ຄະນະຜູ້ແທນລາວ ຊຶ່ງນໍາພາໂດຍທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ເຂົ້າຮ່ວມກອງປະຊຸມສາກົນ ຄັ້ງທີ 8 ກ່ຽວກັບການສຶກສາພົນລະເມືອງໂລກ ຫຼື Global Citizenship Education (GCED) ໃນຫົວຂໍ້ ເປີດການສຶກສາພົນລະເມືອງໂລກ: ການຫັນປ່ຽນການຮຽນຮູ້ເພື່ອສ້າງຄວາມເຂັ້ມແຂງທີ່ສໍາຄັນ (Unpacking GCED: Transformative Learning for Critical Empowerment)  ຈັດຂຶ້ນໃນລະ​ຫວ່າງວັນທີ 18-19 ຕຸລາ 2023 ທີ່ Seoul ສ.ເກົາຫຼີ ແລະ ກອງປະຊຸມວິຊາການຄູ່ຮ່ວມງານການພັດທະນາ ແລະ  ແຊກຊ້ອນການສຶກສາພົນລະເມືອງໂລກເຂົ້າໃນຫຼັກສູດ ໃນວັນທີ 20-21 ຕຸລາ 2003  ໂດຍມີຜູ້ຕິດຕາມ ແລະ ເຂົ້າຮ່ວມຈາກກົມຮ່ວມມືກັບຕ່າງປະເທດ ແລະ ສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກິລາ ແຫ່ງ ສປປ ລາວ, ພ້ອມດ້ວຍບັນດາຜູ້ກຳ​ນົດນະໂຍບາຍການ​ສຶກ​ສາ,​ ຜູ້ຊ່ຽວຊານ ແລະ ຜູ້​ປະ​ຕິ​ບັດ GCED,  ນັກການສຶກສາ, ຄູ​ສອນ ແລະ ຊາວໜຸ່ມ, ອົງການຈັດຕັ້ງສາກົນ, ອົງການຈັດຕັ້ງທາງ​ສັງຄົມ, ໜ່ວຍ​ງານ ແລະ ສະຖາບັນ​ທີ່​ມີ​ຄວາມ​ຊ່ຽວ​ຊານ​ດ້ານ GCED ແລະ ບັນ​ດາຜູ້ຕາງໜ້າພາກເອກະຊົນທັງໝົດຫຼາຍກວ່າ 200 ທ່ານ.

ການຈັດກອງ​ປະ​ຊຸມດັ່ງກ່າວນີ້, ແມ່ນເພື່ອສົນທະນາບັນດາສິ່ງທ້າທາຍ, ໂອກາດໃນການຜັນ​ຂະ​ຫຍາຍນິຍາມການສຶກສາພົນລະເມືອງໂລກໃຫ້ເປັນຮູບປະທໍາໃນການປະຕິບັດຕົວຈິງ, ພ້ອມທັງແນະນໍາວິທີການສອນແບບໃໝ່ ແລະ ການປະຕິບັດທີ່ດີ ກ່ຽວກັບ GCED ແລະ ການຖອດຖອນບົດຮຽນ, ແລະ ເພື່ອຮັດແໜ້ນການຮ່ວມມືກັບຄູ່ຮ່ວມໂຄງ​ການປະເທດຕ່າງໆ ໂດຍນໍາສະເໜີຜົນສໍາເລັດ ແລະ ສິ່ງທ້າທາຍໃນການຈັດຕັ້ງປະຕິບັດໂຄງການ. ​

