ກອງປະຊຸມສະໄໝສາມັນຂອງລັດຖະບານ ປະຈຳເດືອນມັງກອນ 2024 ໄດ້ໄຂຂຶ້ນໃນຕອນເຊົ້າວັນທີ 29ມັງກອນ 2024 ທີ່ສໍານັກງານນາຍົກລັດຖະມົນຕີ ໂດຍພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ນາຍົກ ລັດຖະມົນຕີ, ມີບັນດາຮອງນາຍົກລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງເຂົ້າຮ່ວມແບບເຊິ່ງໜ້າ, ການນໍາຂອງບັນດາແຂວງ ແລະ ນະຄອນຫຼວງວຽງຈັນ ເຂົ້າຮ່ວມຜ່ານລະບົບກອງປະຊຸມທາງໄກ.

ກອງປະຊຸມລັດຖະບານໃນຄັ້ງນີ້, ຈະໄດ້ພ້ອມກັນຄົ້ນຄວ້າ ປຶກສາຫາລື ແລະ ປະກອບຄໍາເຫັນຕໍ່ຫົວຂໍ້ຕ່າງໆ ເປັນຕົ້ນແມ່ນ ວຽກງານພົ້ນເດັ່ນຂອງລັດຖະບານປະຈຳເດືອນມັງກອນ ແລະ ທິດທາງແຜນການປະຈຳເດືອນກຸມພາ 2024 ຊຶ່ງລວມມີ ການເຄື່ອນໄຫວວຽກງານປ້ອງກັນຊາດ ປ້ອງກັນຄວາມສະຫງົບ, ວຽກງານການຕ່າງປະເທດ ແລະ ລາຍງານກ່ຽວກັບລະບຽບການ ແລະ ກົນໄກໃນການໄປເຄື່ອນໄຫວວຽກງານການຕ່າງປະເທດຂອງຂະແໜງການຂັ້ນສູນກາງ ແລະ ທ້ອງຖິ່ນ, ຜົນສຳເລັດ ແລະ ສະເໜີທິດຜັນຂະຫຍາຍຜົນກອງປະຊຸມ ຄັ້ງທີ 46 ຂອງຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ສສ ຫວຽດນາມ ປະຈຳປີ 2024, ການປະເມີນຄືນບັນດາໂຄງການບໍ່ແຮ່ ທີ່ໄດ້ອະນຸມັດຜ່ານມາທັງໝົດ ແລະ ແຜນໃນຕໍ່ໜ້າ, ຜົນການສະຫຼຸບ ແລະ ປະເມີນການຈັດຕັ້ງປະຕິບັດກອງທຶນ SME ໃນໄລຍະຜ່ານມາ ຕາມແຈ້ງການ ສະບັບເລກທີ 29/ຫສນຍ ລົງວັນທີ 4 ມັງກອນ 2024, ຮ່າງກົດໝາຍ ວ່າດ້ວຍການກັນ ແລະ ຄວບຄຸມເຊື້ອເຮັດໄອວີ/ພະຍາດເອດ (ສະບັບປັບປຸງ), ຮ່າງກົດໝາຍ ວ່າດ້ວຍການປົກປັກຮັກສາສິ່ງແວດລ້ອມ (ສະບັບປັບປຸງ), ຜົນການປັບປຸງ ແລະ ຮຽບຮຽງເນື້ອໃນຮ່າງດໍາລັດ ວ່າດ້ວຍກອງທຶນຄວາມປອດໄພທາງລົດໄຟ, ຮ່າງກົດໝາຍ ວ່າດ້ວຍສະຫະກອນ (ສະບັບສ້າງໃໝ່).

ປະເທດລາວເຮົາ ໄດ້ຮັບຜົນກະທົບທາງກົງ ແລະ ທາງອ້ອມຢ່າງຕໍ່ເນື່ອງຕໍ່ສະພາບການສາກົນ ແລະ ພາກພື້ນ ທີ່ຍັງສືບຕໍ່ຜັນແປຢ່າງສະຫຼັບຊັບຊ້ອນ ແລະ ພວມປະເຊີນໜ້າກັບຫຼາຍວິກິດການ ໂດຍສະເພາະ ບັນຫາລາຄານໍ້າມັນໂລກທີ່ປັບສູງຂຶ້ນ ເຮັດໃຫ້ພົບຄວາມຫຍຸ້ງຍາກສົມຄວນ ເນື່ອງຈາກປະເທດລາວ ເປັນປະເທດທີ່ນໍາເຂົ້ານ້ໍ້າມັນເຊື້ອໄຟ 100% ບວກກັບຄ່ານິຍົມໃນການຊົມໃຊ້ ແລະ ນຳເຂົ້າສິນຄ້າອຸປະໂພກ ບໍລິໂພກຈາກທາງນອກເປັນສ່ວນຫຼາຍ ໃນຂະນະດຽວກັນ ການຜະລິດ ແລະ ນຳໃຊ້ສິນຄ້າພາຍໃນຍັງມີໜ້ອຍ ເຮັດໃຫ້ຄວາມຕ້ອງການນຳໃຊ້ເງິນຕາຫຼາຍຂຶ້ນ ຈຶ່ງສົ່ງຜົນກະທົບຕໍ່ອັດຕາແລກປ່ຽນ ອັດຕາເງິນເຟີ້ ແລະ ລາຄາສິນຄ້າຍັງຢູ່ໃນອັດຕາສູງ.

ຕໍ່ສະພາບການດັ່ງກ່າວ, ລັດຖະບານ ກໍຄື ຄະນະສະເພາະກິດ 19/ກມສພ ສຸມໃສ່ເຄື່ອນໄຫວ ແລະ ຊີ້ນໍາຂະແໜງການ ແລະ ທ້ອງຖິ່ນ ເພື່ອບັງຄັບໃຊ້ມາດຕະການຕ່າງໆທີ່ໄດ້ວາງອອກ ບົນພື້ນຖານຍົກສູງຄວາມຮັບຜິດຊອບທາງດ້ານການເມືອງ ແລະ ການມີສ່ວນຮ່ວມຂອງທຸກພາກສ່ວນໃນສັງຄົມ ເພື່ອແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນໃຫ້ຜ່ອນຄາຍລົງ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆ.

ໃນໂອກາດກ່າວເປີດກອງປະຊຸມ, ທ່ານ ນາຍົກລັດຖະມົນຕີ ໄດ້ຮຽກຮ້ອງບັນດາທ່ານທີ່ເຂົ້າຮ່ວມກອງປະຊຸມ ຈົ່ງໄດ້ພ້ອມກັນເອົາໃຈໃສ່ຄົ້ນຄວ້າ ແລະ ປະກອບຄໍາເຫັນຢ່າງເລິກເຊິ່ງຕໍ່ບັນດາຫົວຂໍ້ທີ່ນຳມາພິຈາລະນາ ດ້ວຍການສະເໜີທັດສະນະຢ່າງກົງໄປກົງມາ ກະທັດຮັດ ມີຈຸດສຸມ ແລະ ມີທາງອອກທີ່ຈະແຈ້ງ ເພື່ອເຮັດໃຫ້ກອງປະຊຸມຄັ້ງນີ້ ໄດ້ຮັບຜົນສຳເລັດຕາມຈຸດປະສົງ ແລະ ຄາດໝາຍທີ່ກຳນົດໄວ້ ແນໃສ່ເຮັດໃຫ້ຜົນຂອງກອງປະຊຸມ ໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາ ແລະ ມີປະສິດທິຜົນ.

ໂດຍ: ກົມປະຊາສຳພັນ ຫສນຍ