ສູນພັດທະນາຜູ້ປະກອບກິດຈະການ ລາວ-ອິນເດຍ (ສລດ) ໄດ້ຈັດກອງປະຊຸມຝຶກ​ອົບຮົມ​ “ການປະກອບກິດຈະການ” ​ໃຫ້ແກ່ນັກສຶກສາ ປີທີ 2 ຂອງວິທະຍາໄລເຕັກນິກວິຊາຊີບ 5 ແຫ່ງ ພາຍໃນນະຄອນຫຼວງວຽງຈັນ ໃນວັນທີ 22 ມັງກອນ 2024 ທີ່ສູນດັ່ງກ່າວ ໂດຍໃຫ້ກຽດເຂົ້າຮ່ວມຂອງທ່ານ ສາຍຄຳ ພັນທະວົງ ຮອງຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ, ພ້ອມດ້ວຍຮອງຜູ້ອຳນວຍການສູນ, ພະນັກງານ, ແຂກທີ່ຖືກເຊີນ ຕະຫຼອດຮອດນ້ອງນັກຮຽນທີ່ເຂົ້າຮ່ວມຝຶກອົບຮົມ.

ການຈັດຝຶກອົບຮົມໃນຄັ້ງນີ້, ແມ່ນເພື່ອເປັນການສົ່ງເສີມແນວຄວາມຄິດກ່ຽວກັບການປະກອບກິດຈະການ ໃຫ້ແກ່ນັກຮຽນນັກສຶກສາຜູ້ທີ່ສົນໃຈຢາກຮຽນຮູ້ກ່ຽວກັບການປະກອບກິດຈະການ ຫຼື ຢາກເປັນເຈົ້າຂອງທຸລະກິດ/ເປັນນາຍຕົນເອງ; ປູກຈິດສຳນຶກກ່ຽວກັບການເປັນຜູ້ປະກອບກິດຈະການໃຫ້ແກ່ນັກຮຽນນັກສຶກສາ ໃນການເລືອກປະກອບອາຊີບພາຍຫຼັງທີ່ຮຽນຈົບຈາກສະຖານການສຶກສາ ແລະ ເພື່ອປະຕິບັດຕາມທິດທາງພັດທະນາເສດຖະກິດ-ສັງຄົມແຫ່ງຊາດ.

ສຳລັບເນື້ອໃນເນື້ອ​ໃນຂອງຫຼັກສູດໃນການຝຶກອົບຮົມ ແມ່ນໄດ້ພັດທະນາ​ມາ​ຈາກ​ຫຼາຍວິຊາ​ທີ່ກ່ຽວຂ້ອງກັບການເຮັດ​ທຸລະ​ກິດ ​ໂດຍ​ມີຈຸດປະສົງ​ໃຫ້ຜູ້ຮຽນ​ສາມາດ​ສ້າງ​ວຽກ​ເຮັດ​ງານ​ທຳ​ໃຫ້​ກັບ​ຕົນ​ເອງ ດ້ວຍ​ການ​ນຳ​ແນວ​ຄວາມ​ຄິດ​ທາງທຸລະ​ກິດມາ​ໃຊ້​ຮ່ວມ​ກັບທັກສະເພາະດ້ານ ຫຼື ​ວິຊາ​ສະ​ເພາະທີ່​ແຕ່ລະຄົນໄດ້​ຮຽນມາ ເພື່ອສ້າງເປັນທຸລະ​ກິດຂອງຕົນເອງ ແລະ ສາມາດ​ສ້າງ​ເປັນແຜນ​ດຳ​ເນີນ​ງານ​ຂອງ​ທຸລະ​ກິດ​ໄດ້​ ໂດຍຜູ້ຮຽນໄດ້ຮຽນຮູ້ພື້ນຖານການ​ປະກອບ​ກິດຈະການ,​ ລັກສະນະ ແລະ ບົດບາດຂອງຜູ້ປະກອບກິດຈະການ ແລະ ຂັ້ນຕອນໃນການເລີ່ມຕົ້ນເຮັດທຸລະກິດ ເຊັ່ນ: ຮຽນຮູ້ກ່ຽວກັບບັນຫາຕ່າງໆໃນການສ້າງທຸລະກິດໃໝ່, ຜົນປະໂຫຍດຂອງການເຮັດທຸລະກິດ, ຂໍ້ກໍານົດກົດໝາຍກ່ຽວກັບການເຮັດທຸລະກິດ, ການກໍານົດແຫຼ່ງຊັບພະຍາກອນທີ່ຈຳເປັນ, ການຈັດຫາຊັບພະຍາກອນ, ການຕະຫຼາດ, ແຜນການເງິນ ແລະ ການເຂົ້າຫາແຫຼ່ງທຶນ ແລະ ຜູ້ຮຽນຍັງໄດ້ກະກຽມ​ການຂຽນແຜ​ນທຸລະກິດ ເພື່ອເລີ່ມຕົ້ນເຮັດທຸລະກິດຕົວຈິງ.

ສ່ວນກຸ່ມເປົ້າໝາຍການຝຶກອົບຮົມຄັ້ງນີ້, ແມ່ນແນໃສນັກຮຽນ ນັກສຶກສາຂອງສະຖານອາຊີວະສຶກສາ ຊຶ່ງກໍານົດໃສ່ກຸ່ມນັກສຶກສາ ປີທີ 2 ຂອງ 5 ວິທະຍາໄລ ຄື: ວິທະຍາໄລ ເຕັກນິກ ປາກປ່າສັກ, ວິທະຍາໄລ ເຕັກນິກ ສັບພະວິຊາ, ວິທະຍາໄລ ເຕັກນິກ-ວິຊາຊີບ ມິດຕະພາບ ວຽງຈັນ-ຮ່າໂນ້ຍ, ວິທະຍາໄລ ເຕັກນິກ ກະສິກໍາ ດົງຄໍາຊ້າງ ແລະ ວິທະຍາໄລ ເຕັກນິກ ລາວ-ເຢຍລະມັນ ຈໍານວນ 30 ຄົນ ໂດຍກໍານົດໃຫ້ມີເພດຍິງ 50%.

ໂດຍ ບົວລະພາ

ຂ່າວ​ທີ່​ກ່ຽວ​ຂ້ອງ