລາ ສະໄໝທີ I, ແຜນການເຄື່ອນໄຫວວຽກງານສະມາຄົມຊາວໜຸ່ມນັກຮຽນ, ນັກສຶກສາ ຄັ້ງທີ I (2023-2025) ຂອງຊາວໜຸ່ມ ກະຊວງສຶກສາທິການ ແລະ ກິລາ.

ໂດຍ ບົວລະພາ

ຂ່າວ​ທີ່​ກ່ຽວ​ຂ້ອງ