ໃນກອງປະຊຸມ,  ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ນໍາ ສະເໜີວິໄສທັດຂອງການພັດທະນາການສຶກສາຂອງ ສປປ ລາວ ຮອດປີ 2030, ແຜນ 5 ປີຂອງຂະແໜງການສຶກສາ ແລະ ກິລາ, ການພົວພັນລະຫວ່າງ GCED ຊຶ່ງໃນ​ບົດ​ສະ​ເໜີ, ທ່ານ​ໄດ້​ກ່າວ​ວ່າ: ກະຊວງສຶກສາທິການ ແລະ ກິລາ ສປປ ລາວ ໄດ້ຮັບຮອງເອົາແຜນພັດທະນາຂະແໜງການສຶກສາ ແລະ ກິລາ ໄລຍະ 2021-2025 ແນໃສ່ສ້າງ ໂອກາດໃຫ້ເດັກນ້ອຍ ແລະ ຊາວໜຸ່ມທຸກຄົນໄດ້ເຂົ້າເຖິງການສຶກສາທີ່ມີຄຸນນະພາບ ແລະ ການຮຽນຮູ້ຕະຫຼອດຊີ ວິດຢ່າງສະເໝີພາບ, ຊ່ວຍໃຫ້ພວກ​ເຂົາ​ໄດ້​ຮັບ​ຄວາມ​ຮູ້, ທັກ​ສະ ​ແລະ ຄວາມ​ສາມາດ ​ເພື່ອ​ປະກອບສ່ວນ ​ແລະ ​ໄດ້​ຮັບ​ຜົນ​ປະ​ໂຫຍ​ດຈາກ​ການ​ພັດທະນາ​ເສດຖະກິດ-ສັງຄົມ ​ແລະ ສະໜັບສະໜູນ ສປປ ລາວ ​ໃຫ້ຫຼຸດ​ພົ້ນ​ອອກ​​ຈາກ​ສະ​ຖາ​ນະ​ພາບປະ​ເທດ​ດ້ອຍ​ພັດທະນາ​ໃນ​ປີ 2025.

ການ​ປະຕິ​ຮູບ​ການ​ສຶກສາ​ແຫ່ງ​ຊາດ ​ນັບ​ແຕ່​ປີ 2005 ​ໄດ້​ປັບປຸງ​ການ​ເຂົ້າ​ເຖິງ​ການ​ສຶກສາ​ທີ່​ມີ​ຄຸນ​ນະພາ​ບຢ່າງ​ບໍ່​ຢຸດ​ຢັ້ງ, ບັນລຸໄດ້ຜົນສໍາເລັດອັນສໍາຄັນ ໂດຍ​ສະ​ເພາະເປົ້າໝາຍການສຶກສາສໍາລັບມາດຕະຖານ​ຕົວ​ຊີ້ບອກຊັບ​ພະ​ຍາ​ກອນມະນຸດ ເພື່ອອອກຈາກສະຖານະພາບປະເທດດ້ອຍພັດທະນາ, ແຕ່ຄວາມແຕກໂຕນກັນຍັງຄົງເປັນສິ່ງທ້າທາຍສໍາລັບການພັດທະນາປະເທດຊາດ. ສະນັ້ນ, ລັດຖະບານ ຈຶ່ງເນັ້ນການຫຼຸດຜ່ອນຊ່ອງຫວ່າງດັ່ງກ່າວ ໂດຍໃຫ້ຄວາມບູ​ລິ​ມະ​ສິດແກ່ກຸ່ມຄົນດ້ອຍໂອກາດ ເຊັ່ນ: ຄົນທຸກຍາກ, ເພດຍິງ, ຊົນເຜົ່າທີ່ດຳລົງຊີວິດຢູ່ຊົນນະບົດ ແລະ ຫ່າງໄກສອກຫຼີກ ພ້ອມ​ທັງ​ວາງນະໂຍບາຍ​ການພັດທະນາ.

ວິໄສທັດການສຶກສາຂອງລາວ ແມ່ນການພັດທະນາລະບົບການສຶກສາແບບລວມ ທີ່ອີງຕາມວັດທະນະທໍາ ແລະ ຄ່ານິຍົມຂອງລາວ. ພ້ອມດຽວກັນນັ້ນ, ກໍຕອບສະ​ໜອງຕໍ່ສິ່ງທ້າທາຍ ແລະ ໂອກາດຂອງສະຕະວັດທີ 21.

