ເນື່ອງໃນໂອກາດວັນຄູແຫ່ງຊາດ, ກະຊວງສຶກສາທິການ ແລະ ກິລາ ສປປ ລາວ (ສສກ) ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດການເຂົ້າເຖິງການສຶກສາຂັ້ນພື້ນຖານຢູ່ໃນ ສປປ ລາວ (ແຜນງານບີຄວາ) ໄດ້ຈັດກອງປະຊຸມຝຶກອົບຮົມວຽກງານການປົກປ້ອງ ແລະ ຮັກສາຄວາມປອດໄພສຳລັບເດັກໃນຂະແໜງການສຶກສາ ໃນວັນທີ 2 ຕຸລາ 2024 ທີ່ວິທະຍາໄລຄູຄັງໄຂ, ແຂວງຊຽງຂວາງ ໂດຍການໃຫ້ກຽດເຂົ້າຮ່ວມເປີດຂອງທ່ານ ສົມສີ ສຸດທິວົງ ຮອງຫົວໜ້າຫ້ອງການກະຊວງ, ຜູ້ປະຈໍາການ ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກະຊວງສຶກສາທິການ ແລະ ກິລາ, ທ່ານ ​ນາງ ວາເນັດຊ້າ ເຮັກກາທີ້ ​ເລ​ຂາ​ເອກສະ​ຖານ​ທູດ​ອົດ​ສະ​ຕຣາ​ລີປະຈຳ ສປປ ລາວ, ພ້ອມດ້ວຍຄະນະທີ່ກ່ຽວຂ້ອງ ແລະ ຄູຈາກ 3 ວິທະຍາໄລຄູເປົ້າໝາຍ (ຄັງໄຂ, ຫຼວງນໍ້າທາ, ສະຫວັນນະເຂດ) ເຈົ້າຮ່ວມ 150 ທ່ານ.

ການຝຶກອົບຮົມຄັ້ງນີ້, ແມ່ນເພື່ອໃຫ້ຄວາມຮູ້ກ່ຽວກັບເອກະສານຄຳແນະນຳການປົກປ້ອງ ແລະ ຮັກສາຄວາມປອດໄພສຳລັບເດັກສະບັບໃໝ່ຂອງກະຊວງສຶກສາທິການ ແລະ ກິລາ ຊຶ່ງຈະເປັນຄໍາແນະນໍາໃນການຈັດຕັ້ງປະຕິບັດສຳລັບໃນຂະແໜງການສຶກສາ.

ທ່ານ ສົມສີ ສູທິວົງ ໄດ້ກ່າວວ່າ: “ພິທີສະເຫຼີມສະຫຼອງວັນຄູເນື່ອງໃນໂອກາດວັນຄູແຫ່ງຊາດ ໄດ້ເນັ້ນໜັກເຖິງບົດບາດສຳຄັນຂອງຄູ ໃນການສ້າງອະນາຄົດຂອງໄວໜຸ່ມຂອງພວກເຮົາ. ປີນີ້, ຂ້າພະເຈົ້າຢາກຍົກໃຫ້ເຫັນເຖິງບົດບາດຂອງຄູສອນ ເພື່ອຮັບປະກັນການຮຽນຮູ້ຂອງນັກຮຽນ ແລະ ຊີວິດການເປັນຢູ່ທີ່ດີຂອງເຂົາເຈົ້າ. ສໍາລັບນັກຮຽນທີ່ຈະຮຽນຮູ້ ແລະ ເຕີບໂຕ, ພວກເຂົາເຈົ້າຈໍາເປັນຕ້ອງມີຄວາມຮູ້ສຶກປອດໄພຢູ່ໃນໂຮງຮຽນ. ​ເຂົາ​ເຈົ້າ​ຈໍາ​ເປັນ​ຕ້ອງ​ມີ​ຄວາມ​ຮູ້​ສຶກວ່າ​ໄດ້​ຮັບ​ການ​ປົກ​ປ້ອງ ​ແລະ ​ຮູ້ກ່ຽວກັບສິດທິຂອງຕົນ​ຈາກ​ຄູ​ຂອງ​ເຂົາ​ເຈົ້າ​. ເຂົາເຈົ້າຈໍາເປັນຕ້ອງມີຄວາມຮູ້ສຶກວ່າຕົນເອງເປັນສ່ວນໜຶ່ງຂອງສັງຄົມໂຮງຮຽນ. ໃນວັນຄູແຫ່ງຊາດນີ້, ຂ້າພະເຈົ້າຮູ້ສຶກເປັນກຽດທີ່ໄດ້ກ່າວເປີດວາລະຝຶກອົບຮົມຄັ້ງທໍາອິດກ່ຽວກັບເອກະສານຄໍາແນະນໍາດ້ານການປົກປ້ອງເດັກຢ່າງເປັນທາງການສະບັບໃໝ່ຂອງ ສສກ ສຳລັບຂະແໜງການສຶກສາ”.

