ສໍາເລັດກອງປະຊຸມການຕິດຕາມ ຊຸກຍູ້ສົ່ງເສີມການຈັດຕັ້ງປະຕິບັດໂຄງການຮຽນຮູ້ ແລະ ຄວາມເທົ່າທຽມ ຢູ່ ສປປ ລາວ
ກອງປະຊຸມການຕິດຕາມ ແລະ ຊຸກຍູ້ສົ່ງເສີມການຈັດຕັ້ງປະຕິບັດໂຄງການ ລະຫວ່າງ ຫົວໜ້າຄະນະທີມງານທະນາຄານໂລກ ຮ່ວມກັບໜ່ວຍງານຄຸ້ມຄອງ ແລະ ຈັດຕັ້ງປະຕິບັດກິດຈະກໍາໂຄງການກອງທຶນຮ່ວມມືສາກົນເພື່ອການສຶກສາ ໄລຍະສາມ (GPEIII): ໂຄງການຮຽນຮູ້ ແລະ ຄວາມເທົ່າທຽມ ຢູ່ ສປປ ລາວ ໄດ້ປິດລົງດ້ວຍຜົນສໍາເລັດ ໃນວັນທີ 14 ພະຈິກ 2024 ທີ່ຫ້ອງປະຊຸມ ກະຊວງສຶກສາທິການ ແລະ ກິລາ (ຕຶກ ICT) ໂດຍໃຫ້ກຽດເປັນປະທານຂອງທ່ານ ສີທອງ ສີຂາວ ວ່າການຫົວໜ້າກົມແຜນການ ກະຊວງ ສສກ ແລະ ທ່ານ ໄມເຄິນ ແດຣບໂບ ນັກເສດຖະສາດອາວຸໂສ, ຫົວໜ້າຄະນະທີມງານທະນາຄານໂລກ, ມີທ່ານ ອະນຸແພງ ແກ້ວວົງສາ ຮອງຫົວໜ້າກົມແຜນການ ສສກ ທັງເປັນຫົວໜ້າຄະນະຮັບຜິດຊອບໂຄງການ, ທ່ານ ລໍຣີ ປີນໂນເນັນ ຜູ້ຊ່ຽວຊານດ້ານການສຶກສາອາວຸໂສ, ຫົວໜ້າຄະນະທີມງານຮ່ວມ ພ້ອມດ້ວຍບັນຫົວໜ້າ/ຮອງຫົວໜ້າກົມ, ຜູ້ອໍານວຍການ/ຮອງອໍານວຍການສະຖາບັນ, ຜູ້ອໍານວຍການ/ຮອງອໍານວຍການສູນຈາກກະຊວງສຶກສາທິການ ແລະ ກິລາ ແລະ ກະຊວງຕ່າງໆອ້ອມຂ້າງສູນກາງ, ຄະນະທີມງານຈາກທະນາຄານໂລກ ຕະຫຼອດຮອດບັນດາຜູ້ຕາງໜ້າຈາກຄູ່ຮ່ວມພັດທະນາຕ່າງໆ ແລະ ວິຊາການທີ່ກ່ຽວຂ້ອງເຂົ້າຮ່ວມແບບເຊິ່ງໜ້າ ແລະ ທາງອອນລາຍ.
ການຈັດກອງປະຊຸມດັ່ງກ່າວ, ແມ່ນເພື່ອປະເມີນຜົນຂອງໂຄງການ ແລະ ຊຸກຍູ້ ຕິດຕາມການຈັດຕັ້ງປະຕິບັດໂຄງການ ນັບແຕ່ການຊຸກຍູ້ ຕິດຕາມຄັ້ງທີ່ຜ່ານມາ ແຕ່ເດືອນພຶດສະພາ 2024 ໂດຍໄດ້ມີການທົບທວນຄືນ ແລະ ປະເມີນບັນດາໜ້າວຽກຕ່າງໆ ທີ່ບັນລຸໄດ້ຕາມເປົ້າໝາຍໃນຂອບຜົນໄດ້ຮັບຂອງໂຄງການທີ່ວາງໄວ. ກອງປະຊຸມໄດ້ດຳເນີນໃນລະຫວ່າງວັນທີ 4-14 ພະຈິກ 2024.
ທ່ານ ສີທອງ ສີຂາວ ໄດ້ກ່າວວ່າ: ຜ່ານການຮັບຟັງການສະຫຼຸບລາຍງານຜົນສຳເລັດຂອງການຕິດຕາມ, ຊຸກຍູ້ ແລະ ຮ່ວມເຮັດວຽກກັບໜ່ວຍງານຄຸ້ມຄອງ ແລະ ຈັດຕັ້ງປະຕິບັດກິດຈະກຳຂອງໂຄງການກອງທຶນຮ່ວມມືສາກົນ ເພື່ອການສຶກສາ ໄລຍະສາມ (GPEIII): ໂຄງການຮຽນຮູ້ ແລະ ຄວາມເທົ່າທຽມ (LEAP) ຂອງຄະນະທີມງານທະນາຄານໂລກໃນຄັ້ງນີ້ ເຫັນວ່າ ການຈັດຕັ້ງປະຕິບັດໂຄງການໃນໄລຍະ 6 ເດືອນທ້າຍປີນີ້ ໄດ້ບັນລຸຫຼາຍຈຸດປະສົງ ແລະ ຄາດໝາຍທີ່ໄດ້ຕົກລົງເຫັນດີໃນການເລັ່ງຈັດຕັ້ງປະຕິບັດກິດຈະກຳທີ່ເປັບບູລິມະສິດ, ທີ່ສຳຄັນ ແລະ ຮີບດ່ວນຂອງໂຄງການໄດ້ເປັນຢ່າງດີ ຊຶ່ງມັນໄດ້ສະແດງໃຫ້ເຫັນເຖິງຄວາມເອົາໃຈໃສ່ໃນການນຳພາ-ຊີ້ນຳ, ການປະກອບສ່ວນ ແລະ ການໃຫ້ການສະໜັບສະໜູນຈາກຄະນະທີມງານຈາກທະນາຄານໂລກ ແລະ ຄູ່ຮ່ວມພັດທະນາທຸກພາກສ່ວນທີ່ໄດ້ມີຄວາມເອົາໃຈໃສ່ຢ່າງຈິງໃຈໃນການຊຸກຍູ້ ແລະ ຜັກດັນໃຫ້ການຈັດຕັ້ງປະຕິບັດວຽກງານຂອງໂຄງການສາມາດບັນລຸຕາມຈຸດປະສົງຂອງໂຄງການທີ່ວາງໄວ້.
