ອູການດາ ຢືນຢັນພົບຜູ້ເສຍຊີວິດຈາກເຊື້ອອີໂບລາ 1 ລາຍ ຂະນະທີ່ ຄອງໂກ ຍອດຜູ້ເສຍຊີວິດເພີ່ມສູງຂຶ້ນຢ່າງຕໍ່ເນື່ອງ
18/05/2026
ສຳນັກຂ່າວຕ່າງປະເທດລາຍງານ: ກະຊວງສາທາລະນະສຸກຂອງປະເທດ ອູການດາ ໄດ້ອອກຖະແຫຼງການຢືນຢັນໃນວັນທີ 15 ພຶດສະພານີ້ວ່າ: ໄດ້ກວດພົບຜູ້ຕິດເຊື້ອໄວຣັດອີໂບລາ (Ebola) ຈຳນວນ 1 ລາຍ ເຊິ່ງເປັນສາຍພັນ ບັນດິບັກໂຢ (Bundibugyo). ຜູ້ຕິດເຊື້ອດັ່ງກ່າວໄດ້ເສຍຊີວິດແລ້ວໃນຫ້ອງ ICU ເມື່ອວັນທີ 14 ພຶດສະພາ ທີ່ຜ່ານມາ ຫຼັງຈາກມີອາການເລືອດອອກພາຍໃນຢ່າງຮຸນແຮງ. ຈາກການວິນິໄສໂລກພົບວ່າ ຜູ້ເສຍຊີວິດແມ່ນກໍລະນີນຳເຂົ້າທີ່ເດີນທາງມາຈາກ ສາທາລະນະລັດ ປະຊາທິປະໄຕ ຄອງໂກ (DR Congo) ເຊິ່ງເປັນປະເທດທຳອິດທີ່ປະກາດການລະບາດໃນຄັ້ງນີ້.
ສະຖານະການໃນ ຄອງໂກ ເຂັ້ມງວດຂຶ້ນ
ທາງດ້ານສູນປ້ອງກັນ ແລະ ຄວບຄຸມໂລກແຫ່ງອາຟຣິກາ (Africa CDC) ລະບຸວ່າ: ການລະບາດໃນຄັ້ງນີ້ເກີດຂຶ້ນຢູ່ແຂວງອິທູຣິ (Ituri) ຂອງ ຄອງໂກ ໂດຍພົບກໍລະນີຕ້ອງສົງໄສທີ່ລໍຖ້າການຢືນຢັນສູງເຖິງ 246 ຄົນ ແລະ ມີຜູ້ເສຍຊີວິດໄປແລ້ວ 65 ຄົນ. ຢ່າງໃດກໍຕາມ, ອົງການອະນາໄມໂລກ (WHO) ໄດ້ເປີດເຜີຍຂໍ້ມູນຫຼ້າສຸດວ່າ ໃນບັນດາກໍລະນີຕ້ອງສົງໄສທັງໝົດນັ້ນ ມີ 13 ລາຍທີ່ໄດ້ຮັບການຢືນຢັນຜົນກວດເປັນບວກແລ້ວ.
ລາຍງານຫຼ້າສຸດຈາກສຳນັກຂ່າວ ຣອຍເຕີ (Reuters) ອ້າງອີງຂໍ້ມູນຈາກກະຊວງສາທາລະນະສຸກຂອງ ຄອງໂກ ລະບຸວ່າ ຍອດຜູ້ເສຍຊີວິດຈາກອີໂບລາໃນປະເທດໄດ້ເພີ່ມຂຶ້ນເປັນ 80 ຄົນແລ້ວ.
ການຮ່ວມມືລະຫວ່າງປະເທດເພື່ອສະກັດກັ້ນ
ປັດຈຸບັນ, Africa CDC ກຳລັງຈັດກອງປະຊຸມດ່ວນຮ່ວມກັບຕົວແທນຈາກ ຄອງໂກ, ອູການດາ, ຊູດານໃຕ້ ແລະ ພາກສ່ວນທີ່ກ່ຽວຂ້ອງ ເພື່ອວາງມາດຕະການເຝົ້າລະວັງການເດີນທາງຂ້າມຊາຍແດນ ແລະ ກຽມຄວາມພ້ອມໃນການຕອບໂຕ້ການລະບາດຢ່າງທັນການ.
ທ່ານ ທີໂດຣດ ອັດຮານອມ ເກບຣີເຢຊຸດ ຜູ້ອຳນວຍການອົງການອະນາໄມໂລກ (WHO) ກ່າວວ່າ: “WHO ກຳລັງເຮັດວຽກຢ່າງໃກ້ຊິດກັບລັດຖະບານຄອງໂກ ເພື່ອຄວບຄຸມການລະບາດໃນຄັ້ງນີ້.” ໂດຍກ່ອນໜ້ານີ້ WHO ໄດ້ຮັບລາຍງານກໍລະນີຕ້ອງສົງໄສຄັ້ງທຳອິດໃນວັນທີ 5 ພຶດສະພາ ແລະ ໄດ້ສົ່ງທີມຊ່ຽວຊານລົງໄປກວດສອບໃນພື້ນທີ່ທັນທີ.
ເຊື້ອໄວຣັດອີໂບລາ ເປັນໂລກຕິດຕໍ່ທີ່ຮ້າຍແຮງ ແລະ ມີອັດຕາການເສຍຊີວິດສູງ. ເຊື້ອນີ້ມັກພົບການລະບາດໃນເຂດປ່າຮ້ອນຂອງ ຄອງໂກ. ເຊິ່ງການຕິດຕໍ່ແມ່ນເກີດຈາກການສຳຜັດໂດຍກົງກັບສານຄັດຫຼັ່ງ ຫຼື ຂອງແຫຼວໃນຮ່າງກາຍຂອງຜູ້ຕິດເຊື້ອ (ເລືອດ, ເຫື່ອ, ນໍ້າລາຍ ແລະ ອື່ນໆ). ສ່ວນການສຳຜັດກັບສົບຂອງຜູ້ທີ່ເສຍຊີວິດຈາກໂລກອີໂບລາ ເຈົ້າໜ້າທີ່ສາທາລະນະສຸກເຕືອນໃຫ້ປະຊາຊົນໃນເຂດໃກ້ຄຽງເພີ່ມຄວາມລະມັດລະວັງ ແລະ ຕິດຕາມຂ່າວສານຢ່າງໃກ້ຊິດ.