ຄູທັງໝົດ 150 ທ່ານຈາກ 3 ວິທະຍາໄລຄູເປົ້າໝາຍ ຈະເຂົ້າຮ່ວມກອງປະຊຸມຝຶກອົບຮົມເປັນເວລາ 3 ວັນ ຊຶ່ງນຳພາໂດຍພະແນກສົ່ງເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກ, ກະຊວງສຶກສາທິການ ແລະ ກິລາ ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ. ຜູ້ເຂົ້າຮ່ວມແມ່ນຈະຮັບໜ້າທີ່ຝຶກອົບຮົມໃຫ້ແກ່ຜູ້ເຮັດວຽກສຶກສານິເທດພາຍໃນ 7 ແຂວງເປົ້າໝາຍ (ຜົ້ງສາລີ, ຫຼວງນ້ຳທາ, ບໍ່ແກ້ວ ຫົວພັນ, ຊຽງຂວາງ, ຄຳມ່ວນ ແລະ ສະຫວັນນະເຂດ). ຄວາມຮູ້ ແລະ ທັກສະທີ່ໄດ້ຮັບຈາກການຝຶກອົບຮົມຄັ້ງນີ້, ຈະຖືກຖ່າຍທອດຕໍ່ໃຫ້ແກ່ຄູສອນຊັ້ນປະຖົມສຶກສາທັງໝົດໃນ 30 ເມືອງເປົ້າໝາຍ ຜ່ານການລົງຕິດຕາມໃຫ້ການຊ່ວຍເຫຼືອຄູໃນໂຮງຮຽນໂດຍຜູ້ເຮັດວຽກສຶກສານິເທດພາຍໃນ.

ທ່ານ ​ນາງ ວາເນັດຊ້າ ເຮັກກາທີ້ ໄດ້ມີຄຳເຫັນຕໍ່ການຈັດກອງປະຊຸມໃນຄັ້ງນີ້ວ່າ: “ການປົກປ້ອງ ແລະ ຮັກສາຄວາມປອດໄພສຳລັບເດັກ ແມ່ນວຽກງານບູລິມະສິດຮ່ວມກັນຂອງລັດຖະບານອົດສະຕຣາລີ ແລະ ລັດຖະບານ ສປປ ລາວ. ຄູມີບົດບາດສໍາຄັນໃນການປົກປ້ອງນັກຮຽນ. ການຮັບປະກັນໃຫ້ນັກຮຽນຮູ້ສຶກປອດໄພເມື່ອຢູ່ໃນໂຮງຮຽນ ຊ່ວຍໃຫ້ເຂົາເຈົ້າມີຄວາມກ້າວໜ້າໃນເສັ້ນທາງການຮຽນ. ລັດຖະບານອົດ​ສະ​ຕາຣາລີ ​ຍິນ​ດີ​ສະ​ໜັບ​ສະ​ໜູນ​ກະ​ຊວງ​ສຶກ​ສາ​ທິ​ການ ແລະ ກິລາ ​ໃນ​ການຈັດ​ຝຶກ​ອົບ​ຮົມຄັ້ງ​ນີ້. ການຊ່ວຍເຫຼືອໃຫ້​ຄູ​ ​ແລະ ພະນັກງານຂະແໜງສຶກສາ ​ດ້ວຍການສະໜອງ​ເຄື່ອງ​ມື ​ແລະ ທັກ​ສະ​ທີ່​ຈຳ​ເປັນ​ ຈະ​ຮັບປະກັນ​ໃຫ້​ເຂົາ​ເຈົ້າ​ສາມາດ​ຊຸກຍູ້ ​ແລະ ປະຕິບັດ​ການ​ປົກ​ປ້ອງ​ ​ແລະ ຮັກສາຄວາມປອດໄພສຳລັບເດັກ​ຢູ່​ໃນ ​ແລະ ນອກ​ຫ້ອງ​ຮຽນ”.

ກອງປະຊຸມຝຶກອົບຮົມຄັ້ງນີ້, ໄດ້ນຳໃຊ້ວິທີການຝຶກອົບຮົມ ໂດຍຖືເອົາຜູ້ເຂົ້າຮ່ວມເປັນໃຈກາງ ຊຶ່ງມີວາລະກິດຈະກຳແບບໂຕ້ຕອບ ແລະ ວາລະປະກອບຄຳເຫັນຮ່ວມກັນ. ກິດຈະກຳແມ່ນເລີ່ມຕົ້ນດ້ວຍການລະດົມຄວາມຄິດກ່ຽວກັບຄວາມສໍາຄັນຂອງການປົກປ້ອງເດັກ. ຜູ້ເຂົ້າຮ່ວມໄດ້ສຶກສາກົດໝາຍວ່າດ້ວຍການປົກປ້ອງເດັກຂອງ ສປປ ລາວ, ກົດໝາຍວ່າດ້ວຍການສຶກສາ ແລະ ຍຸດທະສາດການສຶກສາຮຽນຮ່ວມຂອງ ສສກ ຮອດ 2030 ຜ່ານກິດຈະກໍາຕ່າງໆ ເຊັ່ນ: ການຕອບຄຳຖາມ, ການສະແດງບົດບາດສົມມຸດ ແລະ ການຕອບຄຳຖາມ. ກິດຈະກໍາຍ່າງແບບມີພະລັງ ຖືກນໍາໃຊ້ເພື່ອຊ່ວຍໃຫ້ຜູ້ເຂົ້າຮ່ວມຮັບຮູ້ເຖິງການເຄື່ອນໄຫວທີ່ມີຢູ່ໃນຊຸມຊົນ ແລະ ໃນໂຮງຮຽນ. ໃນວາລະສຸດທ້າຍຂອງກອງປະຊຸມ, ຜູ້ເຂົ້າຮ່ວມໄດ້ສະທ້ອນຄືນເຖິງວິທີທີ່ເຂົາເຈົ້າສາມາດນຳໃຊ້ຫຼັກການການປົກປ້ອງ ແລະ ຮັກສາຄວາມປອດໄພສຳລັບເດັກໃນເວລາປະຕິບັດໜ້າທີ່ ແລະ ການດໍາລົງວິດປະຈຳວັນຂອງເຂົາເຈົ້າ.

