ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ຄາດວ່າ ປະຊາຄົມອາຊຽນ ຈະກາຍເປັນພື້ນຖານເສດຖະກິດທີ່ໃຫຍ່ຢູ່ອັນດັບ 4 ຂອງໂລກໃນປີ 2030 ຊຶ່ງປັດຈຸບັນຢູ່ອັນດັບ 3 ຂອງອາຊີ ແລະ ອັນດັບ 5 ຂອງໂລກ ແລະ ມີປະຊາກອນເກືອບ 700 ລ້ານຄົນ.

ໃນພິທີເປີດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງຢ່າງເປັນທາງການ ໃນວັນທິີ 9 ຕຸລາ 2024 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ, ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ມີຄໍາເຫັນ ໂດຍທ່ານໄດ້ຕີລາຕາສູງຕໍ່ຜົນສໍາເລັດຂອງອາຊຽນຕະຫລອດໄລຍະຜ່ານມາ ຊຶ່ງໄດ້ນໍາເອົາຜົນປະໂຫຍດຕົວຈິງມາສູ່ປະຊາຊົນອາຊຽນ, ພ້ອມທັງໄດ້ສະແດງໃຫ້ເຫັນວ່າ ຄວາມມຸ່ງມາດປາຖະໜາ, ເຈດຕະນາລົມອັນແຮງກ້າ, ຄວາມສາມັກຄີ ແລະ ຄວາມເປັນເອກະພາບກັນຂອງອາຊຽນໃນທ່າມກາງຄວາມຫຼາກຫຼາຍ ກໍຄື ການຮ່ວມມືຕາມວິຖີທາງຂອງອາຊຽນ ແມ່ນສອດຄ່ອງກັບສະພາບຈຸດພິເສດຂອງອາຊີຕາເວັນອອກສຽງໃຕ້ ທີ່ມີເປົ້າໝາຍຮ່ວມກັນ ຄື: ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການພັດທະນາເສດຖະກິດ-ສັງຄົມແບບຍືນຍົງໃນພາກພື້ນ ແລະ ໃນໂລກ.

ທ່ານ ທອງລຸນ ສີສຸລິດ ຍັງກ່າວອີກວ່າ: ອາຊຽນ ເປັນອົງການຈັດຕັ້ງພາກພື້ນລະຫວ່າງລັດຖະບານ ທີ່ມີຄວາມຫຼາກຫຼາຍໃນວິວັດທະນາການຂອງຕົນ, ອາຊຽນ ໄດ້ຜ່ານຜ່າສິ່ງທ້າທາຍຕ່າງໆ ແລະ ໄດ້ຮັບການພັດທະນາເປັນກ້າວໆມາ ຈົນກາຍມາເປັນປະຊາຄົມອາຊຽນ ນັບແຕ່ປີ 2015 ເປັນຕົ້ນມາ. ປັດຈຸບັນ, ອາຊຽນ ມີປະຊາກອນເກືອບ 700 ລ້ານຄົນ ໄດ້ກາຍເປັນພື້ນຖານເສດຖະກິດທີ່ໃຫຍ່ ອັນດັບ 3 ຂອງອາຊີ ແລະ ອັນດັບ 5 ຂອງໂລກ ແລະ ຄາດວ່າຈະຢູ່ອັນດັບ 4 ຂອງໂລກໃນປີ 2030. ໃນອະນາຄົດອັນໃກ້ນີ້, ອາຊຽນ ຈະກວມເອົາທຸກປະເທດໃນອາຊີຕາເວັນອອກສຽງໃຕ້ ເພາະ ຕີມໍ ແລັດສະເຕ ຈະໄດ້ເຂົ້າເປັນສະມາຊິກສົມບູນຂອງອາຊຽນໃນອີກບໍ່ດົນນີ້. ສິ່ງດັ່ງກ່າວ, ເປັນການຢືນຢັນວ່າ ປະຊາຄົມອາຊຽນ ແມ່ນປະຊາຄົມທີ່ເຕັມໄປດ້ວຍຄວາມຫຼາກຫຼາຍ, ເປັນພາກພື້ນທີ່ມີທ່າແຮງ ແລະ ມີກາລະໂອກາດສຳລັບອາຊຽນເອງ ກໍຄື ການຮ່ວມມືກັບພາຍນອກອາຊຽນອີກດ້ວຍ. ນັບແຕ່ໄດ້ເຂົ້າເປັນສະມາຊິກອາຊຽນ ໃນປີ 1997 ເປັນຕົ້ນມາ, ສປປ ລາວ ໄດ້ມີຄວາມພະຍາຍາມປະກອບສ່ວນຢ່າງຕັ້ງໜ້າເຂົ້າໃນການຮ່ວມມືພາຍໃນອາຊຽນ ກໍຄື ລະຫວ່າງອາຊຽນກັບພາຍນອກ ແລະ ໄດ້ອອກແຮງປະຕິບັດພັນທະຂອງຕົນຢ່າງມີຄວາມຮັບຜິດຊອບ ເພື່ອຜົນປະໂຫຍດລວມຂອງຄອບຄົວອາຊຽນ. ພ້ອມກັນນີ້, ທ່ານປະທານປະເທດ ຍັງໄດ້ສະແດງຄວາມຂອບໃຈຕໍ່ບັນດາປະເທດສະມາຊິກອາຊຽນ, ບັນດາຄູ່ເຈລະຈາ, ບັນດາຄູ່ຮ່ວມມືພາຍນອກຂອງ ອາຊຽນ ແລະ ກອງເລຂາອາຊຽນ ທີ່ໄດ້ໃຫ້ການຊ່ວຍເຫຼືອສະໜັບສະໜູນ ສປປ ລາວ ໃນການເຄື່ອນໄຫວວຽກງານອາຊຽນ ກໍຄື ການເປັນປະທານອາຊຽນໃນໄລຍະຜ່ານມາ ໂດຍສະເພາະການເປັນປະທານອາຊຽນ ເປັນເທື່ອທີ 3 ໃນປີ 2024 ນີ້ ພາຍໃຕ້ຄຳຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”, ພ້ອມທັງສະແດງຄວາມເຊື່ອໝັ້ນວ່າ ດ້ວຍມູນເຊື້ອການຮ່ວມມື ແລະ ສະໜັບສະໜູນເຊິ່ງກັນ ແລະ ກັນຂອງຄອບຄົວອາຊຽນ ແລະ ຂອງບັນດາຄູ່ຮ່ວມມືພາຍນອກຂອງອາຊຽນ, ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງໃນຄັ້ງນີ້ ຈະໄດ້ຮັບຜົນສຳເລັດຢ່າງຈົບງາມ.

ນໍາສະເໜີໂດຍ ດາວຫວຽດ