ຄະນະບໍລິຫານງານຊາວໜຸ່ມຮາກຖານ ວິທະຍາໄລຄູ ດົງຄຳຊ້າງ ຕີລາຄາຄືນວຽກງານໃນໄລຍະຜ່ານມາ ພ້ອມທັງສາມາດເລືອກຄະນະບໍລິຫານງານຊຸດໃໝ່ ໂດຍເລືອກໄດ້ ສະຫາຍ ພົງສະຫວັດ ສິລາປັນຍາ ເປັນເລຂາ, ສະຫາຍ ນາງ ຄໍາໃບ ພະວິໄຊ ຮອງເລຂາ ສ່ວນສະຫາຍ ນາງ ອຸດາພອນ ສີມະນີວົງ ເປັນປະທານກວດກາ, ສະຫາຍ ມະໄລແພງ ເພັງມະນີ ແລະ ສະຫາຍ ສຸລິຍາ ປັນຍາໄຊ ເປັນຄະນະບໍລິຫານງານ.

ກອງປະຊຸມໃຫຍ່ ຄັ້ງທີ X ຂອງຄະນະບໍລິຫານງານຊາວໜຸ່ມຮາກຖານ ວິທະຍາໄລຄູ ດົງຄຳຊ້າງ ໄດ້ມີຂຶ້ນ ເມື່ອບໍ່ດົນມານີ້ ທີ່ສະໂມສອນວິທະຍາໄລດັ່ງກ່າວ ໂດຍພາຍໃຕ້ການເປັນປະທານຂອງສະຫາຍ ປອ ຕຸດາວັນ ໜໍ່ເມືອງເສດ ເລຂາທິການສູນກາງຊາວໜຸ່ມ ປະຊາຊົນປະຕິວັດລາວ, ຄະນະພັກກະຊວງ, ເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ກະຊວງ ທັງເປັນຮອງຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ (ສສກ), ສະຫາຍ ນາງ ສິງທອງ ສີສະຫວັດ ຄະນະພັກຮາກຖານວິທະຍາໄລ ທັງເປັນຮອງຜູ້ອຳນວຍການວິທະຍາໄລຄູ ດົງຄຳຊ້າງ, ສະຫາຍ ໄພວັນ ບັນດາສັກ ຮອງເລຂາຄະນະບໍລິຫານງານຊາວໜຸ່ມ ສສກ, ເລຂາຊາວໜຸ່ມວິທະຍາໄລອ້ອມຂ້າງ ກະຊວງ ສສກ,  ເລຂາຄະນະບໍລິຫານງານຊາວໜຸ່ມວິທະຍາໄລຄູ ດົງຄຳຊ້າງ, ສະຫາຍ ສີພອນ ສີບຸນເຮືອງ ຮອງເລຂາຊາວໜຸ່ມວິທະຍາໄລອ້ອມຂ້າງກະຊວງ ສສກ, ມີບັນດາຄະນະບໍລິຫານງານຊາວໜຸ່ມວິທະຍາໄລອ້ອມຂ້າງກະຊວງ ສສກ, ຄະນະບໍລິຫານງານຊາວໜຸ່ມວິທະຍາໄລອ້ອມຂ້າງ ແລະ 3 ອົງການຈັດຕັ້ງ ຕະຫຼອດຮອດນັກສຶກສາ ວິທະຍາໄລຄູ ດົງຄຳຊ້າງເຂົ້າຮ່ວມ.

ໃນກອງປະຊຸມ, ໄດ້ມີການຜ່ານຂໍ້ຕົກລົງອະນຸມັດເປີດກອງປະຊຸມໃຫຍ່ ຄັ້ງທີ X ຂອງ​ຄະນະບໍລິຫານງານຊາວໜຸ່ມຮາກຖານວິທະຍາ​ໄລ​ຄູ ​ດົງ​ຄຳ​ຊ້າງ​ ຈາກນັ້ນ ກອງປະຊຸມໄດ້ຮັບຟັງການລາຍງານຮ່າງບົດລາຍງານການເມືອງທັງສອງພາກໂດຍ ທ່ານ ສະຫາຍ ໄພວັນ ບັນດາສັກ ຊຶ່ງໄດ້ຕີລາຄາສູງ ຜົນງານໄຊຊະນະຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ຂອງຄະນະບໍລິຫານງານຊາວໜຸ່ມກະຊວງ ສສກ ໃນຕະຫຼອດ 5 ປີ, ໃນຮ່າງລາຍງານໄດ້ກຳນົດຄາດໝາຍສູ້ຊົນ ທິດທາງ ໜ້າທີ່ແຕ່ນີ້ຮອດປີ 2025.