ວິໄສທັດຂອງການສຶກສາໃນ​ປີ 2030, ແຜນ 5 ປີຂອງຂະແໜງການສຶກສາ ແລະ ກິລາ ແລະ GCED ມີ​ຄວາມສອດຄ່ອງກັນ. ທັງ​ສອງ​ຕັ້ງ​ເປົ້າ​ໝາຍ​ພັດ​ທະ​ນາ​ບຸກ​ຄົນ​ໃຫ້ມີ​ຄວາມ​ຮູ້, ມີ​ຄວາມ​ຊຳ​ນານ ແລະ ມີ​ຄວາມ​ຮັບ​ຜິດ​ຊອບ​, ​ສາ​ມາດ​ປະ​ກອບ​ສ່ວນ​ໃຫ້​ໂລກ​ມີ​ຄວາມ​ຍຸ​ຕິ​ທຳ, ຍືນ​ຍົງ ແລະ ສັນ​ຕິ​ພາບ. ນອກຈາກນັ້ນ, ​ຍັງມີຈຸດປະສົງເພື່ອ ສ້າງຜູ້ຮຽນໃຫ້ມີຄວາມ​ຄິດ​ວິ​ເຄາ​ະ ແລະ ທັກສະໃນການແກ້ໄຂບັນຫາ, ​ຕະຫຼອດເຖິງການມີສ່ວນຮ່ວມໃນຊຸມຊົນຂອງ ພວກເຂົາ. ທັກສະເຫຼົ່ານີ້ ເປັນສິ່ງຈໍາເປັນສໍາລັບຄວາມສໍາເລັດໃນສະຕະວັດທີ 21 ແລະ ສາມາດຊ່ວຍໃຫ້ນັກຮຽນລາວ ສາມາດກ້າວ​ເຖິງຄວາມສາມາດທີ່​ສູງ​ສຸດຂອງເຂົາເຈົ້າ.

ຍ້ອນຄວາມສໍາຄັນດັ່ງກ່າວ, ໃນຫຼັກສູດການຮຽນການສອນກອບ GCED ໄດ້ຖືກສ້າງຂຶ້ນໃນສະພາບການຂອງລາວ ຊຶ່ງປະກອບດ້ວຍວິໄສທັດຂອງ GCED ຂອງ ສປປ ລາວ, ມີຈຸດ​ປະ​ສົງ ແລະ ເປົ້າໝາຍທີ່ຊັດເຈນທີ່ຈະ​ຕ້ອງບັນລຸ. ກອບ​ນີ້ ​ຍັງ​ສະ​ແດງ​ໃຫ້​ເຫັນ​ລັກ​ສະ​ນະ​ຂອງ​ຊາດ​ ແລະ​ ສາ​ກົນ, ມີເຄື່ອງມືວັດ ແລະ ປະເມີນຜົນສຳເລັດຂອງ GCED ແລະ ເປັນເຄື່ອງມືທີ່ສຳຄັນທີ່ສຸດສຳລັບການວາງແຜນ ແລະ ການຈັດຕັ້ງປະຕິບັດ GCED ໃນຫຼັກສູດ.

ວິຊາສຶກສາພົນລະເມືອງຂອງ ສປປ ລາວ ເປັນວິຊາໜຶ່ງໃນຫຼັກສູດການຮຽນການສອນ ໃນຊັ້ນມັດທະຍົມສຶກສາຕອນຕົ້ນ ​ແລະ ​ຕອນ​ປາຍ ຊຶ່ງປະສົມປະສານກອບ GCED ເຂົ້າໃນວິຊາດັ່ງກ່າວ. ຈຸດປະສົງຂອງວິ​ຊານີ້ ແມ່ນເພື່ອໃຫ້ນັກຮຽນມີຄວາມຮູ້ກ່ຽວກັບໂຄງສ້າງໂລກ, ລັກສະນະ, ວັດທະນະທໍາ, ຮີດຄອງປະເພນີ, ການຢູ່ຮ່ວມກັນໃນຊຸມຊົນ, ສັງຄົມ ໂດຍສະເພາະແມ່ນການປະກອບສ່ວນໃນ​ການປົກປັກຮັກສາ ແລະ ພັດທະນາປະເທດຊາດ ແລະ ປະ​ຊາ​ຄົມ​ລະ​ຫວ່າງ​ຊາດ. ການຮຽນຮູ້ ແລະ ຈຸດປະສົງຂອງວິຊານີ້ ສອດຄ່ອງກັບ GCED ໃນ​ດ້ານຄວາມຮູ້, ສັງຄົມ-ອາລົມ, ພຶດຕິກໍາ ແລະ ການນໍາໃຊ້ການ​ຮຽນການ​ສອນແບບຫັນປ່ຽນ.

ຂ່າວ​ທີ່​ກ່ຽວ​ຂ້ອງ