ພິທີພົບປະສອງຝ່າຍ ລະຫວ່າງ ຜູ້​ນໍາ​ອາ​ຊຽນ ແລະ ​ບັນດາ​ຜູ້​ຕາງໜ້າ​ຊາວ​ໜຸ່ມ​ອາ​ຊຽນ ໄດ້ຈັດຂຶ້ນໃນ​ວັນ​ທີ 9 ຕຸລາ 2024 ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ເພື່ອປຶກສາຫາລື, ​ແລກປ່ຽນ​ຄວາມ​ຄິ​ດ​ເຫັນ ​ແລະ ສະ​ເໜີ​ທິດ​ທາງ ກ່ຽວ​ກັບການ​ພັດທະນາ ​ແລະ ການ​ເສີມ​ຂະຫຍາຍບົດບາດ​ຂອງ​ຊາວ​ໜຸ່ມ​ອາ​ຊຽນ.

ໃນ​ກອງປະຊຸມພົບ​ປະຄັ້ງນີ້, ຕາງໜ້າ​ຊາວ​ໜຸ່ມ​ອາຊຽນ ​ໄດ້​ນໍາ​ສະ​ເໜີ​ຖະແຫຼງການຊາວໜຸ່ມອາຊຽນຕໍ່ຜູ້​ນໍາ​ອາ​ຊຽນ ເພື່ອຮັບ​ຊາບ ​ແລະ ​ໃຫ້​ທິດ​ຊີ້​ນໍາ, ທັງ​ເປັນ​ເວທີທີ່​ມີ​ຄວາມ​ສຳຄັນ ​ເພາະເປັນ​ການ​ແລກປ່ຽນ​ຄວາມ​ຄິ​ດ​ເຫັນ ​ແລະ ສະ​ເໜີ​ທິດ​ທາງກ່ຽວ​ກັບການ​ພັດທະນາ ​ແລະ ການ​ເສີມ​ຂະຫຍາຍບົດບາດ​ຂອງ​ຊາວ​ໜຸ່ມ​ອາ​ຊຽນ ແນໃສ່ ປະກອບສ່ວນເຂົ້າໃນຄວາມພະຍາຍາມໃນການສ້າງປະຊາຄົມອາຊຽນໃຫ້ມີຄວາມເຂັ້ມແຂງ ແລະ ໃຫ້ບັນລຸຕາມເປົ້າໝາຍການພັດທະນາແບບຍືນຍົງ.

ສປປ ລາວ ​ໃນ​ນາມປະທານອາຊຽນປີ 2024 ​ໄດ້ສະແດງຄວາມ​ຊົມ​ເຊີຍຕໍ່ການ​ປະກອບສ່ວນ​ອັນ​ສຳຄັນ​ຂອງ​ຊາວໜຸ່ມອາຊຽນ​ເຂົ້າ​ໃນ​ວຽກ​ງານຕ່າງໆຂອງອາ​ຊຽນ ກໍຄື ຂະບວນການ​ສ້າງ​ປະຊາ​ຄົມ​ອາ​ຊຽນ​ຕະຫຼອດໄລຍະຜ່ານມາ ແລະ ໄດ້ຊຸກຍູ້ໃຫ້ຊາວໜຸ່ມອາຊຽນ​ ສືບ​ຕໍ່ເສີມຂະຫຍາຍການຮ່ວມມື​ໃນດ້ານຕ່າງໆຢ່າງ​ສ້າງສັນ ​ແລະ ມີ​ຄວາມ​ຮັບຜິດຊອບ​ສູງ​ ​ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງອາຊຽນ. ພ້ອມດຽວກັນນີ້, ຍັງໄດ້ສະເໜີໃຫ້ຂະແໜງການຊາວໜຸ່ມອາຊຽນ ສືບຕໍ່ປະກອບສ່ວນຜັນຂະຫຍາຍ ແລະ ຈັດຕັ້ງປະຕິິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດຂອງເສົາຄ້ໍາປະຊາຄົມອາຊຽນ ລວມທັງບັນດາເອກະສານສືບທອດ ແລະ ບັນດາເອກະສານກ່ຽວຂ້ອງຢ່າງມີປະສິດທິຜົນ.

ກ່ອນ​ໜ້າ​ກອງປະຊຸມ​ພົບ​ປະ​ໃນຄັ້ງນີ້, ຊາວໜຸ່ມອາຊຽນ ​ໄດ້​ຈັດກອງປະຊຸມສົນທະນາຊາວໜຸ່ມອາຊຽນ ຄັ້ງທີ 3 ໃນລະຫວ່າງວັນທີ 5-7 ຕຸລາ 2024 ທີ່ແຂວງຫລວງພະບາງ ພາຍໃຕ້ຫົວຂໍ້ “ການເສີມສ້າງຄວາມເຂັ້ມແຂງ ແລະ ການຊຸກຍູ້ແບບຮອບດ້ານ ເພື່ອການພັດທະນາຊາວໜຸ່ມອາຊຽນທີ່ຍືນຍົງ” ຊຶ່ງບັນດາ​ຜູ້​ຕາງໜ້າ​ຊາວ​ໜຸ່ມ​ອາ​ຊຽນ ໄດ້ທົບທວນຜົນການຈັດຕັ້ງປະຕິບັດບັນດາກິດຈະກໍາຊາວໜຸ່ມອາຊຽນ ແລະ ມີຄໍາເຫັນກ່ຽວກັບແນວທາງໃນການພັດທະນາຊາວໜຸ່ມອາຊຽນໃນດ້ານຕ່າງໆ ແລະ ໄດ້ສ້າງເປັນຂໍ້ສະເໜີ ກໍຄື ຖະແຫຼງການຊາວໜຸ່ມອາຊຽນ ເພື່ອກະກຽມລາຍງານຕໍ່ຜູ້ນໍາອາຊຽນ.

ນຳສະເໜີໂດຍ ດາວຫວຽດ