ໂອກາດດຽວກັນນີ້, ທ່ານ ສີທອງ ສີຂາວ ຍັງໄດ້ກ່າວອີກວ່າ: ເພື່ອເຮັດໃຫ້ບາງເນື້ອໃນທີ່ໄດ້ນຳມາສະເໜີ ແລະ ໄດ້ຕົກລົງເຫັນດີຮ່ວມກັນຢູ່ໃນກອງປະຊຸມຄັ້ງນີ້ ໄດ້ສືບຕໍ່ນຳໄປຈັດຕັ້ງປະຕິບັດໃຫ້ມີຜົນສຳເລັດ ແລະ ບັນລຸຕາມຈຸດປະສົງຂອງໂຄງການທີ່ວາງໄວ້ນັ້ນ, ຈຶ່ງຂໍມີບາງຄຳເຫັນ ໂດຍສະເໜີໃຫ້ແຕ່ລະພາກໜ່ວຍງານຄຸ້ມຄອງ ແລະ ຈັດຕັ້ງປະຕິບັດໂຄງການ (IU) ຈັດລຽງບູລິມະສິດຂອງແຕ່ລະກິດຈະກຳທີ່ມີຜົນຕໍ່ຜົນໄດ້ຮັບຂອງໂຄງການ, ຮີບຮ້ອນຂຶ້ນແຜນງົບປະມານບັນດາກິດຈະກຳຕ່າງໆທີ່ຍັງບໍ່ໄດ້ຈັດຕັ້ງປະຕິບັດ ແລະ ສະຫຼຸບລາຍງານບັນດາກິດຈະກຳທີ່ໄດ້ຈັດຕັ້ງປະຕິບັດສຳເລັດແລ້ວ ໃຫ້ໄດ້ຕາມໄລຍະເວລາທີ່ໄດ້ກຳນົດໄວ້; ນໍາເອົາຜົນໄດ້ຮັບຂອງກອງປະຊຸມໄປລາຍງານຕໍ່ກົມ, ສະຖາບັນ, ສູນ ເພື່ອຂໍທິດຊີ້ນໍາທີ່ຕິດພັນກັບຄວາມຮັບຜິດຊອບຂອງຕົນເອງໃນການຈັດຕັ້ງປະຕິບັດວຽກງານໃນຄັ້ງຕໍ່ໄປໃຫ້ໄດ້ຮັບຜົນດີ ແລະ ສຳເລັດຕາມແຜນການທີ່ໄດ້ຕົກລົງກັນ; ໃຫ້ແຕ່ລະໜ່ວຍງານໄດ້ຕິດຕາມ ແລະ ຈັດຕັ້ງປະຕິບັດກິດຈະກຳທີ່ໄດ້ຕົກລົງເຫັນດີຮ່ວມກັນນັ້ນ ໃຫ້ປະສົບຜົນສຳເລັດຕາມໄລຍະເວລາທີ່ກຳນົດໄວ້ ພ້ອມທັງປະສານສົມທົບກັບຫ້ອງການປະສານງານສາກົນເພື່ອການສຶກສາ ເພື່ອນຳສົ່ງຂໍ້ມູນໃຫ້ທີມງານທະນະຄານໂລກຮັບຊາບໃນແຕ່ລະໄລຍະ; ສະເໜີໃຫ້ທະນາຄານໂລກ ແລະ ຄູ່ຮວ່ມພັດທະນາຕ່າງໆ ສືບຕໍ່ໃຫ້ການສະໜັບສະໜູນໃນການຈັດຕັ້ງປະຕິບັດກິດຈະກຳຂອງໂຄງການ GPEIII :LEAP ເພື່ອເຮັດໃຫ້ການຈັດຕັ້ງປະຕິບັດໂຄງການບັນລຸໄດ້ຕາມຈຸດປະສົງທຸກປະການ ໂດຍສະເພາະແມ່ນ ການສະເໜີເພີ່ມງົບປະມານເຂົ້າໃນການຂະຫຍາຍກິດຈະກຳທີ່ມີຄວາມຈຳເປັນ ແລະ ຮີບດ່ວນ ເພື່ອນຳໃຊ້ເຂົ້າໃນການພັດທະນາວຽກງານຂະແໜງການສຶກສາໃຫ້ໄດ້ຮັບຜົນດີເທື່ອລະກ້າວ.
ໂດຍ ດາວຫວຽດ
ຂ່າວທີ່ກ່ຽວຂ້ອງ
