ກະຊວງສຶກສາທິການ ແລະ ກິລາ (ສສກ) ແລະ ອົງການສະຫະປະຊາຊາດກອງທຶນສຳລັບປະຊາກອນ (UNFPA) ຮ່ວມມືກັບບັນດາຄູ່ຮ່ວມງານທັງພາຍໃນ ແລະ ຕ່າງປະເທດ ລວມທັງອົງການແພລນສາກົນ, ອົງການ PSI, ອົງການຊ່ວຍເຫຼືອເດັກ, ອົງການ ແຄຣ, ອົງການລູມທູລີດ, ສະມາຄົມພັດທະນາບົດບາດຍິງຊາຍ, ສະມາຄົມສົ່ງເສີມສຸຂະພາບຄອບຄົວ ແລະ ໂຮງແຮມຄຣາວພລາຊາ ​ໄດ້​ເຕົ້າ​ໂຮມ​ກັນ​ເພື່ອ​ສະ​ເຫຼີ​ມສະຫຼອງ​ວັນ​ເດັກ​ຍິງ​ສາກົນ ​ແລະ ວັນຄົບຮອບ 18 ປີ ແຜນງານນາງ ນ້ອຍ ພາຍ​ໃຕ້​ຫົວ​ຂໍ້: ວິ​ໄສ​ທັດ​ຂອງ​ເດັກ​ຍິງ​ເພື່ອ​ອະນາຄົດ.

ງານສະ​ເຫຼີ​ມສະຫຼອງດັ່ງກ່າວ, ໄດ້ຈັດຂຶ້ນເມື່ອວັນທີ 15 ຕຸລາ ຜ່ານມາ ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ໂດຍການເປັນປະທານຂອງທ່ານ ກິ່​ງ​ມະໂນ ພົມ​ມະຫາ​ໄຊ ຮອງລັດຖະມົນຕີ ກະຊວງ​ສຶກສາ​ທິ​ການ ແລະ ກິລາ ແລະ ເປັນປະທານຮ່ວມໂດຍທ່ານ ດຣ ບາກຕິຢໍ ກາດີເຣີບ ຜູ້ຕາງໜ້າ UNFPA ປະຈຳ ສປປ ລາວ, ມີບັນດາຫົວໜ້າ-ຮອງຫົວໜ້າກົມ, ຕາງໜ້າອົງການທັງພາກລັດ ແລະ ເອກະຊົນ ພ້ອມພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ, ທ່ານ ກິ່​ງ​ມະໂນ ພົມ​ມະຫາ​ໄຊ ໄດ້ກ່າວວ່າ: ແມ່ຍິງໃນຊຸມຊົນມີຄວາມດ້ອຍໂອກາດຫຼາຍກວ່າຜູ້ຊາຍ, ພວກເຮົາກໍຮູ້ວ່າ ການສະໜັບສະໜູນລວມທັງເດັກຊາຍ, ຜູ້ທີ່ມີຄວາມພິການ ແລະ ກຸ່ມອື່ນໆທີ່ມີຄວາມສ່ຽງ. ສະນັ້ນ, ຕ້ອງມີນະໂຍບາຍ ແລະ ມີແຜນງານທີ່ຊັດເຈນ ເພື່ອຊ່ວຍເຫຼືອເຂົາເຈົ້າໃຫ້ໄດ້ຮັບໂອກາດໃນການມີສ່ວນຮ່ວມ, ການຕັດສິນໃຈໃນຂັ້ນນະໂຍບາຍ ຫຼື ມີສ່ວນຮ່ວມໃນການຈັດຕັ້ງປະຕິບັດແຜນງານ. ດັ່ງນັ້ນ, ຕ້ອງຮ່ວມກັນເພື່ອສະໜັບສະໜູນ ແລະ ສ້າງຄວາມເຂັ້ມແຂງໃຫ້ເຂົາເຈົ້າມີສຸຂະພາບທີ່ດີ, ໄດ້ຮັບການສຶກສາ, ມີວຽກເຮັດງານທໍາ, ໄດ້ຮັບການປົກປ້ອງທາງສັງຄົມ ແລະ ມີສ່ວນຮ່ວມ ເພື່ອບັນລຸຄວາມຝັນຂອງເຂົາເຈົ້າ.