ທ່ານ ວັນມະນີ ວັນນະສີ ຫົວໜ້າພະແນກຄວາມກ້າວໜ້າແມ່ຍິງ ແມ່ ແລະ ເດັກ ສສກ ໄດ້ກ່າວໃນຕອນທ້າຍວ່າ: “ການປົກປ້ອງ ແລະ ຮັກສາຄວາມປອດໄພສຳລັບເດັກແມ່ນຄວາມຮັບຜິດຊອບຂອງທຸກຄົນ. ການຝຶກອົບຮົມຄັ້ງນີ້, ແມ່ນກ່ຽວກັບພາລະບົດບາດຂອງທຸກຄົນທີ່ເປັນຜູ້ເຮັດວຽກໃນຂະແໜງການການສຶກສາ ເພື່ອຮັບປະກັນໃຫ້ເດັກນ້ອຍທຸກຄົນສາມາດເຂົ້າເຖິງການສຶກສາທີ່ມີຄຸນນະພາບໄດ້ຢ່າງປອດໄພ ໃນສະພາບແວດລ້ອມລວມທີ່ສະໜັບສະໜູນໃຫ້ເຂົາເຈົ້າສາມາດບັນຄົ້ນພົບທ່າແຮງບົ່ມຊ້ອນຂອງເຂົາເຈົ້າ. ພວກ​ເຮົາ​ຮຽກຮ້ອງ​ໃຫ້ຜູ້ເຮັດວຽກໃນຂະແໜງການສຶກສາທຸກທ່ານໃນທຸກ​ຂັ້ນ​ຂອງ​ລະບົບ​ໂຮງຮຽນ ຈົ່ງ​ເປັນ​ເຈົ້າ​ການ​ປົກ​ປ້ອງ​ເດັກ ​ແລະ ສົ່ງເສີມການຮັກສາຄວາມ​ປອດ​ໄພ​ສຳລັບ​ເດັກ​ໃນ​ໂຮງຮຽນ”.

ແຜນງານບີຄວາ ແມ່ນແຜນງານທີ່ນຳພາໂດຍກະຊວງສຶກສາທິການ ແລະ ກິລາ ໂດຍການສະໜັບສະໜູນຈາກລັດຖະບານອົດສະຕຣາລີ ແລະ ອົງການພັດທະນາສາກົນຂອງປະເທດສະຫະລັດອາເມຣິກາ (USAID). ແຜນງານ​ໄດ້​ສຸມ​ໃສ່​ການເສີມ​ຂະ​ຫຍາຍ​ຜົນ​ການຮຽນ​ຂອງ​ໄວ​ໜຸ່ມ​ຂອງ​ປະ​ເທດ​ ໂດຍ​ສະ​ເພາະ​ແມ່ນ​ຜູ້​ທີ່ຕ້ອງການຄວາມຊ່ວຍເຫຼືອ ແລະ ຜູ້ທີ່​ດ້ອຍ​ໂອ​ກາດ. ແຜນງານບີຄວາ ຍັງຈະສືບຕໍ່ສຸມໃສ່ການຮັບປະກັນຄວາມສະເໝີພາບລະຫວ່າງຍິງ-ຊາຍ ແລະ ການສົ່ງເສີມການສຶກສາຮຽນຮ່ວມເຂົ້າໃນທຸກໆກິດຈະກໍາ.

ສໍາລັບກອງ​ປະຊຸມຝຶກອົບຮົມເພື່ອ​ຕິດຕາມ​ໃນຂັ້ນຕໍ່ໄປ ແມ່ນ​ຈະ​ຈັດ​ຂຶ້ນຕື່ມອີກ​ໃນ​ທ້າຍ​ເດືອນ​ນີ້ ທີ່​ວິທະຍາໄລຄູສະຫວັນ​ນະ​ເຂດ ​ແລະ ວິທະຍາໄລຄູຫຼວງ​ນ້ຳທາ.