ກອງ​ປະຊຸມ​ໃຫຍ່​ ຄັ້ງ​ທີ X ຂອງ​ຄະນະບໍລິຫານງານຊາວໜຸ່ມຮາກຖານວິທະຍາ​ໄລ​ຄູ​ ດົງ​ຄຳ​ຊ້າງ​ ໄດ້ຕົກລົງ​ບັນດາ​​ເນື້ອ​ໃນ​ວຽກງານ​ສຳຄັນ​ຕ່າງໆ​ ໂດຍສະເພາະກອງ​ປະຊຸມ​ໄດ້​ຮັບ​ຟັງ​ການສະ​ເໜີ​ຮ່າງບົດ​ລາຍ​ງານ​ການ​ເມືອງ​ຂອງ​ໜ່ວຍຊາວໜຸ່ມຮາກຖານໃນ​ໄລຍະ​ຜ່ານ​ມາ ຊຶ່ງໄດ້ເວົ້າເຖິງການສຶກສາອົບຮົມແນວຄິດການເມືອງ ແລະ ການຈັດຕັ້ງປະຕິບັດໃນ​ແຕ່​ລະ​ດ້ານ​ນັບ​ທັງ​ດ້ານ​ດີ​ທີ່​ຈະ​ຕ້ອງ​ໄດ້​ສືບ​ຕໍ່​ເສີມ​ຂະຫຍາຍ ​ແລະ ຂໍ້ຄົງຄ້າງ​ທີ່​ຈະ​ຕ້ອງ​ເອົາ​ໃຈ​ໃສ່​ແກ້​ໄຂ​ໃນ​ຕໍ່ໜ້າ ແລະ ຍັງ​ໄດ້​ເປັນ​ເອກະ​ພາບ​ໃນ​ການ​ກຳ​ນົດບັນດາ​ທິດ​ທາງ​ ແລະ ແຜນການ​ໃນ​ຕໍ່ໜ້າ ​ເພື່ອ​ຕອບ​ສະໜອງ​ກັບ​ຄວາມ​ຮຽກຮ້ອງ​ຕ້ອງການ​ໃນ​ການ​ນຳພາ​ຂອງໜ່ວຍຊາວໜຸ່ມຮາກຖານ ​ໂດຍ​ສະ​ເພາະແມ່ນ​ສຸມ​ໃສ່​ປັບປຸງ​ຄຸນ​ນະພາບການນຳພາຂອງ​ໜ່ວຍຊາວໜຸ່ມ​ໃຫ້​ຕິດ​ພັນ​ກັບ​ໜ້າ​ທີ່​ວິຊາ​ສະ​ເພາະ, ຕິດ​ພັນ​ກັບ​ຂະ​ບວນການ​ຂອງ​ມະຫາຊົນ ​ແຜນການ​ກໍ່ສ້າງໜ່ວຍ​ຊາວໜຸ່ມຮາກຖານຕົວແບບ​ ຊຶ່ງໄດ້ມີການແຂ່ງຂັນການສອນດີ-ສອນເກັ່ງ ແລະ ປະຕິບັດຂໍ້ແຂ່ງຂັນ 4 ບຸກ ເຊັ່ນ: ດ້ານແນວຄິດ, ດ້ານຝຶກຝົນຫຼໍ່ຫຼອມຮໍ່າຮຽນ, ດ້ານວຽກງານການຈັດຕັ້ງ, ດ້ານວິຊາຊີບ-ສ້າງວຽກເຮັດງານທໍາ. ນອກຈາກນັ້ນ, ກອງປະຊຸມໄດ້ເປັນເອກະພາບກັນຢ່າງສົມບູນ ຮັບຮອງເອົາບົດລາຍງານການເມືອງ ແລະ ​ຮັບຮອງ​ເອົາ​ບົດ​ສຳ​ຫຼວດການ​ນຳພາ​ຂອງ​ຄະນະ​ໜ່ວຍ​ຊາວໜຸ່ມຮາກຖານຊຸດ​ເກົ່າ ​ແລະ ​ໄດ້​ຕີ​ລາໄດ້ວ່າ: ຄະນະ​ໜ່ວຍ​ຊາວໜຸ່ມຮາກຖານຊຸດ​ເກົ່າ​ໄດ້​ມີ​ຄວາມ​ຕັ້​ງໜ້າ, ພະຍາຍາມ​​ໃນ​ການ​ຊີ້​ນຳນຳພາ​ຈັດ​ຕັ້ງ​ເຄື່ອນ​ໄຫວ​ແຕ່​ລະ​ດ້ານ​ໃນ​ໄລຍະ​ຜ່ານ​ມາ​ ເຮັດ​ໃຫ້​ໜ່ວຍ​ຊາວໜຸ່ມຮາກຖານ​ມີ​ຄວາມ​ສະຫງົບ​ດີ, ເຕີບ​ໃຫຍ່​ຂະຫຍາຍຕົວ​ເປັນ​ກ້າວໆ​ນັບ​ທັງ​ປະລິມານ, ຄຸນ​ນະພາ​ບ ແລະ ຄຽງຄູ່ໄປກັບການເອົາໃຈໃສ່ກໍ່ສ້າງພະນັກງານທີ່ເປັນສະມາຊິກຊາວໜຸ່ມ ເພື່ອຂະຫຍາຍເຂົ້າເປັນສະມາຊິກພັກໃນຕໍ່ໜ້າ. ​