ປັດຈຸບັນ ສປປ ລາວ ປະເຊີນກັບອັດຕາການຖືພາໃນໄວໜຸ່ມສູງທີ່ສຸດໃນພາກພື້ນ ໂດຍອັດຕາການເກີດລູກຂອງໄວໜຸ່ມເພີ່ມຂຶ້ນຈາກ 83 ຄົນ/1.000 ຄົນ ໃນປີ 2017 ເພີ່ມຂື້ນເປັນ 89 ຄົນ/1.000 ຄົນປີ 2023. ນອກນັ້ນ, ອັດຕາສ່ວນຂອງເດັກຍິງອາຍຸ 15-19 ປີ ທີ່ແຕ່ງງານແລ້ວ ຫຼື ຢູ່ນໍາກັນໂດຍບໍ່ໄດ້ແຕ່ງງານ ເພີ່ມຂຶ້ນຈາກ 23,5% ໃນປີ 2017 ເປັນ 26,5% ໃນປີ 2023.   ປີ 2016 ສປປ ລາວ ໄດ້ເປີດແຜນງານ ນາງ ນ້ອຍ ແລະ ສ້າງໃຫ້ເປັນຕົວແທນຂອງເດັກຍິງໄວໜຸ່ມທັງໝົດ (700.000 ກວ່າຄົນ) ໃນທົ່ວປະເທດ, ໄດ້ຮັບຮອງເອົາ ເພື່ອແກ້ໄຂບັນຫາສຳຄັນຕ່າງໆ ເຊັ່ນ: ການຂາດສານອາຫານ, ການສຶກສາ, ຄວາມບໍ່ສະເໝີພາບ ລະຫວ່າງ ຍິງ-ຊາຍ, ສຸຂະພາບ ແລະ ສະຫວັດດີການໂດຍລວມ, ຄຽງຄູ່ກັບການມຸ່ງໝັ້ນສູ່ເປົ້າໝາຍການພັດທະນາແບບຍືນຍົງ (SDGs) ແລະ ປູກຝັງຈິດສຳນຶກ ບໍ່ປ່ອຍປະຜູ້ໃດໄວ້ເບື້ອງຫຼັງ.

ສຳລັບການຈັດງານສະຫຼອງວັນ ນາງ ນ້ອຍ ຄົບຮອບ 18 ປີ ແລະ ວັນເດັກຍິງສາກົນ (11 ຕຸລາ) ເປັນການສະຫຼອງຄວາມຄືບໜ້າກ່ຽວກັບໂຄງການໄວໜຸ່ມ ແລະ ການສ້າງຄູ່ຮ່ວມງານ ແລະ ເສີມຂະຫຍາຍຄໍາໝັ້ນສັນຍາໃນການຊຸກຍູ້ສ້າງຄວາມເຂັ້ມແຂງໃຫ້ແກ່ໄວໜຸ່ມຍິງ ແລະ ຊາຍ ໃຫ້ບັນລຸເປົ້າໝາຍທີ່ໄດ້ລະບຸໄວ້ໃນແຜນງານປີ 2030 ໃນການເຊື່ອມສານເພດສຶກສາແບບຄົບຊຸດ, ການປັບປຸງການເຂົ້າເຖິງຂໍ້ມູນ ແລະ ການບໍລິການດ້ານສຸຂະພາບທາງເພດ ແລະ ການຊ່ວຍເຫຼືອດ້ານສຸຂະພາບຈິດ ສໍາລັບຜູ້ລອດຊີວິດຈາກຄວາມຮຸນແຮງທາງເພດ.

ໂດຍ ບຸນທະວີ

ຂ່າວ​ທີ່​ກ່ຽວ​ຂ້ອງ