ໂອກາດດັ່ງກ່າວ, ຍັງໄດ້ມີການຜ່ານຂໍ້ຕົກລົງຍ້ອງຍໍສະມາຊິກຊາວໜຸ່ມຜູ້ທີ່ມີຜົນງານດີເດັ່ນ ຂັ້ນຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງ ສສກ ຈຳນວນ 75 ສະຫາຍ, ຍິງ 46 ສະຫາຍ. ພ້ອມກັນນີ້, ຄະນະຊາວໜຸ່ມຊຸດເກົ່າມີຄຳເຫັນ ແລະ ລາໜ້າທີ່. ຫຼັງຈາກນັ້ນ, ຈັດຕັ້ງພິທີ ໄດ້ຜ່ານຂໍ້ຕົກລົງແຕ່ງຕັ້ງຄະນະຮັບຜິດຊອບໃນການປ່ອນບັດເລືອກຕັ້ງ ຄະນະບໍລິຫານງານຊາວໜຸ່ມຮາກຖານວິທະຍາໄລຄູ ດົງຄຳຊ້າງ ສະໄໝທີ X  ຈຳນວນ 7 ສະຫາຍ ໃນນັ້ນ ການດຳເນີນການປ່ອນບັດ ແມ່ນໄດ້ເລືອກເອົາ 5 ສະຫາຍ ເພື່ອຊີ້ນຳການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ຂອງຄະນະບໍລິຫານງານຊາວໜຸ່ມກະຊວງ ສສກ. ຜ່ານການເລືອກຕັ້ງໄດ້ເປັນເອກະພາບກັນ ເລືອກໄດ້ ສະຫາຍ ພົງສະຫວັດ ສິລາປັນຍາ ເປັນເລຂາ, ສະຫາຍ ນາງ ຄໍາໃບ ພະວິໄຊ ຮອງເລຂາ, ສະຫາຍ ນາງ ອຸດາພອນ ສີມະນີວົງ ເປັນປະທານກວດກາ, ສະຫາຍ ມະໄລແພງ ເພັງມະນີ ແລະ ສະຫາຍ ສຸລິຍາ ປັນຍາໄຊ ເປັນຄະນະບໍລິຫານງານຊາວໜຸ່ມປະຊາຊົນປະຕິບັດລາວ ວິທະຍາໄລຄູ ດົງຄຳຊ້າງ ສະໄໝທີ X.

ໂດຍ ສົງການ ພັນແພງດີ

ຂ່າວ​ທີ່​ກ່ຽວ​ຂ້ອງ